Wonembewa na Luka 1:1-80
1 Wanthu azinji ayesesa kunemba nkhani yofotokoza vochitika chaivo vomwe ise tose tivikhulupirira.
2 Ndipo iwo adanemba ndendende momwe adatiuzira wanthu kundochokera pakuyamba, enze mboni zoona na maso komasoti atumiki wa ntontholo muyo.
3 Inembo pakuti nafagafaga mosamala maninge vinthu vose mwevi kuchokera pachiyambi, natsimikiza kuti nikunembereni vose vomwe vidachitika imwepo wolemekezeka maninge a Teofilo.
4 Nachita vimwevi kuti mudziwe bwinobwino kuti vinthu vomwe adakupfunzisani na mawu ya pakamwa ni vothembeka.
5 Mu ntsiku za Herode,* mpfumu ya ku Yudeya, kwenze wantsembe munango dzina yake Zekariya wa mugulu ya antsembe ya Abiya. Nkazi wake wenze wochokera kwa wana akazi wa Aroni ndipo dzina yake yenze Elizabeti.
6 Wanthu wose awiri mwawa enze wolungama pamaso pa Mulungu ndawa ambachita vinthu mokhulupirika, mobverana na malamulo yose komasoti vomwe chilamulo cha Yahova* chifuna.
7 Koma iwo enze alibe mwana, ndawa Elizabeti ambaberekalini ndipo wose awiri enze wokalamba.
8 Pomwe Zekariya ambaphata basa ninge wantsembe pamaso pa Mulungu, kuimira gulu yake ya antsembe,
9 mobverana na vomwe wantsembe angachita nthawe zose, yenze nthawe yake yakuti akangena nyumba yopatulika ya Yahova,* akapereke ntsembe zofukiza.
10 Gulu yose ya wanthu ingapempherera panja, pa nthawe yopereka ntsembe zofukiza.
11 Mngelo wa Yahova* adawonekera kwa iye, ali imirire ku saidi yakumakulu ya guwa ya ntsembe zofukiza.
12 Koma Zekariya padaona vimwevi, adashupika muntima ndipo adachita mantha maninge.
13 Pamwapo mngelo muyo adamuuza kuti: “Ayi kuchita mantha Zekariya ndawa pemphero yako yogwigwirira yabvekadi shuwa. Nkazi wako Elizabeti adzakuberekere mwana mwamuna ndipo udzamupase dzina yakuti Yohani.
14 Udzakondwe maninge ndipo wanthu azinji adzakondwe na kubadwa kwake
15 ndawa adzakhale nkulu pamaso pa Yahova.* Koma ayi kuti adzamwe vinyu olo pang’ono panango chakumwa chirichose choledzeresa ndipo akanati wabadwa adzakhale kuti wadzadziwa kale na mzimu uchena.
16 Iye adzathandize Aizirayeli azinji kuti alape nkuyamba pomwe kubvera Yahova* Mulungu wawo.
17 Komasoti adzatsogole ninge wokonza njira wa Mulungu ali na mzimu na mphanvu ninge za Eliya. Iye adzachinje mitima ya ababa kuti ikhale ninge ya wana ndipo wanthu wosabvera adzawachinjire ku nzeru chaiyo ya wanthu olungama. Adzachite vimwevi kuti asonkhanise wanthu omwe akonzekera kutumikira Yahova.”*
18 Patsogolo pake Zekariya adabvunza mngelo muyo kuti: “Ko ningavitsimikizire tani vimwevi? Inepano ndine wokalamba ndipo nkazi wangu pomwe anamagole yazinji.”
19 Ndipo mngelo muyo adamudawira kuti: Inepano ndine Gabrieli yemwe niyimilira pamaso pa Mulungu ndipo wanituma kudzayankhula nawe komasoti kudzalengeza ntontholo wabwino muyu kwa iwepo.
20 Manje bvesera! Udzakhale bewewe, osakwanisa kuyankhula mpaka ntsiku yomwe vinthu vimwevi vidzachitike ndawa ulibe kukhulupirira mawu yangu yomwe yadzakwanirisiwe pa nthawe yake yomwe idaikhiwiratu.”
21 Pa nthawe mweyi wanthu ambapitiriza kudikhirira Zekariya ndipo adadabwa maninge ndawa yakuti adachedwa maninge m’nyumba yopatulika mwiyo.
22 Padabula, alibe kukwanisa pomwe kuyankhula nawo ndipo adazindikira kuti waona vinthu vodabwisa m’nyumba yopatulika mwiyo. Iye ambayankhula nawo na manja, ambakwanisalini pomwe kubulisa mawu.
23 Pazidamala ntsiku zake zochita utumiki wopatulika, adayenda kumuyi kwawo.
24 Pazidamala ntsiku zinganani, nkazi wake Elizabeti adakhala na mimba ndipo adakhala kwayekha kwa minyezi 5. Iye adanena kuti:
25 “Vimwevi ndivo vomwe Yahova* wanichitira ntsiku zino, iye wanikumbukira kuti achose kunyozeka kwangu pamaso pa wanthu.”
26 Elizabeti pewenze na mimba ya minyezi 6, Mulungu adatumiza mngelo Gabrieli, ku thaundi inango ya ku Galileya yochemerewa Nazareti.
27 Adamutumiza kwa namwali yemwe mwamuna munango dzina yake Yosefe, wa m’banja ya Davide, adamupolomisa kuti adzamulowole. Namwali muyo wenze na dzina yakuti Mariya.
28 Mngelo ule padafika kwa namwali muyo adanena kuti: “Uli tani iwepo wodalisiwa maninge, Yahova* ali nawe.”
29 Koma mawu mwaya yadamudabwisa maninge mwakuti adayamba kuganizira va moni wa khaindi mweyi.
30 Pamwapo mngelo muyo adamuuza kuti: “Ayi kugopa Mariya, ndawa Mulungu wakukomera ntima.
31 Manje tetekera! Udzakhale na mimba ndipo udzabereke mwana mwamuna ndipo udzamupase dzina yakuti Yesu.
32 Muyo adzakhale nkulu ndipo adzachemerewe Mwana wa Wam’dzulum’dzulu. Yahova* Mulungu adzamupase mpando wachifumu wa Davide ababa wake.
33 Iye adzatonge ninge Mpfumu pa nyumba ya Yakobo mpakana kalekale ndipo Ufumu wake udzamalelini.”
34 Koma Mariya adabvunza mngelo muyo kuti: “Manje vimwevi vidzakwanisike tani, pakuti nikalibe nagonako na mwamuna?”
35 Podawira mngelo muyo adauza Mariya kuti: “Mzimu uchena udzafike pa iwe ndipo mphanvu ya wam’dzulum’dzulu idzakufunikize. Ndipomwapa muyo wati adzabadwe adzakhale wochena, Mwana wa Mulungu.
36 Ndipo m’bale wako Elizabeti, yemwe wanthu amunena kuti nkazi yemwe aberekalini, nayembo anamimba ndipo adzabereke mwana mwamuna podiya kuti ni wokalamba, mwakuti uno ni mwezi wachi 6 alikale na mimba.
37 Vimwevi vachitika ndawa vomwe Mulungu wanena, vikangalini.”
38 Pamwapo Mariya adanena kuti: “Ndine kapolo wa Yahova!* Vomwe imwepo mwanena vichitikedi kwa inepano.” Padateno mngelo muyo adamusiya.
39 Mu ntsiku mwezo, Mariya adanyamuka kankulumize nkuyenda kudera ya mapiri, ku thaundi inango mu dziko ya dzinza ya Ayuda.
40 Kumuko adangena mu nyumba ya Zekariya nkumonisa Elizabeti.
41 Pamwapo Elizabeti padandomonisiwa na Mariya, kacheche yemwe wenze m’mimba mwake adamoga ndipo Elizabeti muyo adadzadziwa na mzimu uchena.
42 Pamwapo adakuwa mwamphanvu kuti: “Ndiwe wodalisiwa pa akazi wose ndipo chipaso cha mimba yako ni chodalisiwambo!
43 Koma vakwanisika tani kuti nikhale na mwayi muyu, kuti mayi wa Ambuya wangu abwere kwa inepano?
44 Panandokubva ukunimonisa, kacheche wamoga mokondwa m’mimba mwangu umu.
45 Ndipo ndiwe wokondwa ndawa udakhulupirira, mwakuti vose vomwe udauziwa vochokera kwa Yahova* vidzakwanirisiwe.”
46 Pamwapo Mariya adanena kuti: “Moyo wangu ukulemekeza Yahova,*
47 ndipo ntima wangu ungalekelini kudzala na chimwemwe ndawa ya Mulungu, Mpulumusi wangu,
48 ndawa waona kusauka kwa kapolo wake nkazi. Ndipo onani! kuyambira manjeuno mibadwo yose idzanichemere wokondwa.
49 Ndawa Wamphanvu muyo wanichitira vinthu vikulu ndipo dzina yake ni yochena.
50 Kumibadwomibadwo iye achitira chifundo wanthu omwe amugopa.
51 Wachita vamphanvu na djanja yake, wathamangisira kutali omwe volinga va mitima yawo vikuwonesa kuti ni wodzikuza.
52 Wanthu wamphanvu omwe ali pa mipando yachifumu wawachitisa kukhala pa malo yonyozeka ndipo wanthu wonyozeka wawakwiza.
53 Wakhutisa wanthu wanjala na vinthu vabwino koma womwe anachuma wawathamangisa chimanjamanja.
54 Iye wathandiza ntumiki wake Izirayeli pakukumbukira polomisi yake yakuti adzawonese chifundo
55 mpakana kalekale, mobverana na vomwe adauza azibereki wathu wakale Abulahamu na mbadwa zake.”
56 Mariya adakhala na Elizabeti pafupifupi minyezi itatu patsogolo pake adabwerera kwawo.
57 Manje nthawe yakuti Elizabeti abereke idakwana ndipo adabereka mwana mwamuna.
58 Wanthu omwe ambakhala naye pafupi komasoti achibale wake adabva kuti Yahova* adamuchitira chifundo chikulu ndipo adakondwa naye pabodzi.
59 Pantsiku ya 8, iwo adabwera kudzachita mdulidwe wa mwana muyo komasoti ambafuna kumupasa dzina ya ababa wake, yakuti Zekariya.
60 Koma mayi wake adadawira kuti: “Imwiyo neye! Dzina yake ikhale Yohani.”
61 Padanena mwevi, iwo adamuuza kuti: “Palibe wachibale wako aliyese yemwe adziwika na dzina mweyi.”
62 Patsogolo pake adabvunza ababa wake, dzina yomwe ambafuna kuti amupase mwana muyo pakuyankhula nawo na manja.
63 Pamwapo iye adakumbira pakuti anembepo, ndipo adanemba kuti: “Dzina yake ni Yohani.” Padaona vimwevi, wose adadabwa.
64 Nthawe mwiyo pakamwa pake padafunguka ndipo lilimi yake idamasuka mwakuti adayamba kuyankhula na kutamanda Mulungu.
65 Wanthu wose womwe angakhala mu dera mwiyo adachita mantha ndipo nkhani mweyi yenze nkamwankamwa mudera yose ya mapiri ku Yudeya.
66 Wose womwe adabva vimwevi adavisunga muntima mwawo ndipo anganena kuti: “Ko mwana moyu adzakhale wotani?” Ndawa djanja ya Yahova* yenzedi pa iye.
67 Pamwapo ababa wake Zekariya adadzadziwa na mzimu uchena ndipo adanena kuti:
68 “Atamandike Yahova* Mulungu wa Izirayeli, ndawa wakumbukira wanthu wake pakuwabweresera chipulumuso.
69 Iye wachitisa kuti awoneke mpulumusi wamphanvu m’banja ya ntumiki wake Davide,
70 mobverana na vomwe adanena pakuphatisa basa aneneri wake wochena wakalekale,
71 vakuti adzatipulumuse kwa azondi wathu komasoti m’manja mwa wose omwe atizonda.
72 Adzakwanirise vomwe adapolomisa azibereki wathu wakalekale ndipo adzawawonese chifundo. Iye adzakumbukire pangano yake yochena,
73 lumbiro yomwe adalumbira kwa m’bereki wathu Abulahamu,
74 kuti patsogolo populumusiwa m’manja mwa azondi, atipase mwayi wochita utumiki wopatulika kwa iye tiribe mantha,
75 mokhulupirika komasoti mwachilungamo pamaso pake mu ntsiku zathu zose.
76 Koma kunena va mwana mng’ono iwe, udzachemerewe mneneri wa Wam’dzulum’dzulu ndawa udzatsogole pamaso pa Yahova* kuti ukakonze njira zake.
77 Kuti ukathandize wanthu wake kudziwa va chipulumuso chomwe chidzakwanisike machimo yawo yakadzakhululukiriwa,
78 ndawa ya chifundo chikulu cha Mulungu wathu. Na chifundo chimwechi, kugwerewera kwa machibese kudzatifikire kuchokera kudzulu,
79 ndipo kudzavunikire omwe akukhala mumdima komasoti mu mthunzi wa impfa na kutsogolera mapazi yathu pa njira ya ntendere.”
80 Pamwapo, mwana ule adakula ndipo adalimba mwauzimu. Iye adapitiriza kukhala muchipululu mpakana ntsiku yomwe adadziwonesera pachena kwa Aizirayeli.
Mawu ya m’nyantsi
^ Onani matanthauzo ya mawu yanango.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
