Wonembewa na Luka 11:1-54
11 Manje Yesu angapemphera pamalo yanango. Padamaliza, m’bodzi wa wopfunzira wake adamuuza kuti: “Ambuya, tipfunziseni kupemphera ninge momwe Yohani adapfunzisira wopfunzira wake.”
2 Pamwapo iye adawauza kuti: “Mukambapemphera mumbanene kuti: ‘Ababa, dzina yanu ichenesewe.* Ufumu wanu ubwere.
3 Mutipase chakudya cha lero mobverana na chakudya chofunika pa ntsiku mwaino.
4 Ndipo mutikhululukire machimo yathu, ndawa isembo tikhululukira aliyese yemwe atiphonyera. Ndipo tithandizeni kuti osati tigonje tikambayesewa.’”
5 Pamwapo adawauza kuti: “Tilinganize kuti m’bodzi wa imwepo anamunzake ndipo wayenda kwa munzake muyo pakati pa usiku kukamukumbira kuti: ‘Shamwali, nikumbizeko mikate yatatu,
6 ndawa munzangu munango wandofika manjemanje kuchokera pa ulendo ndipo palibe chati nimupase.’
7 Koma munzake yemwe ali m’nyumba mumo n’kumudawira kuti: ‘Ayi kunishupa ine. Takhiya kale nsuwo, ndipo inepano na wana wangu tagona kale. Ningakwaniselini kumuka kuti nikupase chinthu.’
8 Shuwa ninkukuuzani, adzamuke n’kumupasa chirichose chomwe akufuna, osati ndawa yakuti ni munzake, koma ndawa yakuti wangingimira maninge.
9 Ndipomwapa ninkukuuzani, pitirizani kukumbira ndipo adzakupaseni. Pitirizani kufagafaga ndipo mudzagumane. Pitirizani kugogodza ndipo adzakufungulireni.
10 Ndawa aliyese wokumbira atambira, aliyese wofagafaga agumana ndipo aliyese wogogodza adzamufungulire.
11 Ko pakati panu alipo baba yemwe mwana wake achimukumbira ntsomba, angamupase nyoka m’malo mwa ntsomba?
12 Panango achimukumbira dzayi, ko angamupase chikalize?*
13 Manje peno imwepo mudziwa kupereka vinthu vabwino kwa wana wanu, podiya kuti ndimwe woipa, kuli tani Ababa wanu wa kudzulu? Shuwadi iye adzapereke mzimu uchena kwa omwe amukumbira.”
14 Patsogolo pake adabulisa chiwanda mwa munthu chomwe chimbamukangisa kuyankhula. Chiwanda mwicho pachidabula, munthu wosayankhula ule adayankhula ndipo gulu ya wanthu idadabwa maninge.
15 Koma anango pa wanthu mwawa ambanena kuti: “Muyu abulisa viwanda na mphanvu ya Belezebule,* nkulu wa viwanda.”
16 Koma anango pofuna kumuyesa adayamba kumuchichimiza kuti awaonese chizindikiro chochokera kudzulu.
17 Padadziwa maganizo yawo, iye adawauza kuti: “Ufumu uliwose wogawikana umala ndipo nyumba yogawikana ikugwa.
18 Molingana na vimwevi, peno Satana nayembo wagawikana, ko ufumu wake ungapitirize tani kukhalapo? Ndawa imwepo mukunena kuti nibulisa viwanda na mphanvu ya Belezebule.
19 Peno inepano nibulisa viwanda na mphanvu ya Belezebule, ko ateweri wanu abulisa na mphanvu za mbani? Ndipomwapa ateweri wanu mwawo adzakuweruzeni kuti ndimwe wophonya.
20 Koma peno inepano nibulisa viwanda na chala* cha Mulungu, ndiye kuti Ufumu wa Mulungu wakufikirani modzidzimusa.
21 Munthu wamphanvu yemwe anavitsulo vokwana, akambadikhirira nyumba yake, chuma chake chitetezeka.
22 Koma munango wamphanvu kuposha iye akabwera nkumugonjesa, amutengera vitsulo vake vose vomwe iye avithemba, ndipo katundu yemwe wamutengera, amupereka kwa anango.
23 Aliyese yemwe alilini ku saidi yangu ankutsutsana nane, ndipo yemwe aphatalini basa younganidza wanthu pabodzi na inepano awamwaza.
24 “Mzimu wonyantsa ukabula mwa munthu, uyenda m’malo yalibe madzi kukafagafaga malo yokhala, koma yakaleka kugumanika, unena kuti: ‘Nibwerere kunyumba yangu yanidabula ire.’
25 Manje ukafika ugumana kuti ni mopsairiwa bwino na mokhuzisiwa.
26 Ukateno uyenda kukatenga mizimu yanango 7 yoipa maninge kuposha muyo ndipo yakangena nkati mumo, yakhala mumo. Manje vimwevi vichitisa kuti vochita va munthu muyo vikhale voipa maninge kuposha pakuyamba.”
27 Adakali kuyankhula vimwevi, mayi munango m’gulu ya wanthu mwawo adakuwa nkumuuza kuti: “Wokondwa ni mayi yemwe mimba yake idanyamula imwepo komasoti yemwe mudayamwa masuku yake!”
28 Koma iye adanena kuti: “Neye, koma wokondwa, ni wanthu womwe akubva mawu ya Mulungu na kuyaphatisa basa!”
29 Pomwe gulu ya wanthu mwiyo ingawandirawandira, iye adayamba kunena kuti: “M’badwo uyu ni m’badwo woipa, unkufuna chizindikiro. Koma udzawonesewelini chizindikiro chilichose kupatulapo chizindikiro cha Yona chokha.
30 Ninge mwevenzere kuti Yona yemwe adakhala chizindikiro kwa wanthu wa ku Nineve, Mwana wa munthu adzakhalembo chizindikiro ku m’badwo muyu.
31 Mpfumukazi ya ku sul idzamukisiwe pabodzi na m’badwo muyu ndipo idzautsutse, ndawa mpfumukazi mweyi idabwera kuchokera kumalekedzero ya dziko yapasi kudzabva nzeru za Solomo. Koma manje, munango woposha Solomo ali pano.
32 Wanthu wa ku Nineve adzamuke pa Ntsiku ya Chiweruzo pabodzi na m’badwo uyu ndipo adzautsutse, ndawa iwo adalapa padabva ulaliki wa Yona. Koma manje munango woposha Yona ali pano.
33 Munthu akagasa kandyero auikhalini pa malo yobisika panango kuugwanankhira na dengu, koma auyikha pa choikhapo kandyero kuti yemwe akungena awone kugwerewera.
34 Luju ya thupi ni diso yako. Peno diso yako inkunyang’ana pa chinthu chibodzi, thupi yako yose idzakhalembo yogaka maninge. Koma peno ni ya dyera, thupi yako yose idzachitembo mdima.
35 Ndipomwapa khala tcheru kuti kugaka komwe uli nako osati kukhale mdima.
36 Manje peno diso yako ni yogaka maninge, palibe mbali inango ya mdima, thupi yose idzagake maninge ninge momwe kandyero anchitira pakukuvunikira na kugaka kwake.”
37 Padayankhula vimwevi, Mfalisi munango adamukumbira kuti akadye naye. Pamwapo iye adayenda ndipo adadya chakudya.
38 Koma Mfalisi muyo adadabwa padawona kuti akudya chakudya mwicho akanati kusamba.*
39 Pamwapo Ambuya adamuuza kuti: “Imwepo Afalisi muli ninge khapu na mbale* vomwe vatsukiwa kunja kokha koma nkati mwake ni mopsyipa. Nkati mwa mitima yanu mwadzala dyera na vinthu voipa.
40 Wanthu alibe nzeru imwe! Ko yemwe adakonza kunja ndiyelini pomwe adakonza nkati?
41 Koma imwepo mukambapasa vinthu wanthu wosauka mumbapereke vinthu mwivo na moyo wose, mukateno mudzakhale pomwe wochena pa mbali zinango zose.
42 Tsoka kwa imwepo Afalisi, ndawa mupereka chakhumi cha tumbewu twa minti na twa luwe komasoti chakhumi cha mbewu za kudimba za khaindi iriyose. Koma munyalanyaza chilungamo na chikondi cha Mulungu! Wenze udindo wanu kuchita vinthu vimwevi, koma mumbafunikalini kunyalanyaza vinthu vinango ivo.
43 Tsoka kwa imwepo Afalisi, ndawa mukonda mipando yakutsogolo* m’masunagoge na kupasiwa moni m’mabazali!
44 Tsoka kwa imwepo, ndawa muli ninge manda* yomwe yankuwonekalini bwinobwino, mwakuti wanthu afamba padzulu pake koma osadziwa!”
45 Pakudawira, m’bodzi pa wanthu wodziwa Chilamulo adamuuza kuti: “Mpfunzisi, vomwe munkunena ivi munkunyoza na ise kubodzi.”
46 Pamwapo iye adati: “Tsoka kwa imwepo wodziwa Chilamulo, ndawa mutakulisa wanthu ntolo woshupa kutakula, koma imwepo mukwanisalini kugumirira ntolo muyo olo na chala chanu!
47 Tsoka kwa imwepo, ndawa mumanga manda* ya aneneri, koma azibereki wanu ndiwo omwe adawapha!
48 Mosakaikira, ndimwe mboni pa vomwe azibereki wanu adachita. Ndipo munkubverana na vomwe iwo adachita, ndawa iwo adapha aneneri, basi imwepo nkumbamanga manda yawo.
49 Ndipomwapa nzeru ya Mulungu idanena pomwe kuti: ‘Nidzawatumizire aneneri na atumi, koma iwo adzaphe na kudzudza anango pa wanthu mwawa.
50 Manje m’badwo muyu udzakhale na mulandu wa magazi ya aneneri, yomwe yadakhesewa kuyambira pomwe dziko idakhazikika.
51 Kuyambira magazi ya Abele mpakana magazi ya Zekariya, yemwe adaphewa pakati pa guwa ya ntsembe na nyumba yopatulika.’ Shuwa ninkukuuzani, m’badwo muyu udzadawire mulandu wa magazi mwayo.
52 “Tsoka kwa imwepo wodziwa Chilamulo, ndawa mutengera wanthu khiyi yowathandiza kudziwa vinthu. Imwepo mulibe kungenamo, ndipo wanthu womwe akufuna kungenamo mukuwatchingiriza!”
53 Manje padachoka kumuko, alembi na Afalisi adayamba kumupanikiza maninge achimbamubvunza mibvunzo yazinji,
54 ndipo iwo ambandofuna kuti amutape nkamwa pa mawu yati ayankhule.
Mawu ya m’nyantsi
^ Panango kuti: “imbawonewe yopatulika; imbawonewe yochena.”
^ Panango kuti: “chinkhanira.”
^ Belezebule ni dzina inango ya Satana.
^ Panango kuti: “chikumo.”
^ Kumoku ni kusamba m’manja mobverana na miyambo yawo.
^ Panango kuti: “puleti.”
^ Panango kuti: “yabwino.”
^ Panango kuti: “manda yachikumbuso.”
^ Panango kuti: “manda yachikumbuso.”
