Wonembewa na Luka 13:1-35
-
Kulapa panango kudzongewa (1-5)
-
Chitsanzo cha muti wa nkuyu wosabala vipaso (6-9)
-
Nkazi wobenda nsana adapolesewa pa Satade (10-17)
-
Chitsanzo cha kantsere ka mpiru na vofufumisa (18-21)
-
Khama yomwe tifunika kuchita kuti tingene pansuwo wopanikiza (22-30)
-
Adati Herode “ni nkhandwe” (31-33)
-
Yesu adalilira Yerusalemu (34, 35)
13 Pa nthawe mwiyo, wanthu anango omwe enze pamwapo adawafotokozera va wanthu wa ku Galileya omwe magazi yawo, Pilato adayasanganisa na ntsembe zawo.
2 Iye adawadawira kuti: “Ko mukuganiza kuti wanthu mwawa wa ku Galileya enze wochimwa maninge kuposha anango wa ku Galileya wose ndawa yakuti vimwevi vidawachitikira?
3 Neye shuwa. Ndipomwapa ninkukuuzani kuti peno mulapelini, mose imwe mudzadzongewe molingana na iwo.
4 Manje tani kwa wanthu 18 wale womwe nyumba idawagwera ku Siloamu nkuwapha? Ko mukuganiza kuti enze wochimwa maninge kuposha wanthu wose omwe ankukhala mu Yerusalemu?
5 Neye shuwa. Ndipomwapa ninkukuuzani kuti, peno mulapelini, mose imwe mudzadzongewe ninge momwe iwo adadzongerewa.”
6 Pamwapo adayamba kufotokoza chitsanzo ichi: “Munthu munango wenze na muti wa nkuyu m’munda wake wa uva, ndipo adayenda kukafaga chipaso m’muti muyo, koma alibe kugumanamo chirichose.
7 Pamwapo adauza munthu wosamalira munda wa uva ule kuti: ‘Kwa magole yatatu nakhala ninkubwera kudzafaga nkhuyu m’muti muyu, koma niribe kugumanamo olo ibodzi. Ugwateni muti moyu! Ndawa chani ukundodzonga ndovole?’
8 Wosamalira munda muyo adadawira kuti: ‘Abwana, tani mundomusiya gole ino yokha. Inepano nikumbe kuzungulira muti muyu nkuyikha manyowa.
9 Ukadzabala vipaso kutsogolo, vidzakhale bwino, koma peno udzaberekelini mudzaugwate.’”
10 Manje ambapfunzisa mu sunagoge pa Satade.
11 Mumo mwenze mayi munango yemwe mzimu woipa udamudwalisa kwa magole 18. Iye wenze wobenda nsana mwakuti ambakwanisalini kuweramuka.
12 Yesu padamuwona, adayankhula naye nkumuuza kuti: “Mayi, mwamasuka ku matenda yanu.”
13 Pamwapo adamuphata mayi muyo, ndipo nthawe mwiyoletu adaweramuka nkuyamba kutamanda Mulungu.
14 Koma atsogoleri wa sunagoge padawona vimwevi, adakalipa ndawa Yesu adapolesa munthu pa Satade. Pamwapo adauza gulu ya wanthu kuti: “Pali ntsiku 6 zomwe tifunika kuphata basa. Mumbabwere mu ntsiku mwizo kudzapolesewa, osati ntsiku ya Satade.”
15 Koma Ambuya adamudawira kuti: “Wanthu woipa imwe, ko aliyese wa imwepo, amasulalini ng’ombe yake na bulu wake m’khola pa ntsiku ya Satade nkuyenda naye kukamumwesa madzi?
16 Ko venzelini vofunika kuti mayi muyu, yemwe ni mwanambo wa Abulahamu, yemwe Satana adamumanga kwa magole 18, amasuliwe matcheni mwaya ntsiku ya Satade?”
17 Padachita vimwevi, wanthu wose womwe ambamutsutsa adachita manyazi. Koma gulu yose ya wanthu idayamba kukondwa ndawa ya vodabwisa vose vomwe iye adachita.
18 Pamwapo adapitiriza kunena kuti: “Ko Ufumu wa Mulungu uli ninge chani, manje ningaulinganize na chani?
19 Uli ninge kantsere ka mpiru komwe munthu adakatenga nkukabzala m’munda wake. Patsogolo pake kadamera nkukula kukhala muti, mwakuti mbalani za mlengalenga zidakonza visa mu nthawi zake.”
20 Iye adanena pomwe kuti: “Ko Ufumu wa mulungu ningaulinganize na chani?
21 Uli ninge vofufumisa vomwe mayi munango adatenga nkuvisanganisa na ufa wokwana mbale* zitatu zikuluzikulu zopimira, mwakuti nkate wose muyo udafufuma.”
22 Yesu adayenda mu thaundi na thaundi, komasoti muyi na muyi. Iye ambapfunzisa nkumbapitiriza ulendo wake woyenda ku Yerusalemu.
23 Pamwapo munthu munango adamubvunza kuti: “Ambuya, ko ni shuwadi kuti wanthu womwe adzapulumuke ni ang’onong’ono?” Iye adawauza kuti:
24 “Yesesani mwamphanvu kuti mungene pa nsuwo ung’ono. Ndawa shuwa ninkukuuzani, azinji adzafunisise kungenamo koma adzakwaniselini.
25 Munikachiro wa nyumba akadzanyamuka nkukhiya nsuwo, imwepo mudzaime panja nkumbagogodza nsuwo muyo, ndipo mudzanene kuti: ‘Ambuya, tifungulireni.’ Koma iye adzakudawireni kuti: ‘Nikudziwalini komwe mwachokera.’
26 Pamwapo mudzayambe kunena kuti: ‘Timbadya na kumwa pamaso panu ndipo imwepo mungapfunzisa m’misewu yathu.’
27 Koma iye adzakuuzeni kuti: ‘Nikudziwalini komwe mwachokera. Chokani pamaso pangu, imwepo mose wochita vinthu vosalungama!’
28 Kumuko adzalire na kukukuta manu akadzawona Abulahamu, Isaki na Yakobo komasoti aneneri wose ali mu Ufumu wa Mulungu, koma imwepo muli gwinyiriwe kunja.
29 Komasoti, wanthu adzabwere kuchokera kumbali ya kumachibese, kumbali ya kum’maulo, ku norte na ku sul ndipo adzakhale pa meza mu Ufumu wa Mulungu.
30 Shuwa yemwe ali womalizira adzakhale woyamba, ndipo woyamba adzakhale womalizira.”
31 Mu nthawe mwiyoletu kudafika Afalisi anango nkumuuza kuti: “Nyamukani muchoke kuno, ndawa Herode akufuna kukuphani.”
32 Iye adawadawira kuti: “Yendani mukauze nkhandwe mwiyo kuti: ‘Ine nikubulisa viwanda na kupolesa wanthu lero na mangwana, ndipo nimalize ntsiku yachitatu.’
33 Koma ninkufunika kupitiriza ulendo wangu lero na mangwana komasoti ntsiku yachitatu, ndawa ni vosafunika kuti mneneri amuphere kunja kwa Yerusalemu.
34 Yerusalemu, Yerusalemu, wakupha aneneri iwe na wophwanya wanthu na minyala wotumiziwa kwa iwepo. Mobwerezabwereza nimbafuna kuunganidza wana wako pabodzi, ninge momwe nkhuku iunganidzira wana wake m’maphaphiro. Koma wanthu imwe mulibe kufuna kuchita vimwevo.
35 Manje bvani! Mulungu wachoka nkukusiirani nyumba yanu mweyi. Shuwa ninkukuuzani, mudzaniwonelini pomwe mpakana pomwe mudzanene kuti: ‘Wodalisiwa ni yemwe ankubwera mu dzina ya Yahova!’”*
