Chivumbuluso chomwe Yohani adatambira 6:1-17
-
Mwanawankhosa adamatula vidindo 6 voyambirira (1-17)
-
Wowina azondi adapakira pa kavalo nchena (1, 2)
-
Yemwe adapakira pa kavalo nfuwira ninge moto adabvumiziwa kuchosa ntendere (3, 4)
-
Yemwe adapakira pa kavalo mpsyipa adabweresa njala (5, 6)
-
Yemwe adapakira pa kavalo wa mbumbumbu dzina yake ni Impfa (7, 8)
-
Pasi pa guwa yantsembe penze wanthu omwe adaphewa (9-11)
-
Chivomezi chikulu (12-17)
-
6 Nidawona Mwanawankhosa ankumatula chidindo chibodzi pa vidindo 7 vire, ndipo nidabva mngelo m’bodzi pa angelo 4 wale ankuyankhula na mawu yobveka ninge kugunda kwa dedza kuti: “Bwera!”
2 Panidanyang’ana, nidawona kavalo nchena ndipo yemwe adapakira pa kavalo muyo adatakula uta. Iye adapasiwa chisote chachifumu nkuyenda kukagonjesa azondi wake ndipo adawina pankhondo yomenyana nawo.
3 Padamatula chidindo chachiwiri, nidabva mngelo wachiwiri ankunena kuti: “Bwera!”
4 Padabula kavalo munango nfuwira ninge moto. Yemwe adapakira pa kavalo muyo adabvumiziwa kuchosa ntendere padziko yapasi, kuti wanthu aphane ndipo adapasiwa chibemba chikulu.
5 Padamatula chidindo chachitatu, nidabva mngelo wachitatu ankunena kuti: “Bwera!” Ndipo panidanyang’ana, nidawona kavalo mpsyipa. Yemwe adapakira pa kavalo muyo wenze na kilo m’manja.
6 Patsogolo pake nidabva ninge munango ankuyankhula kuchokera pagulu ya angelo 4 wale kuti: “Kilo ibodzi ya tirigu, ntengo wake ukhale dinari* ibodzi, ndipo makilo yatatu ya balere, ntengo wake ukhale dinari ibodzi. Koma ayi kudzonga mafuta ya maolivi na vinyu.”
7 Padamatula chidindo chachinayi, nidabva mawu ya mngelo wachinayi ankunena kuti: “Bwera!”
8 Panidanyang’ana, nidawona kavalo wa mbumbumbu. Yemwe adapakira pa kavalo muyu dzina yake yenze impfa. Ndipo manda* yambamutewera pafupi maninge. Iwo adapasiwa ulamuliro pa gawo ibodzi ya magawo 4 ya dziko yapasi, kuti aphe wanthu na chibemba chitali, njala, muliri wopasa mantha komasoti vilombo va pa dziko yapasi.
9 Padamatula chidindo chachishanu, nidawona pasi pa guwa yantsembe pali magazi* ya wanthu omwe adaphewa ndawa ya mawu ya Mulungu komasoti ndawa ya basa yochitira umboni.
10 Iwo adayankhula mokuwa kuti: “Ko mudzalekelere mpakana lini, imwepo Ambuya Nkulu Maninge, Mulungu wochena na chaiye, ne kuweruza na kubwezera okhala padziko yapasi ndawa ya magazi yathu?”
11 Aliyese wa iwo adapasiwa mkhanjo uchena ndipo adauziwa kuti abakapitirize kupumula kanthawe kang’ono, mpakana chiwerengero cha akapolo anzawo chikwane, inde chiwerengero cha abale wawo omwe enze adasala pang’ono kuphewa ninge momwe iwombo adaphewera.
12 Padamatula chidindo chachi 6, nidawona kuti kudachitika chivomezi chikulu. Dzuwa idapsyipa ninge chisakha choluka na ukuse* ndipo mwezi wose udafuwira ninge magazi.
13 Nyenyezi zakudzulu zidagwera padziko yapasi ninge momwe muti wa nkuyu womwe unkugunduzika na mphepo yamphanvu umbwezera nkhuyu zake ziwisi.
14 Ndipo kudzulu kudachoka ninge mpukutu womwe ankuupeta, ndipo phiri iriyose na ntsuwa iriyose vidachosewa pamalo yake.
15 Patsogolo pake mafumu ya padziko yapasi, atumiki wa mpfumu, akuluakulu wa masocha, olemera, wamphanvu, kapolo aliyese na munthu aliyese yemwe ni kapololini, adabishala mu vimphako na mu viminyala va m’mapiri.
16 Iwo ambauza mapiri na viminyala kuti: “Tigwereni, tibiseni kuti osati tiwonekere kwa Mulungu yemwe wakhala pampando wachifumu nakuti ukali wa Mwanawankhosa osati utigwere,
17 ndawa ntsiku ikulu ya ukali wawo yafika, ndipo ni mbani yemwe angaimirire pamaso pawo?”
Mawu ya m’nyantsi
^ Imweyi ni kobiri ya siliva ya Aroma ndipo yenze malipiro ya basa yomwe munthu waphata ntsiku ibodzi. Onani vakumapeto B14.
^ Mwaya ni manda ya wanthu wose.
^ Pamwapa vinkuwoneka kuti ankunena va magazi yomwe yadathiriwa paguwa yantsembe. Magazi mwaya yankuimira moyo.
^ Vinkuwoneka kuti ankunena ukuse wa mbuzi.
