Chivumbuluso chomwe Yohani adatambira 9:1-21
9 Mngelo wa 5 adaliza lupenga yake. Ndipo nidawona nyenyezi yomwe idagwera padziko yapasi kuchokera kudzulu ire. Nyenyezi mwiyo idapasiwa khiyi ya dindi yongenera kuphompho.
2 Nyenyezi mwiyo idafungula dindi yongenera kuphompho mwiyo ndipo utsi ninge wa muuvuni ukulu udabula mudindi mumo. Dzuwa komasoti mphuwe vidapsyipa na utsi wamudindi mwiyo.
3 Mu utsi mumo, mudabula dzombe ndipo idabwera padziko yapasi. Dzombe mwiyo idapasiwa ulamuliro wolingana na womwe vikalize vapadziko yapasi viri nawo.
4 Dzombe mwiyo idauziwa kuti osati idzonge vomera vapadziko yapasi, panango chirichose chopsyipirira, panango muti uliwose, koma kuti idzonge wanthu okha omwe alibe chidindo cha Mulungu pankuma pawo.
5 Dzombe mwiyo iribe kubvumiziwa kupha wanthu mwawo, koma idauziwa kuti iwadzudze kwa minyezi 5. Ndipo kudzudziwa kwawo kwenze kolingana na momwe munthu adzudzikira akalumiwa na chikalize.
6 Muntsiku mwizo, wanthu adzafagefage impfa, koma adzaigumanelini. Adzafunisise kufa, koma impfa imbadzawathawe.
7 Dzombe mwiyo imbawoneka ninge makavalo yokonzekera nkhondo. Pamisolo pawo penze vinthu vowoneka ninge visote vachifumu vagolide. Nkhope zawo zenze ninge nkhope za wanthu,
8 koma tsitsi yawo yenze ninge ya akazi ndipo manu yawo yenze ninge ya mphondolo.
9 Pachifuwa pawo penze votetezera vokhala ninge vasimbi. Ndipo zungo ya mapapiro yawo yenze ninge zungo ya ngolo zomwe zinkuguziwa na makavalo yomwe yankuthamangira kunkhondo.
10 Dzombe mwiyo yenze pomwe na michira yomwe yenze na mbolera* ninge vikalize. M’michira yawo mwayo ni momwe mwenze mphanvu zodzonga wanthu mwawo kwa minyezi 5.
11 Dzombe mwiyo yenze pomwe na mngelo wa kuphompho. Muchiheberi dzina yake ni Abadoni,* koma Muchigiriki ali na dzina yakuti Apoliyoni.*
12 Tsoka ibodzi mwiyo yapita. Koma patsogolo pa vimwevi pakubwera pomwe matsoka yawiri.
13 Mngelo wa 6 adaliza lupenga yake. Ndipo nidabva mawu yabodzi kuchokera pa nyanga za paguwa yantsembe ya golide yomwe yenze pamaso pa Mulungu,
14 akuwuza mngelo wa 6 yemwe wenze na lupenga mwiyo kuti: “Masula angelo 4 omwe amangiwa ku kamadzi kakulu ka Firate.”
15 Manje angelo 4 mwawo adamasuliwa. Iwo enze okonzeka kuti panthawe, ntsiku, mwezi na gole mwiyo, aphe gawo ibodzi pa magawo yatatu ya wanthu.
16 Ndipo chiwerengero cha masocha chomwe chenze pakire pa makavalo chenze 20 000 vezes 10 000.* Mwechi ni chiwerengero chawo chomwe nidabva.
17 Makavalo komasoti omwe adakwera pa makavalo mwayo, m’masomphenya ambawoneka tene: Adavala voteteza pachifuwa vifuwira ninge moto, vagirini ninge mwala wa huwakinto komasoti vasafalawu ninge sulufule. Misolo ya makavalo mwayo yenze ninge misolo ya mphondolo ndipo nkamwa mwawo mumbabula moto, utsi na sulufule.
18 Gawo ibodzi pa magawo yatatu ya wanthu omwe adaphewa na miliri yatatu yomwe idabula nkamwa mwawo, yomwe ni moto, utsi na sulufule.
19 Mphanvu za makavalo mwayo zenze nkamwa mwawo na m’michira yawo, ndawa michira yawo yenze ninge nyoka ndipo yenze na misolo. Michira mweyi imbadzonga nayo wanthu.
20 Koma wanthu wose omwe alibe kuphewa na miliri mweyi, alibe kulapa basa zawo na manja yawo. Alibe kusiya kupempherera mafano ya golide, ya siliva, ya kobre, ya mwala na ya miti, yomwe yangakwaniselini kuwona, kubva, panango kufamba.
21 Iwo alibe kulapa basa zawo za kupha wanthu, za mizimu, za chigololo* komasoti basa zawo za kuba.
Mawu ya m’nyantsi
^ Panango kuti: “luwolera; lolera.”
^ Kutanthauza “Kudzonga.”
^ Kutanthauza “Wodzonga.”
^ Panango kuti: “200 000 000.”
^ Onani matanthauzo ya mawu yanango.
