Kwa Filimoni 1:1-25
1 Ine Paulo niri mudjeri ndawa ya Khrisitu Yesu pabodzi na Timoteyo m’bale wathu, ndipo ninkunembera iwepo Filimoni nyabasa munzathu wapamoyo,
2 pabodzi na mulongosi wathu Apiya komasoti nsocha munzathu Arikipo na mpingo womwe usonkhana m’nyumba mwako kuti:
3 Kukoma ntima kukulu komasoti ntendere wochokera kwa Mulungu Ababa wathu na Ambuya Yesu Khrisitu vikhale namwe.
4 Nthawe zose nitembeja Mulungu wangu nikambakutomola m’mapemphero yangu,
5 nikabva va chikhulupiriro chako na momwe ukondera Ambuya Yesu na ochena wose.
6 Nipemphera kuti chikhulupiriro chomwe iwepo na wanthu anango mulinacho, chikuthandize kuzindikira chinthu chirichose chabwino chomwe tiri nacho chochokera kwa Khrisitu.
7 Chikondi chako m’bale chanikondweresa na kunilimbikisa maninge, ndawa walimbikisa pomwe mitima ya wochena.
8 Olo kuti mudzina ya Khrisitu ninaufulu ukulu wa kuyankhula na wokwanisa kukuuza vochita,
9 ninkuwona kuti vingakhale bwino kuti nikukumbire mwachikondi. Inepano Paulo munthu wachikulire na womangiwa ndawa ya Yesu Khrisitu,
10 ninkukukumbira pankhani ya mwana wangu Onesimo, yemwe nakhala baba wake niri kudjeri* kuno.
11 Kalekale wenze wosathandiza kwa iwepo, koma manjeuno ni wothandiza kwa iwepo na ine.
12 Ndipo manje ninkumutumiza pomwe kwa iwepo. Iye ni munthu yemwe nimuthemba* maninge.
13 Nidakakonda kuti apitirize kukhala nane m’malo mwa iwepo, kuti apitirize kunitumikira pomwe niri kuno kudjeri ndawa ya ntontholo wabwino.
14 Koma ninkufunalini kuti nichite chinthu chomwe iwepo ulibe kunibvumiza, kuti vabwino vomwe ungachite ayi kuti uvichite mokakamizika, koma uvichite mwakufuna kwako.
15 Panango ndipomwapa adachoka kumuko kwa kanthawe kochepa kuti udzakhale naye pomwe mpakana kalekale.
16 Sikuti ukhale naye pomwe ninge kapolo basi, koma akhale pomwe m’bale wako wapamoyo yemwe inepano nimukonda maninge. Koma iwepo ufunika kumukonda kuposha pamwapa ndawa ni kapolo wako na m’bale wako mwa Ambuya.
17 Manje peno unikondadi inepano ninge munzako,* umutambire na moyo wose ninge momwe ungatambirire inepano.
18 Manje peno adakuphonyera kanthu, panango anawe chikwerete, chikwerete mwicho chikhale kwa ine.
19 Ine Paulo ninkunemba na djanja yangu pofuna kukutsimikizira kuti nidzabweze chikwerete mwicho. Ninkufunikalini kuchita kukuuza vimwevi, pale iwepo unachikweretembo kwa ine cha moyo wako.
20 Pulizi m’bale wangu, nithandizeko mwa Ambuya. Ulimbikise ntima wangu ninge munthu wotewera Khrisitu.
21 Ninkukunembera vimwevi niri wotsimikiza kuti uvichitedi. Ninkudziwa pomwe kuti uchite mpakana voposha pamwapa.
22 Ndipo ulongedzeretu muchipinda chati nidzafikiremo. Ninashuwa kuti na mapemphero yanu, nimasuliwe* kuti nidzakutumikireni.
23 Epafura yemwe niri mangiwe naye pabodzi mudjeri ndawa ya Yesu Khrisitu, ankupereka moni.
24 Maliko, Arisitako, Dema na Luka, omwe ni anyabasa anzangu ankuperekambo moni.
25 Ndawa ya makhalidwe yabwino yomwe muwonesa, kukoma ntima kukulu kwa Ambuya Yesu Khrisitu kukhale namwe.
Mawu ya m’nyantsi
^ Panango kuti: “womangiwa.”
^ Panango kuti: “nimukonda.”
^ Panango kuti: “shamwali wako.”
^ Panango kuti: “nibwere.”
