Chivumbuluso chomwe Yohani adatambira 7:1-17
7 Vimwevi pavidamala, nidawona angelo anayi aliyimirire m’makhona yanayi ya dziko yapasi, iwo enze adaphata mwamphanvu mphepo zinayi za dziko yapasi, kuti mphepo iriyose osati imenye padziko yapasi, panyanja panango pamuti uliwose.
2 Nidawona pomwe mngelo munango ankukwira kuchokera kobulira dzuwa,* ali na chidindo cha Mulungu wamoyo. Iye adayankhula mokuwa kwa angelo 4 wale, omwe adapasiwa mphanvu zodzonga dziko yapasi na nyanja,
3 kuti: “Ayi kudzonga dziko yapasi, panango nyanja, panango miti, mpakana nidinde chidindo pa mikuma ya akapolo wa Mulungu wathu.”
4 Manje nidabva chiwerengero cha wanthu omwe adadindiwa chidindo. Wanthu okwana 144 000, ochokera mu dzinza iriyose ya wana wa Izirayeli, adadindiwa chidindo:
5 Mudzinza ya Yuda, adadindamo wanthu 12 000.
Mu dzinza ya Rubeni, 12 000.
Mu dzinza ya Gadi, 12 000.
6 Mu dzinza ya Aseri, 12 000.
Mu dzinza Nafitali, 12 000.
Mu dzinza ya Manase, 12 000.
7 Mu dzinza ya Simiyoni, 12 000.
Mu dzinza ya Levi, 12 000.
Mu dzinza ya Isakara, 12 000.
8 Mu dzinza ya Zebuloni, 12 000.
Mu dzinza ya Yosefe, 12 000.
Ndipo mudzinza ya Benjamim, adadindamo wanthu 12 000.
9 Vimwevi pavidamala, panidanyang’ana nidawona gulu ikulu ya wanthu, omwe palibe munthu aliyese yemwe adakwanisa kuwawerenga, wochokera mu dziko iriyose, dzinza iriyose, khaindi iriyose na chiyankhulo chirichose. Iwo enze imirire pamaso pa mpando wachifumu na pamaso pa Mwanawankhosa, ali vale mikhanjo yachena komasoti ali takule nthawi za kanjedza m’manja mwawo.
10 Iwo adapitiriza kuyankhula mokuwa kuti: “Chipulumuso chathu chachokera kwa Mulungu wathu, yemwe wakhala pampando wachifumu, na kwa Mwanawankhosa.”
11 Angelo wose enze imirire kuzungulira mpando wachifumu, akulu komasoti angelo anayi wale. Ndipo wose adagwada nkujolima mpakana nkhope zawo pasi, pamaso pa mpando wachifumu muyo na kutumikira Mulungu.
12 Iwo ambanena kuti: “Ame! Mulungu wathu ndiye yemwe ananzeru, mphanvu ndipo ndiye ankufunika kutamandiwa, kupasiwa ulemerero na ulemu komasoti kutembejewa mpakana kalekale. Ame.”
13 Manje m’bodzi pa akulu wale adanibvunza kuti: “Ko omwe avala mikhanjo yochena mwawa ni mbani, ndipo achokera kuponi?”
14 Nthawe mwiyo nidamudawira kuti: “Mbuya wangu, mukudziwa ndimwepo.” Ndipo iye adaniuza kuti: “Amwawa ndiwo omwe abula mu chisautso chikulu ndipo awatcha mikhanjo yawo nkuyachenesa m’magazi ya Mwanawankhosa.
15 Ndipomwapa ali pamaso pa mpando wachifumu wa Mulungu. Iwo ankumuchitira utumiki wopatulika usiku na masikati mu kachisi wake, ndipo yemwe wakhala pampando wachifumu muyo adzawabise na tenti yake kuti awateteze.
16 Iwo adzabvelini pomwe njala panango nyota. Dzuwa panango kutentha kulikose kudzawashokelini,
17 ndawa Mwanawankhosa, yemwe ali pambali* pa mpando wachifumu, adzawabuse nkuwatsogolera ku ntsantsa za madzi ya moyo. Ndipo Mulungu adzapukuse misozi yose m’maso mwawo.”
