Chivumbuluso chomwe Yohani adatambira 21:1-27
21 Ndipo nidawona kudzulu kunyowani na dziko yapasi inyowani, ndawa kudzulu kwa kalekale na dziko yapasi yakalekale venze vidachoka ndipo kulibe pomwe nyanja.
2 Nidawona pomwe thaundi yochena, Yerusalemu M’nyowani, inkubuluka kuchokera kudzulu kwa Mulungu ndipo yenze idakonzewa ninge nkazi yemwe ankulowodwa yemwe wavala vovala vokhuza kuti akatambire mwamuna wake.
3 Patsogolo pake nidabva mawu yokuwa yochokera ku mpando wachifumu yakuti: “Onani! Chitenti cha Mulungu chiri pakati pa wanthu ndipo iye ambadzakhale nawo. Iwo adzakhale wanthu wake ndipo Mulungu muyo adzakhale nawo.
4 Iye adzapukuse misozi yose m’maso mwawo ndipo impfa idzakhalepolini pomwe. Padzakhalelini pomwe kulira, kubuula panango kuwawiwa. Vinthu vakalekale vapita.”
5 Ndipo Mulungu yemwe wakhala pampando wachifumu adati: “Onani! Vinthu vose vomwe ninkukonza ni vanyowani.” Adanena pomwe kuti: “Nemba, ndawa mawu mwaya ni yothembeka komasoti ni chaiyo.”
6 Iye adaniuza kuti: “Vakwanirisiwa! Ine ndine Alefa na Omega,* kuyamba na kumaliza. Aliyese yemwe akubva nyota nidzamupase fovolo* madzi ya ntsantsa ya moyo.
7 Aliyese yemwe wawina pa nkhondo adzatambire vinthu vimwevi kuti vikhale vake. Inepano nidzakhale Mulungu wake ndipo iye adzakhale mwana wangu.
8 Koma wanthu wamantha, alibe chikhulupiriro, wopsyipiziwa omwe achita pomwe vinthu vonyantsa, wakupha wanthu, wachigololo,* omwe achita va mizimu, wotumikira mafano na wanthu wose wabodza, adzaponyewe mu nyanja yogaka moto na sulufule. Nyanja mweyi inkuimira impfa yachiwiri.”
9 M’bodzi pa angelo 7 wale, omwe enze na mbale 7 zodzala na miliri 7 yomalizira adabwera nkuniuza kuti: “Bwera kuno nikuwonese nkazi yemwe ankulowodwa, nkazi wa Mwanawankhosa.”
10 Manje, pakuphatisa basa mphanvu ya mzimu, adanitenga nkuniyendesa ku phiri ikulu na itali ndipo adaniwonesa thaundi yochena ya Yerusalemu, inkubuluka kuchokera kudzulu kwa Mulungu,
11 ndipo yenze na ulemerero wa Mulungu. Imbayetima ninge mwala wodula maninge, ninge mwala wa yasipi wochena mbee! ninge girazi.
12 Thaundi mwiyo yenze na mpanda ukulu komasoti utali ndipo yenze na misuwo 12. Pa misuwo mwayo penze angelo 12 ndipo padanembewa madzina ya madzinza 12 ya wana wa Izirayeli.
13 Kumachibese kwa thaundi mwiyo kwenze misuwo yatatu, ku norte misuwo yatatu, ku sul misuwo yatatu ndipo kumaulo kwake kwenze misuwo yatatu.
14 Mpanda wa thaundi mwiyo wenze pomwe na minyala yokwana 12 yomangira fundasau ndipo paminyala mwayo padanembewa madzina 12 ya atumi 12 wa Mwanawankhosa.
15 Manje yemwe ambaniyankhula ule adatakula ntsanga ya golide yopimira, kuti apime thaundi mwiyo, misuwo yake na mpanda wake.
16 Thaundi mwiyo yenze na mbali 4 zolingana kutalimpha kwake. Ntalintali mwake ni chibodzibodzi na mfupimfupi mwake. Mngelo muyo adapima thaundi mwiyo na ntsanga ndipo adagumana kuti yenze mashitadiyo 12 000* kuizungulira. Ntalintali mwake, mfupimfupi mwake na kuchoka pasi kuyenda m’dzulu ni volingana.
17 Adapima pomwe mpanda wake ndipo wenze utali 64 metro mobverana na mpimo womwe munthu adagumana, womwe ni wolingana pomwe na mpimo wa mngelo.
18 Mpanda muyo udamangiwa na mwala wa yasipi ndipo thaundi mwiyo idamangiwa na golide wokonzewa bwino wogwerewera ninge girazi.
19 Fundasau ya mpanda ya thaundi mwiyo adaikhuzisa na minyala yodula ya makhaindi yosiyanasiyana: Fundasau yoyamba yenze ya mwala wa yasipi, yachiwiri mwala wa safiro, yachitatu mwala wa kalikedo, yachinayi mwala wa emarodi,
20 yachishanu mwala wa sadonu, yachi 6 mwala wa sadiyo, yachi 7 mwala wa kulusolito, yachi 8 mwala wa belulo, yachi 9 mwala wa topazi, yachi 10 mwala wa kulusopurazo. Yachi 11 mwala wa huwakinto ndipo yachi 12 mwala wa ametusito.
21 Komasoti vitseko va misuwo 12 yale venze ngale 12. Chitseko chirichose chidakonzewa na ngale ibodzi. Ndipo nsewu ukulu wa muthaundi mwiyo udakonzewa na golide wokonzewa bwino wogwerewera ninge girazi.
22 Muthaundi mwiyo niribe kugumanako kachisi aliyese ndawa kachisi wake ni Yahova* Mulungu Wamphanvu yose komasoti Mwanawankhosa.
23 Thaundi mwiyi imbafunikiralini pomwe kugwerewera kwa dzuwa panango kwa mwezi, ndawa kugwerewera kwa ulemerero wa Mulungu kumbavunikira thaundi mwiyo ndipo Mwanawankhosa ni yemwe wenze kandyero yake.
24 Kugwerewera kwake kudzavunikire njira ya makhaindi ya wanthu kuti yakwanise kufamba ndipo mafumu ya dziko yapasi yadzabwerese ulemerero wawo mu thaundi mwiyo.
25 Misuwo yake yadzafungiwelini olo pang’ono, ndawa kudzakhale masikati yokha ndipo usiku udzakhalekolini.
26 Iwo adzabwerese ulemerero na ulemu wa makhaindi ya wanthu mu thaundi mwiyo.
27 Koma chirichose chopsyipiziwa komasoti aliyese wochita vonyantsa na viribe chilungamo, adzangenelini mu thaundi mwiyo. Omwe adzangenemo ni wale wokha omwe madzina yawo yadanembewa mu mpukutu wa moyo wa Mwanawankhosa.
Mawu ya m’nyantsi
^ Panango kuti: “ndine A na Z.” Alefa ni letra yoyambirira ya alfabeto ya Chigiriki ndipo Omega ni letra yomalizira.
^ Panango kuti: “mahala; palibe ntengo.”
^ Onani matanthauzo ya mawu yanango.
^ Kuthamangira 2220 kilometro. Shitadiyo ibodzi ni yolingana na 185 metro. Onani vakumapeto B14.
^ Onani vakumapeto A5.
