Chivumbuluso chomwe Yohani adatambira 4:1-11
4 Vimwevi pavidamala, nidanyang’ana kudzulu ndipo nidawona nsuwo wofunguka. Mawu yoyamba yomwe nidabva yankuniyankhula yenze ninge kulira kwa lupenga. Mawu mwayo yenze yakuti: “Kwira kudzulu kuno ndipo nikuwonese vinthu vomwe vifunika kuchitika.”
2 Nthawe mwiyoletu mzimu wa Mulungu udayamba kuphata basa mwa inepano ndipo mpando wachifumu udawoneka uli pamalo yake kudzulu, munango ali khalepo.
3 Yemwe adakhala pampando muyo ambawoneka ninge mwala wa yasipi komasoti mwala wa sadiyo.* Chitawaleza* chowoneka ninge mwala wa emarodi chidazungulira mpando wachifumu muyo.
4 Mpando wachifumu muyo wenze zunguliriwe pomwe na mipando yachifumu yokwana 24. Pa mipando yachifumu mwayo, nidawona pali khale akulu 24 ali vale vovala vichena komasoti visote vachifumu vagolide kumsolo kwawo.
5 Ku mpando wachifumu muko kumbabula kaphaliwali, mawu na kugunda. Penze pomwe makandyero ya moto 7 yomwe yambagaka patsogolo pa mpando wachifumu muyo. Makandyero mwayo yankuimira mizimu 7 ya Mulungu.
6 Patsogolo pa mpando wachifumu muyo, penze chinthu chinango chowoneka ninge nyanja ya girazi komasoti ninge mwala wa kulusitalo.
Pakati pa mpando wachifumu muyo komasoti kuzungulira mpando muyo, penze angelo 4 omwe enze na maso yazinji maninge, kutsogolo na kumbuyo.
7 Mngelo woyamba ambawoneka ninge mphondolo. Mngelo wachiwiri ambawoneka ninge mwana wa ng’ombe mwamuna. Mngelo wachitatu wenze na nkhope yowoneka ninge ya munthu ndipo mngelo wachinayi ambawoneka ninge mphungu yomwe inkumbululuka.
8 Aliyese pa angelo 4 mwawa wenze na maphaphiro 6 ndipo maphaphiro mwayo yenze na maso palipose. Angelo mwawa ambapumulalini usiku na masikati, ambandokhalira kunena kuti: “Wochena, wochena, wochena ni Yahova* Mulungu, Wamphanvu zose, yemwe wenzepo, yemwe alipo na yemwe ankubwera.”
9 Nthawe zose angelo mwawa akambapereka ulemerero na ulemu komasoti akambatembeja Mulungu yemwe wakhala pampando wachifumu muyo yemwe adzakhale na moyo mpakana kalekale,
10 akulu 24 wale ambagwada nkujolima pamaso pa mpando wachifumu muyo, nkutumikira Yemwe adzakhale na moyo mpakana kalekale muyo. Iwo ambaponya pasi visote vawo vachifumu pamaso pa mpando wachifumu muyo nkunena kuti:
11 “Ndimwe woyenerera, imwepo Yahova* Mulungu wathu kutambira ulemerero, ulemu na mphanvu ndawa mudalenga vinthu vose ndipo mwakufuna kwanu, vidakhalapo ndipo vidalengewa.”
Mawu ya m’nyantsi
^ Panango kuti: “mwala ufuwira wodula maninge.”
^ Wanthu anango anena kuti: “utawaleza.”
^ Onani vakumapeto A5.
^ Onani vakumapeto A5.
