Wonembewa na Luka 12:1-59
-
Chofufumisa cha Afalisi (1-3)
-
Mbagopani Mulungu, osati wanthu (4-7)
-
Kubvuma Khrisitu (8-12)
-
Chitsanzo cha munthu wolemera yemwe alibe nzeru (13-21)
-
Lekani kukhala na nkhawa (22-34)
-
Kagulu kang’ono ka nkhosa (32)
-
-
Kukhala maso (35-40)
-
Mtumiki wonyang’anira nyumba wokhulupirika na mtumiki wonyang’anira nyumba wosakhulupirika (41-48)
-
Nilibe kubweresa ntendere, koma kudzagawanisa wanthu (49-53)
-
Kufunika kozindikira tanthauzo ya nthawe (54-56)
-
Kukambirana mukaphonyerana (57-59)
12 Pa nthawe mwiyi, chigulu cha wanthu azinji maninge chidasonkhana, mwakuti ambapondanapondana. Pamwapo Yesu adayamba kuyankhula na wopfunzira wake kuti: “Samalani na vofufumisa va Afalisi, vomwe ni kusowa chilungamo.
2 Koma palibe chomwe chabisiwa mwachintsintsi maninge chomwe chidzaululikelini komasoti palibe chintsintsi chomwe chidzadziwikelini.
3 Ndipomwapa chilichose chomwe munena mumdima chidzabveke pachena ndipo vomwe muwerewesana pamwekha m’vipinda vanu vidzalalikiriwe padenga.
4 Komasoti ninkukuuzani azishamwali wangu, ayi kumbagopa omwe akupha thupi yokha, omwe angakwaniselini kuchita voposha pamwapa.
5 Koma nikuuzeni wati mumbagope: Mumbagope ule yemwe achita kuti akapha, akhala pomwe na mphanvu zothusa munthu mu Gehena.* Shuwa ninkukuuzani, mumbagope Moyu.
6 Mpheta 5 azigulisa na kobiri ziwiri zochepa mphanvu, ntenolini? Koma palibe olo ibodzi pa mbalani mwezi yomwe Mulungu aiyebwa.
7 Ndipo olo tsitsi yose ya munsolo mwanu aiwerenga. Ayi kuchita mantha, ndimwe wofunika maninge kuposha mpheta zizinji.
8 Ninkukuuzani kuti, aliyese yemwe ankubvuma pamaso pa wanthu kuti ni wopfunzira wangu, Mwana wa munthu adzamubvumembo pamaso pa angelo wa Mulungu kuti ni wopfunzira wake.
9 Koma aliyese yemwe adzanilambe pamaso pa wanthu, adzalambiwe pamaso pa angelo wa Mulungu.
10 Ndipo aliyese yemwe wanena mawu yonyoza Mwana wa munthu, adzakhululukiriwe. Koma aliyese yemwe wanyoza mzimu uchena adzakhululukiriwelini.
11 Akayenda namwe kumalo yotongera milandu, kwa akuluakulu wa boma na kwa olamulira, ayi kukhala na mantha kuti mukadziteteze tani panango mukanene chani,
12 ndawa mzimu uchena udzakupfunziseni pa nthawe mwiyoletu vomwe mufunika kunena.”
13 Pamwapo munthu munango pa gulu mwiyo adauza Yesu kuti: “Mpfunzisi, mumuuze m’bale wangu kuti anigawireko chuma cha banja.”
14 Iye adamuuza kuti: “Iwe munthu iwe, ni mbani yemwe adanisankhula kuti nikhale woweruza wanu panango wogawa chuma chanu?”
15 Patsogolo pake adauza wanthu mwawo kuti: “Khalani maso ndipo chenjerani na dyera ya khaindi iriyose, ndawa podiya munthu akhale na vizinji tani, moyo wake uchokeralini pa vinthu vomwe anavo.”
16 Padateno adawauza chitsanzo chakuti: “Mbewu za m’munda wa munthu munango wachuma zidabereka bwino.
17 Pamwapo adayamba kudzibvunza kuti: ‘Manje nichite tani pamwapa, pakuti nilibe mosungira mbewu zangu zati nikolole?’
18 Iye adanena kuti: ‘Nichite tene: Nigwese nyumba zangu zosungiramo vinthu n’kumanga zikuluzikulu, ndipo tirigu wangu wose na vinthu vangu vose nidzavitutire mumo,
19 basi nidzadziuze kuti: “Unavinthu vizinji vabwino ndipo visungike kwa magole yazinji. Ntima pasi, udye, umwe na kukondwa.”’
20 Koma Mulungu adamuuza kuti: ‘Munthu ulibe nzeru iwe, usiku mwauno moyo wako aufune. Manje vinthu vomwe wavisunga ivi vidzakhale va mbani?’
21 Umu ni momwe vikhalira na munthu yemwe wadziunjikira chuma, koma ni wosalemera kwa Mulungu.”
22 Pamwapo adauza wopfunzira wake kuti: “Ndipomwapa ninkukuuzani kuti, lekani kukhala na nkhawa pa moyo wanu kuti mudzadye chani panango kukhala na nkhawa na mathupi yanu kuti mudzavale chani.
23 Ndawa moyo ni wofunika maninge kuposha chakudya ndipo thupi ni yofunika maninge kuposha chovala.
24 Ganizirani va akhwangwala:* Iwo awazalini mbewu panango kukolola. Alibe nkhokwe panango nyumba yosungiramo vinthu, koma Mulungu awadyesa. Ko imwepo ndimwelini wofunika maninge kuposha mbalani?
25 Ni mbani pa imwepo yemwe angatalimphiseko moyo wake pang’ono pokha ndawa yokhala na nkhawa?
26 Manje peno imwepo mungakwaniselini kuchita vimwevi, ndawa chani mukhala na nkhawa na vinthu vinango ivo?
27 Ganizirani momwe mafololi yakulira: Iyo yaphatalini basa panango kusona vovala. Koma ninkukuuzani kuti olo Solomo mu ulemerero wake wose alibe kuvalako vokhuza ninge iriyose pa mafololi mwaya.
28 Manje peno Mulungu avazika tene vomera vakuthengo, vomwe vindokhalako lero yokha mangwana nkuvisonkhera pa moto, kuli tani imwepo, wa chikhulupiriro chochepa imwe! Shuwadi, iye adzakuvazikeni kuposha pamwapo.
29 Ndipomwapa lekani kukhala na nkhawa kuti mudzadye chani komasoti kuti mudzamwe chani ndipo lekani kushupika muntima.
30 Ndawa vose vimwevi ni vinthu vomwe wanthu wamakhaindi yanango mu dziko iyi avifagafaga mwakhama. Koma Ababa wanu adziwa kuti imwepo mufunikira vinthu vose vimwevi.
31 Koma nthawe zose mumbaikhe Ufumu pamalo yoyamba pa moyo wanu, ndipo iye adzakupaseni vinthu vinango vose ivi.
32 Ayi kugopa kagulu ka nkhosa imwe, ndawa Ababa wanu abvumiza kukupasani Ufumu.
33 Gulisani vinthu vanu n’kupereka mphaso kwa wanthu wosauka. Konzani vikwama vakobiri vomwe vingamalelini, kutanthauza chuma chosamala kudzulu, komwe mbava zingafikekolini ndipo michenje yangadzongelini.
34 Ndawa komwe kuli chuma chanu, mitima yanumbo yadzakhale kumuko.
35 Valani ndipo mukhale wokonzeka. Makandyero yanu yakhale yogaka
36 ndipo mukhale ninge wanthu womwe ankudikhirira kuti bwana wawo abwere kuchokera ku ukwati, kuti akafika nkugogodza amufungulire mwakankulumize.
37 Wokondwa ni akapolo omwe bwana wawo pobwera adzawagumane ankudikhira! Shuwa ninkuuzani, iye adzavale chovala kuti aphate basa ndipo adzawakhazike pa meza kuti adye chakudya nkumbawatumikira.
38 Iwo adzakhale wokondwa peno ankupitiriza kudikhira podiya afike usiku* panango madandakucha.*
39 Koma dziwani kuti, peno munichiro wa nyumba angadziwe nthawe yomwe mbava ingabwere, angalekererelini kuti iyo ithyole nkungena m’nyumba mwake.
40 Imwembo khalani wokonzeka, ndawa Mwana wa munthu adzafike pa nthawe yomwe munkuiganiziralini.”
41 Patsogolo pake Petulo adabvunza kuti: “Ambuya, ko chitsanzo mwechi munkuuza isepano tekha panango munkuuza pomwe aliyese?”
42 Pamwapo Ambuya adanena kuti: “Ni mbani makamaka yemwe ni mtumiki wonyang’anira nyumba wokhulupirika na wanzeru, yemwe bwana wake adzamuikhe kuti ambanyang’anire gulu ya atumiki wake, kuti ambawapase chakudya chokwana pa nthawe yake?
43 Kapolo muyo adzakhale wokondwa, peno bwana wake pakubwera adzamugumane akuchita vimwevo!
44 Shuwa ninkukuuzani, adzamuikhe kuti ambanyang’anire vinthu vake vose.
45 Koma peno kapolo muyo anganene mumtima mwake kuti: ‘Bwana wangu ankuchedwa kubwera.’ Basi nkuyamba kumenya anyabasa anzake wachimuna na wachikazi komasoti kudya, kumwa na kuledzera,
46 bwana wa kapolo muyo adzabwere pa ntsiku yomwe ankuidikhiralini na pa nthawe yomwe iye ankuidziwalini, ndipo adzamulange maninge nkumuthusa komwe kuna wanthu wosakhulupirika.
47 Manje kapolo muyu, yemwe adadziwa vomwe bwana wake ankufuna koma osakonzekera kubwera kwawo panango kuchita vadamuuza, adzamukwapule maninge.
48 Koma yemwe alibe kudziwa ndipo wachita vinthu vofunika kukwapuliwa navo, adzakwapuliwe pang’ono. Shuwadi, aliyese yemwe adapasiwa vinthu vizinji, vizinji pomwe vidzafuniwe kwa iye. Ndipo aliyese yemwe adaikhiwa kuti ambanyang’anire vinthu vizinji, wanthu adzafune pomwe vinthu vizinji kwa iye.
49 Nidabwera kudzagasa moto padziko yapasi, manje peno moto muyo wagaka kale, ningafune pomwe chani?
50 Shuwadi pali ubatizo womwe ninkufunika kubatiziwa, ndipo ninkushupika maninge muntima mpakana nthawe yomwe udzamale!
51 Ko munkuganiza kuti nidabwera padziko yapasi kudzakhazikisa ntendere? Ayi shuwa, koma nidabwera kudzagawanisa wanthu.
52 Ndawa kuyambira manjeuno kuyenda m’tsogolo, m’nyumba ibodzi mudzakhale wanthu 5 wosabverana, atatu kutsutsana na awiri, awiri kutsutsana na atatu.
53 Iwo adzagawikane, baba kutsutsana na mwana wake wachimuna ndipo mwana wachimuna kutsutsana na ababa wake. Mayi kutsutsana na mwana wake wachikazi ndipo mwana wachikazi kutsutsana na mayi wake. Mpongozi kutsutsana na nkazi wa mwana wake ndipo nkazi wolowodwa kutsutsana na apongozi wake wachikazi.”
54 Patsogolo pake adauza pomwe gulu ya wanthu mwiyo kuti: “Mukaona ntambo unkukwera chakumaulo, nthawi mwiyoletu munena kuti: ‘Kunkubwera chinvula,’ ndipo chibweradi.
55 Ndipo mukaona mphepo yaku sul inkukuntha, munena kuti: ‘Lero kutenthe maninge,’ ndipo vichitikadi.
56 Wanthu woipa imwe! Mukwanisa kuzindikira maonekedwe ya dziko yapasi na kudedza.* Manje munkukangira tani kuzindikira tanthauzo ya vomwe vinkuchitika pa nthawi ino?
57 Ndawa chani pamwekha mukwanisalini kuzindikira vinthu vomwe ni volungama?
58 Mwakulinganiza, ukambayenda kwa wolamulira na munthu yemwe unaye mulandu, uli munjira umbayesese kuchitapo kanthu kuti umalise mulandu muyo. Umbachite vimwevi kuti osati akuyendese kwa oweruza, oweruza muyo nkukuyendesa kwa nsocha wa ku tiribunali, nsocha muyo nkukufungira mu djeri.
59 Shuwa nikukuuza, udzabulemolini mpakana ulipire kakobiri komalizira kochepa mphamvu maninge.”
Mawu ya m’nyantsi
^ Onani matanthauzo ya mawu yanango.
^ Panango kuti: “akwalala.”
^ Kuchokera 21 ora mpakana pakati pa usiku.
^ Kuchokera pakati pa usiku mpakana 3:00 ora.
^ Panango kuti: “kudzulu.”
