Wonembewa na Luka 10:1-42
10 Mwevi pavidachitika, Ambuya adasankhula wanthu anango 70 nkuwatumiza awiriawiri kuti atsogole nkuyenda mu thaundi na malo yaliyose yomwe iye ambafuna kudzayendako.
2 Patsogolo pake adawauza kuti: “Shuwadi, pali vinthu vizinji vofunika kukolola, koma anyabasa ni ang’onong’ono. Ndipomwapa kumbirani Munikachiro wa munda kuti atumize anyabasa kuti akakolole.
3 Yendani! Inepano ninkukutumizani ninge nkhosa pakati pa mphumphi.
4 Ayi kutakula kachikwama ka kobiri, kachola ka chakudya, panango ntsapato, ndipo ayi kumbamonisa* munthu aliyese panjira.
5 Mukafika panyumba, mumbayambe mwawauza kuti: ‘Ntendere ukhale panyumba pano.’
6 Ndipo peno pali munthu wokonda ntendere, ntendere wanu udzakhale pa iye. Koma peno palibe, udzabwerere kwa imwepo.
7 Pamwapo mumbakhale panyumba mwiyo ndipo mumbadye na kumwa vomwe angakupaseni, ndawa nyabasa afunika kutambira malipiro yake. Ayi kumbachoka komwe mwafikira nkumbayenda kunyumba zinango.
8 “Komasoti mukangena mu thaundi yomwe iwo akutambirani, mumbadye vomwe akukonzerani,
9 mumbapolese pomwe wodwala omwe ali mumo ndipo mumbawauze kuti: ‘Ufumu wa Mulungu wakufendererani.’
10 Koma mukangena mu thaundi yomwe alibe kukutambirani bwino, mumbachokemo nkuyenda m’misewu yawo nkunena kuti:
11 ‘Tinkukukunkhumulirani olo pfumbi ya muthaundi yanu ino yomwe yalamatira kumapazi yathu. Koma dziwani kuti Ufumu wa Mulungu wafendera.’
12 Ninkukuuzani, kuti chilango cha thaundi mwiyo chidzakhale chowawa maninge pa ntsiku mwiyo kuposha cha Sodomu.
13 “Tsoka kwa iwepo Korazini! Tsoka kwa iwepo Betsaida! Ndawa basa zamphanvu zomwe zidachitika mwa iwepo sembe zidachitikira ku Turo na ku Sidoni, wanthu adakalapa kalekale nkuvala masakha na kukhala padotha.
14 Ndipomwapa, chilango chanu pa chiweruzo chidzakhale chowawa maninge kuposha cha Turo na Sidoni.
15 Iwembo Kaperenao, ko panango udzakwiziwe kudzulu? Neye, koma udzapolikire ku Manda.*
16 “Omwe akukubverani, akubvera pomwe ine. Omwe akukunyalanyazani, akunyalanyaza pomwe ine ndipo omwe anyalanyaza inepano, akunyalanyaza pomwe Mulungu yemwe adanituma.”
17 Patsogolo pake wanthu wokwana 70 wale adabwerera ali wokondwa ndipo adauza Yesu kuti: “Ambuya, olo viwanda vimbatigonjera tikaphatisa basa dzina yanu.”
18 Padabva vimwevi iye adawauza kuti: “Nayamba kuwona Satana wagwa kale ninge momwe kaphaliwali kachitira kuchokera kudzulu.
19 Onani! Ine nakupasani ulamuliro kuti mumbakwanise kupondaponda nyoka na vakalize.* Komasoti nakupasani ulamuliro kuti mugonjese mphanvu zose za mzondi, ndipo palibe chomwe chidzakudzongeni.
20 Koma osati mukondwe ndawa yakuti mizimu yakugonjerani, koma kondwani ndawa madzina yanu yanembewa kudzulu.”
21 Panthawe mwiyo nzimu uchena udachitisa kuti Yesu akondwe maninge nkunena kuti: “Ninkukutamandani imwepo Ababa pamaso pa wose, Ambuya wakudzulu na dziko yapasi, ndawa wanthu wanzeru na wozindikira mwawabisira mosamala vinthu vimwevi ndipo mwaviulula kwa wana ang’ono. Inde Ababa, ndawa imwepo mudabvumiza kuti vimwevi vichitike.
22 Ababa wangu apereka vinthu vose kwa ine, ndipo palibe yemwe ankumudziwa bwino Mwana koma Ababa wokha. Komasoti palibe yemwe ankuwadziwa bwino Ababa koma Mwana yekha na aliyese yemwe Mwana muyo wafuna kumuululira va Ababa mwawo.”
23 Manje Yesu na wopfunzira wake mwawo ali kwaokha, adawauza kuti: “Wanthu womwe ankuwona vomwe imwepo munkuwona ivi ni wokondwa.
24 Shuwa ninkukuuzani, aneneri azinji na mafumu enze na shungu yakuti awone vinthu vomwe mukuviona ivi koma alibe kuviwona, komasoti kuti abve vomwe imwepo munkubva koma alibe kuvibva.”
25 Pamwapo munthu munango wodziwa Chilamulo adaimirira kuti amuyese ndipo adamubvunza kuti: “Mpfunzisi, nimbachite chani kuti nidzagumane moyo wosapera?”
26 Yesu adamubvunza kuti: “Ko mu Chilamulo adanembamo chani? Uwerengamo chani?”
27 Iye adadawira kuti: “‘Mumbakonde Yahova* Mulungu wanu na ntima wanu wose, moyo wanu wose, mphanvu zanu zose na maganizo yanu yose. Komasoti ‘umbakonde munzako ninge momwe udzikondera wekha.’”
28 Yesu adamuuza kuti: “Wadawira bwino. Umbachite vimwevo ndipo udzagumane moyo.”
29 Koma pakufuna kudziwonesera kuti ni wolungama, munthu muyo adabvunza Yesu kuti: “Manje munzangu yemwe ninkufunika kumukonda ni mbani makamaka?”
30 Yesu pakudawira adanena kuti: “Munthu munango wenze pa ulendo kuchokera ku Yerusalemu nkuyenda ku Yeriko ndipo adagumana na vigananga vomwe vidamuvula nkumumenya maninge. Patsogolo pake, vidachoka nkumusiya wakomoka.
31 Manje vidandochitika kuti wantsembe munango ambagwata mu nsewu muyo, koma padamuwona, adandomulambalala.*
32 Mulevi adachitambo chibodzibodzi, padafika pa malo mwapo nkumuwona, adandomulambalala.*
33 Koma padafika Msamariya munango yemwe ambagwatambo mu nsewu muyo. Ndipo padamuwona, adabva ntsisi.
34 Pamwapo adafika pomwe penze munthu muyo ndipo adathira mafuta na vinyu pa vilonda vake ndipo adavimanga. Patsogolo pake adamukwiza pa bulu wake nkuyenda naye kunyumba ya alendo ndipo kumuko adamusamalira.
35 Mangwana yake adachosa kobiri yokwana madinari yawiri nkupereka kwa munikachiro wa nyumba ya alendo ule ndipo adamuuza kuti: ‘Musamalireni bwino, mukadzonga kobiri zinango kuingizira pa zomwe nakupasani, nidzakubwezereni nikadzabwera.’
36 Manje ni mbani pa wanthu atatu mwawa yemwe iwepo unkuwona kuti adakonda munthu muyu yemwe adagumana na vigananga?”
37 Iye adadawira kuti: “Ni ule yemwe adamuchitira chifundo.” Manje Yesu adamuuza kuti: “Yenda, ndipo iwepo umbakachitembo vimwevo.”
38 Pamwapo iwo adapitiriza ulendo wawo ndipo adangena m’muyi unango. Kumuko mayi munango dzina yake Malita adamutambira m’nyumba mwake ninge mulendo.
39 Iye wenze na m’bale wake dzina yake Mariya, yemwe adakhala pasi pafupi na Ambuya nkumbabvesera vomwe anganena.*
40 Koma Malita adatangwanika na basa zizinji. Pamwapo adafika kwa Yesu nkunena kuti: “Ambuya, ko munkuikhiralini nzeru kuti m’bale wangu muyu wanilekerera kuphata nekha basa? Muuzeni kuti abwere adzanithandize.”
41 Ambuya pakudawira adamuuza kuti: “Malita, Malita, iwepo unankhawa ndipo ukutangwanika na vinthu vizinji.
42 Koma vinthu vofunika maninge ni ving’onong’ono, panango ni chibodzi chokha basi. Kumbali yake, Mariya wasankhula chinthu chabwino maninge, ndipo adzatengerewelini chinthu chimwechi.”
Mawu ya m’nyantsi
^ Panango kuti: “kukumbatirana pakupasana moni.”
^ Panango kuti: “Hade. Mwaya ni manda ya wanthu wose.”
^ Panango kuti: “vinkhanira.”
^ Onani matanthauzo ya mawu yanango.
^ Panango kuti: “adamupitirira.”
^ Panango kuti: “adamupitirira.”
^ Panango kuti: “mawu yake.”
