Chivumbuluso chomwe Yohani adatambira 3:1-22
3 “Kwa mngelo wa mpingo wa ku Sade nemba kuti: Ivi ni vomwe akunena iye yemwe anamizimu 7 ya Mulungu na nyenyezi 7. ‘Ninkudziwa basa zako, wanthu awona ninge unamoyo, koma ndiwe wakufa.
2 Khala maso, ndipo limbikisa wose wosala omwe asala pang’ono kufa, ndawa nagumana kuti basa zako ziribe kuchitiwa mokwana pamaso pa Mulungu wangu.
3 Ndipomwapa pitiriza kukumbukira vomwe udatambira na vomwe udabva. Pitiriza kuvitewedza ndipo ulape. Shuwadi, ukaleka kumuka, nidzabwere ninge mbava ndipo udzadziwelini olo pang’ono nthawe yomwe nidzafike kwa iwepo.
4 “‘Olo viriteno, iwepo unawanthu anango* mu Sade omwe alibe kupsyipiza vovala vawo ndipo adzafambe na inepano alivale vovala vochena, ndawa ni woyenerera.
5 Manje yemwe wawina pankhondo adzavazikiwe vovala vochena ndipo dzina yake nidzaipfudzelini mu bukhu ya moyo. Koma nidzaibvumize dzina yake pamaso pa Ababa wangu na pamaso pa angelo wake.
6 Yemwe anamatu abve vomwe mzimu ukunena ku mipingo.’
7 “Kwa mngelo wa mpingo wa ku Filadefiya nemba kuti: Ivi ni vomwe akunena wochena muyo, yemwe ni chaiye, yemwe anakhiyi ya Davide. Iye yemwe akafungula palibe yemwe angafunge, ndipo akafunga palibe yemwe angafungule.
8 ‘Ninkudziwa basa zako. Ona! Nafungula nsuwo pamaso pako womwe munango angafungelini. Nikudziwa kuti unamphanvu zing’onong’ono komasoti kuti udasunga mawu yangu. Nikudziwa pomwe kuti wakhala wokhulupirika ku dzina yangu.
9 Ona! Wanthu ochokera mu sunagoge wa Satana, omwe anama kuti ni Ayuda koma ni Ayudalini, nidzawachitise kuti abwere kudzagwada nkujolika pa mapazi yako. Ndipo nidzawachitise kuti adziwe kuti nikukonda.
10 Ndawa yakuti udasunga mawu yonena va kupirira kwangu,* inembo nidzakuteteze panthawe ya kuyesewa yomwe ikubwera padziko yose yapasi komwe kunawanthu. Nidzakuteteze panthawe yomwe ikubwera kudzayesa wanthu omwe akukhala padziko yapasi.
11 Nikubwera kankulumize. Pitiriza kuphata mwamphanvu chomwe uli nacho, kuti munango osati akutengere malipiro* yako.
12 “‘Yemwe wawina pankhondo, nidzamuikhe kuti akhale chipilala mu kachisi wa Mulungu wangu ndipo adzachokemolini pomwe. Nidzanembe pankuma pake dzina ya Mulungu wangu komasoti dzina ya thaundi ya Mulungu wangu, yomwe ni Yerusalemu Unyowani, yemwe ankubuluka kuchokera kudzulu kwa Mulungu wangu. Nidzamunembe pomwe dzina yangu inyowani.
13 Yemwe anamatu abve vomwe mzimu ukunena ku mpingo.’
14 “Kwa mngelo wa mpingo wa ku Laodikaya, nemba kuti: Ivi ni vomwe Ame akunena, yemwe ni mboni yokhulupirika na chaiyo, woyamba kulengewa pa vinthu vose vomwe Mulungu adalenga.
15 ‘Ninkudziwa basa zako, kuti ndiwelini wozizira panango wakupsa. Nidakakonda udakakhala wozizira panango wakupsa.
16 Koma ndawa yakuti ndiwe wothuma, osati wakupsa panango wozizira, nikulavule nkamwa mwangu.
17 Iwepo ukunena kuti: “Ndine wolemera, nagumana chuma chizinji ndipo nikusowalini kanthu,” koma ukudziwalini kuti ndiwe wobonera, wobvesa ntsisi, wosauka, lombe komasoti uli pezi.
18 Ndipomwapa nikukupasa malangizo yakuti ugule kwa inepano golide wosungunuliwa na moto, kuti ukhale wolemera. Ugule pomwe vovala vochena kuti uvale, na cholinga chakuti osati uwonerewe ndawa ungachite manyazi. Ndipo ugule pomwe mankhwala yopakasira m’maso mwako kuti uwone.
19 “‘Wose omwe niwakonda, niwatsuula na kuwalanga. Ndipomwapa khala wodzipereka ndipo ulape.
20 Ona! Naimirira pansuwo ndipo nikugogodza. Munango akabva mawu yangu nkufungula nsuwo, nidzangene m’nyumba mwake ndipo iye na ine tidzadyere pabodzi chakudya chamaulo.
21 Yemwe wawina pa nkhondo nidzamubvumize kuti akhale na inepano pampando wangu wachifumu, ninge momwe ine nidakhalira na Ababa wangu pampando wawo wachifumu panidawina pankhondo.
22 Yemwe anamatu abve vomwe mzimu ukunena ku mipingo.’”
Mawu ya m’nyantsi
^ Muchiyankulo choyambirira, “unamadzina yanganani.”
^ Mabaibolo yanango yanena kuti, “udatewedzera chitsanzo changu cha kupirira.”
^ Muchiyankhulo choyambirira, “chisote chasimbi chowoneka ninge nkhata.”
