Wonembewa na Luka 15:1-32
15 Manje wotsonkhesa mtsonkho wose komasoti wanthu wochimwa, ambabwera kwa Yesu kuti adzamubvesere.
2 Pamwapo Afalisi na alembi ambang’ung’uzika kuti: “Munthu uyu atambira wanthu wochimwa n’kumbadya nawo pabodzi.”
3 Pamwapo iye adawauza chitsanzo ichi:
4 “Ni mbani pakati panu yemwe achikhala na nkhosa 100, ibodzi n’kusowa, angasiyelini nkhosa 99 zinango izo m’chipululu n’kuyenda kukafagafaga ibodzi yosowa ire mpaka aigumane?
5 Akaigumana ainyamula paphewa pake ndipo akhala wokondwa.
6 Akafika kumuyi achemeresa azinzake na azivizinyu nkuwauza kuti: ‘Kondwani nane pabodzi, ndawa naigumana nkhosa yangu yomwe yenze idasowa ire.’
7 Shuwa ninkukuuzani kuti, molingana na vimwevi, kudzulu kudzakhale chimwemwe chikulu ndawa ya munthu m’bodzi wochimwa yemwe walapa kuposha cha wanthu 99 wolungama omwe ankufunikalini kulapa.
8 Panango ni mayi wanyi yemwe anakobiri zokwana madalakima 10, manje ibodzi nkumutaika, angagaselini kandyero nkupsayira m’nyumba nkuifaga mosamala mpaka kuigumana?
9 Ndipo akayigumana achemeresa azinzake* komasoti azivizinyu wake, nkuwauza kuti: ‘Kondwani nane pabodzi, ndawa naigumana kobiri ya dalakima yomwe yenze idataika ire.’
10 Ndipomwapa ninkukuuzani kuti, molingana na vimwevi, angelo wa Mulungu akondwa maninge ndawa ya munthu m’bodzi wochimwa yemwe walapa.”
11 Patsogolo pake adanena kuti: “Munthu munango wenze na wana amuna awiri.
12 Mng’ono adakumbira ababa wake kuti: ‘Ababa, munipasiretu chuma changu pa chuma chanu ichi.’ Pamwapo baba ule adagawa chuma mwicho nkupasa wana mwawo.
13 Pazidapita ntsiku zing’onong’ono, mwana mng’ono ule adalongedza vinthu vake vose nkuyenda kudziko inango yakutali. Kumuko adayamba kumbachita makhalidwe yoipa ndipo adadzonga chuma chake chose.
14 Padadzonga chuma chake chose, m’dziko yose mwiyo mudagwa njala ikulu ndipo iye adayamba kubonera maninge.
15 Mwakuti adayenda kukaphata basa kwa munthu munango wa m’dziko mwiyo ndipo adamutumiza kuti ambakabuse nkhumba zake.
16 Iye mpakana ambakhumbwira chakudya chomwe nkhumba mwizo zingadya, koma palibe yemwe angamupasa chinthu.
17 Nzeru pazidamubwerera, adanena kuti: ‘Anyabasa azinji wa ababa wangu anachakudya chizinji, koma ine kuno nikundobonera na njala!
18 Basi niyende kwa ababa wangu nikawauze kuti: “Ababa, nachimwira kudzulu komasoti nachimwira imwepo.
19 Ndinelini pomwe wofunika kuchemerewa kuti mwana wanu. Mumbaniwone ninge mwaliri anyabasa wanu awa.”’
20 Pamwapa adanyamukadi nkuyenda kwa ababa wake. Ababa wake mwawo adamuwona iye adakali patali ndipo adachita chifundo maninge. Adamuthamangira n’kumukumbatira ndipo adamubejali mwachikondi.
21 Pamwapo mwana muyo adauza ababa wake kuti: ‘Ababa, nachimwira kudzulu komasoti nachimwira iwepo. Ndinelini pomwe woyenerera kuchemerewa kuti mwana wanu.’
22 Koma ababa wake mwawo adauza akapolo wake kuti: ‘Fulumizani, tengani mkhanjo wabwino maninge ule mumuvazike. Mumuvazike pomwe aneli kudjanja kwake na ntsapato kumapazi kwake.
23 Komasoti mubwerese mwana wa ng’ombe mwamuna wonenepa, mumuphe ndipo tidye na kukondwa.
24 Ndawa mwana wangu uyu wenze wakufa koma manje wakhala pomwe na moyo, wenze adasowa koma wagumanika.’ Pamwapo wanthu wose adayamba kukondwa.
25 Koma mwana nkulu wenze kumunda. Manje pomwe angabwerera nkusala pang’ono kufika pa muyi pawo, adabva zungo ya nyimbo komasoti wanthu ankuvina.
26 Pamwapo adachemera m’bodzi wa anyabasa nkumubvunza chomwe chachitika.
27 Iye adamuuza kuti: ‘Mng’ono wanu wabwera ndipo ababa wanu amuphera mwana wa ng’ombe wonenepa, ndawa amutambira ali bwinobwino.’
28 Koma iye adakalipa maninge mpakana adalamba kungenamo. Pamwapo ababa wake mwawo adabula nkuyamba kumugwigwirira.
29 Pakudawira iye adauza ababa wake mwawo kuti: ‘Nakhala ninkukuphatirani basa kwa magole yazinji ninge kapolo ndipo nilibe kuphonyesako malamulo yanu olo pang’ono. Koma mulibe kunipasako olo kamwana ka mbuzi kuti nikondwe na azishamwali wangu.
30 Koma pawandofika mwana wanu uyu, yemwe adadzonga chuma chanu na mahule, mwamuphera mwana wa ng’ombe mwamuna wonenepa bwino.’
31 Ababa wake mwawo adamuuza kuti: ‘Mwana wangu, iwepo wakhala nane nthawe zose ndipo vinthu vose vomwe ninavo ni vako.
32 Isepano palibe pomwe chinthu chinango chomwe tidakachita koma kukondwa basi, ndawa m’bale wako muyu wenze wakufa koma manje anamoyo, wenze adasowa koma manje wagumanika.’”
Mawu ya m’nyantsi
^ Azishamwali wake wachikazi.
