Chivumbuluso chomwe Yohani adatambira 22:1-21
22 Ndipo adaniwonesa kamadzi ka madzi ya moyo, yochena ninge mwala woyetima wa kulusitalo, kankufamba kuchokera kumpando wachifumu wa Mulungu na wa Mwanawankhosa.
2 Kamadzi mwako kadagwata pakati pa nsewu ukulu wa muthaundi mwiyo. Kumbali zose za kamadzi mwako kwenze miti ya moyo yomwe yambabala vipaso vokolola maulendo 12, ndipo yambabala vipaso mwezi uliwose. Masamba ya miti mwayo yenze yopolesera makhaindi ya wanthu.
3 Mulungu adzatembererelini pomwe thaundi mwiyo. Koma mpando wachifumu wa Mulungu na wa Mwanawankhosa udzakhale mu thaundi mumo ndipo akapolo wa Mulungu adzachite utumiki wopatulika kwa iye.
4 Iwo adzawone nkhope yake ndipo dzina yake idzakhale pamikuma yawo.
5 Komasoti usiku udzakhalekolini pomwe ndipo adzafunikirelini pomwe kugwerewera kwa kandyero panango kwa dzuwa, ndawa Yahova* Mulungu adzawavunikire. Ndipo iwo adzatonge ninge mafumu mpakana kalekale.
6 Iye adaniuza kuti: “Mawu mwaya ni yothembeka ndipo ni chaiyo. Yahova* Mulungu yemwe adauzira aneneri kuti apereke mitontholo watumiza mngelo wake kuti adzawonese akapolo wake vinthu vomwe vinkufunika kuchitika manjemanje.
7 Onani! Ninkubwera mwakankulumize. Wokondwa ni aliyese yemwe ankutewedza mawu ya mu mpukutu moyu yoneneratu vakutsogolo.”
8 Inepano Yohani, ndine nidabva na kuwona vinthu vimwevi. Panidabva na kuwona vinthu vimwevi, nidagwada nkujolima pamapazi ya mngelo yemwe ambaniwonesa vinthu vimwevi kuti nimutumikire.
9 Koma iye adaniuza kuti: “Samala! Ayi kuchita vimwevi! Inepano nandokhala kapolo munzako, kapolo wa aneneri omwe ni abale wako komasoti kapolo wa wanthu omwe ankutewedza mawu ya mu mpukutu moyu. Tumikira Mulungu.”
10 Adaniuza pomwe kuti: “Ayi kusunga mwachintsintsi mawu yoneneratu vakutsogolo ya mu mpukutu moyu, ndawa nthawe yoikhiwiratu yafendera.
11 Yemwe ankuchita vinthu vilibe chilungamo, apitirize kuchita vinthu viribe chilungamo mwivo ndipo yemwe ankuchita vonyantsa, apitirize kuchita vonyantsa vimwivo. Koma wolungama apitirize kuchita vachilungamo ndipo wochena apitirize kukhala wochena.
12 “‘Onani! Ninkubwera mwakankulumize ndipo niri na malipiro yakuti nipereke kwa aliyese mobverana na basa yake.
13 Ine ndine Alefa na Omega,* woyamba na womalizira, kuyamba na kumaliza.
14 Okondwa ni omwe awatcha mikhanjo yawo kuti akhale na ufulu wa kudya vipaso va m’miti ya moyo, komasoti kuti abvumiziwe kungena muthaundi mwiyo na pamisuwo yake.
15 Kunja kuli wanthu omwe ali ninge mbwaya* komasoti omwe achita vamizimu, wachigololo,* wakupha wanthu, otumikira mafano na aliyese yemwe akonda kunama komasoti kuchita vinthu viribe chilungamo.’
16 “‘Inepano Yesu nidatumiza mngelo wangu kuti adzachitire umboni vinthu vimwivi kwa iwepo kuti vithandize mipingo. Inepano ndine muju komasoti mbadwa ya Davide. Ndine pomwe nthanda yogaka maninge.’”
17 Mzimu na nkazi yemwe ankulowodwa ankupitiriza nkunena kuti: “Bwera!” Ndipo aliyese yemwe wabva anene kuti: “Bwera!” Komasoti aliyese yemwe ankubva nyota abwere. Aliyese yemwe ankufuna, amwe fovolo madzi yopasa moyo.
18 “Ine ninkuchitira umboni kwa aliyese yemwe wabva mawu yoneneratu vakutsogolo ya mu mpukutu moyu kuti: Munango akaingizira pa vimwevi, Mulungu adzamuingizire miliri yomwe yanembewa mu mpukutu moyu.
19 Ndipo munango akachosa kalikose pa mawu ya mu mpukutu moyu yoneneratu vakutsogolo, Mulungu adzachose gawo yake pa vomwe vanembewa mu mpukutu moyu. Kutanthauza kuti adzamubvumizelini kudya vipaso va m’miti ya moyo komasoti adzamubvumizelini kungena muthaundi mwiyo yochena.
20 “Yemwe ankuchitira umboni vinthu vimwevi ankunena kuti: ‘Inde, ninkubwera kankulumize.’”
“Ame! Bwerani Ambuya Yesu.”
21 Kukoma ntima kukulu kwa Ambuya Yesu kukhale na ochena mwawo.
Mawu ya m’nyantsi
^ Onani vakumapeto A5.
^ Onani vakumapeto A5.
^ Panango kuti: “ndine A na Z.” Alefa ni letra yoyambirira ya alfabeto ya Chigiriki ndipo Omega ni letra yomalizira.
^ Amwawa ni wanthu omwe vochita vawo ni vonyantsa pamaso pa Mulungu.
^ Onani matanthauzo ya mawu yanango.
