Wonembewa na Luka 14:1-35
-
Mwamuna yemwe ambatupa manja na minyendo adapolesewa pa Satade (1-6)
-
Khala wodzichepesa ukachemerewa (7-11)
-
Mbachemera wanthu omwe angakwaniselini kukubwezera (12-14)
-
Chitsanzo cha wanthu omwe adachemerewa koma nkulamba kubwera (15-24)
-
Kukhala wopfunzira wa Yesu ni nkhani ikulu (25-33)
-
Munyu womwe wamala mphanvu (34, 35)
14 Nthawe inango adayenda kukadya chakudya m’nyumba ya m’bodzi wa atsogoleri wa Afalisi pa Satade ndipo wanthu womwe enze m’nyumba mumo ambamunyang’anisisa.
2 Patsogolo pake penze munthu yemwe angadwala matenda yomwe yambachitisa kuti manja na minyendo yake yatupe.
3 Padamuwona, Yesu adabvunza wanthu wodziwa Chilamulo komasoti Afalisi mwawo kuti: “Ko ni vobvumizika kupolesa munthu pa Satade panango neye?”
4 Koma iwo adandokhala chete. Pavidateno iye adaphata munthu ule nkumupolesa ndipo adamuuza kuti ambayenda kwawo.
5 Pamwapo adawabvunza kuti: “Ko ni mbani wa imwepo yemwe mwana wake panango ng’ombe yake ichigwera munchera pa ntsiku ya Satade, angaichoselini nthawe mwiyo?”
6 Iwo alibe kumudawira mbvunzo moyu.
7 Padawona kuti wanthu wochemerewa wale ankusalula malo yolemekezeka maninge, adawauza chitsanzo kuti:
8 “Munango akakuchemera ku phwando ya ukwati, ayi kukhala pa malo yolemekezeka maninge. Panango vingachitike kuti wachemera pomwe munthu munango wolemekezeka maninge kuposha iwepo.
9 Manje angabwere yemwe adakuchemera ule nkukuuza kuti: ‘Choka pamwapa pakhale akulu awa.’ Vikadzateno udzachokepo mwamanyazi nkukakhala kumapeto chaiko.
10 Koma ukachemerewa, yenda ndipo ukakhale kumapeto chaiko, kuti munthu yemwe adakuchemera ule akafika adzakuuze kuti: ‘Shamwali, khala pa malo yolemekezeka aya.’ Vikadzateno udzalemekezeke pamaso pa alendo na anzako wose.
11 Ndawa aliyese yemwe adzikwiza adzachitisiwe manyazi, koma aliyese yemwe adzichepesa adzakwezewe.”
12 Patsogolo pake adauza pomwe munthu yemwe adamuchemera ule kuti: “Ukakonza chakudya chamasikati panango chakumaulo, ayi kuchemera anzako, panango m’bale wako, panango wachibale wako, panango soti wanthu wolemera womwe ukhala nawo pafupi. Panango nthawe inango adzakuchemerembo ndipo adzakhale ninge akukubwezera.
13 Koma ukakonza phwando, umbachemere wanthu wosauka, wopunduka na wosaona.
14 Ukachita teno udzakhale wokondwa ndawa alibe chakuti akubwezere. Mulungu adzakubwezere wanthu wolungama akambadzamukisiwa.”
15 Padabva vimwevi, m’bodzi pa alendo anzake adamuuza kuti: “Wokondwa ni munthu yemwe adzadye chakudya mu Ufumu wa Mulungu.”
16 Yesu adamuuza kuti: “Munthu munango adakonza phwando ikulu ya chakudya cha kumaulo ndipo adachemera wanthu azinji.
17 Nthawe ya chakudya cha kumaulo mwicho paidakwana, adatumiza kapolo wake kukauza wanthu omwe adawachemera wale kuti: ‘Naboni, ndawa vose vakonzewa manje.’
18 Koma wose adayamba kulamba mwakufotokoza vifukwa vawo. Woyamba adamuuza kuti: ‘Ine nagula munda ndipo nifunika kuyenda kukauwona. Pepani nikwaniselini kubwera.’
19 Munango adanena kuti: ‘Ine nagula vipani 5* va ng’ombe nifuna nikaviyese momwe viphatira basa. Pepani nikwaniselini kubwera.’
20 Ndipo munango adanena kuti: ‘Ine nalowola manjemanje, ndipomwapa ningakwaniselini kubwera.’
21 Manje kapolo ule adabwerera kukanena vimwevo kwa bwana wake. Munikachiro wa nyumba ule padabva vimwevi adakalipa ndipo adauza kapolo ule kuti: ‘Yenda mwakankulumize m’misewu na njira za muthaundi mweyi, ukatenge wanthu wosauka, osaona na wopunduka nkubwera nawo kuno.’
22 Pakadapita kanthawe kang’ono kapolo ule adati: ‘Bwana, vomwe mwalamula vachitika, koma malo yadakalipo.’
23 Manje bwana adauza kapolo wake ule kuti: ‘Yenda m’misewu yanango yakunja kwa thaundi ndipo ukalimbikise wanthu kuti abwere kuno kuti nyumba yangu idzale.
24 Ndawa ninkukuuzani kuti, pa wanthu womwe adachemerewa wale palibe olo m’bodzi yemwe adzalaweko chakudya changu chakumaulo.’”
25 Manje gulu ikulu imbafamba pabodzi na Yesu ndipo iye adacheuka nkuwauza kuti:
26 “Peno munthu ankunitewera koma osazondana* na ababa wake, amayi wake, nkazi wake, wana wake, azibale wake komasoti azilongosi wake, inde olo moyo wake chaiwo, angakhalelini wopfunzira wangu.
27 Aliyese yemwe atakulalini muti wake wodzudzikirapo* nkunitewera angakhalelini wopfunzira wangu.
28 Mwakulinganiza, ni mbani wa imwepo yemwe akafuna kumanga nyumba ayambalini kukhala pasi nkuwerengera kobiri zomwe adzadzonge, kuti awone kuti peno anazo kobiri zokwanira zomalizira nyumba mwiyo?
29 Akaleka kuchita teno, angakonze fundasau koma osakwanisa kuimaliza ndipo wanthu wose woona angayambe kumuseka,
30 nkumbanena kuti: ‘Munthu uyu adayamba bwinobwino kumanga, koma wakangira kumaliza.’
31 Panango ni mpfumu iponi, yomwe pakuyenda kukamenyana na mpfumu inzake kunkhondo, iyambalini kukhala pasi nkuganiza bwino peno masocha yake 10 000 yangakwanise kulimbana na masocha 20 000 ya mpfumu yomwe inkubwera kudzamenyana naye?
32 Koma akawona kuti angakwaniselini, mwakankulumize atumiza wanthu wake womuimira kwa mpfumu inango iyo ikanati kufika pafupi, kukakumbira ntendere.
33 Molingana na vimwevi, shuwa palibe aliyese pa imwepo yemwe ankukangira kusiya chuma chake chose, yemwe angakwanise kukhala wopfunzira wangu.
34 “Shuwadi, munyu ni wabwino. Koma ko munyu muyo ukamala mphanvu, ingabwezeresewe tani mphanvu yake mwiyo?
35 Ufunikalini kuuthira mu dothi panango m’manyowa. Wathu andoutaya kunja. Yemwe anamatu yakubva, abve.”
Mawu ya m’nyantsi
^ Vipani 5 va ng’ombe, ni ng’ombe 10 zimuna zomwe zimangiwa pa djoko.
^ Panango kuti: “kukondana pang’ono.”
^ Onani matanthauzo ya mawu yanango.
