Wonembewa na Luka 17:1-37
17 Patsogolo pake Yesu adauza wopfunzira wake kuti: “Ni vosakwanisika kuti pakhale palibe vokhukhumudwisa. Koma tsoka kwa munthu yemwe vokhukhumudwisa ivo vibwera kuchokera kwa iye!
2 Vingamukhalire bwino maninge achimumangirira chimwala cha mphero m’khosi mwake nkumuthusira m’nyanja, kusiyana nakuti akalipise m’bodzi pa tuwana utu.
3 Shuwa samalani. Peno m’bale wako wachita tchimo umutsuule ndipo akalapa umukhululukire.
4 Podi achikuphonyera maulendo 7 pa ntsiku, n’kubwera kwa iwepo maulendo 7 kudzanena kuti: ‘Nalapa ine,’ umukhululukire.”
5 Patsogolo pake atumi mwawo adauza Ambuya kuti: “Tiingizireni chikhulupiriro.”
6 Pamwapo Ambuya adawauza kuti: “Mudakakhala na chikhulupiriro cholingana na kantsere ka mpiru kuchepa kwake, mudakakwanisa kuuza muti wa mabulosi uyu kuti: ‘Zuka pano, ukadzibzale m’nyanja umo!’ ndipo udakakubverani.
7 “Mbani wa imwepo yemwe angauze kapolo wake yemwe wandofika manjemanje kuchokera kumunda panango kukabusa nkhosa kuti: ‘Bwera ku meza kuno mwakankulumize udzadye’?
8 Ko adzamuuzelini kuti: ‘Nikonzere chakudya chamaulo, uvale chovala na kunitumikira mpakana nimalize kudya na kumwa, patsogolo pake iwembo udye na kumwa’?
9 Munthu muyo angamutembejelini kapolo wake ndawa ya vomwe wachita na basa yake, ntenolini?
10 Nchibodzibodzi imwembo, mukachita vose vomwe mudapasiwa pa basa yanu, mumbanene kuti: ‘Ise ndise akapolo alibe na basa. Tandochita vomwe timbafunika kuchita.’”
11 Manje pomwe angayenda ku Yerusalemu, adagwata na m’malire ya Samariya na Galileya.
12 Pomwe angangena m’muyi unango, adagumana na amuna 10 wakhate koma iwo enze adaimirira pataliko.
13 Patsogolo pake amuna wale adakuwa kuti: “Yesu, Mulangizi, tichitireni chifundo!”
14 Yesu padawaona adawauza kuti: “Yendani mukadziwonese kwa antsembe.” Manje pa nthawe yomwe iwo ambayenda adapolesewa.
15 M’bodzi pa wanthu mwawo padaona kuti wapolesewa, adabwerera, ankutamanda Mulungu mokuwa.
16 Padafika adagwada patsogolo pa Yesu nkujolika mpakana nkhope yake pasi, ndipo adamutembeja. Munthu muyu wenze wa ku Samariya.
17 Yesu adanena kuti: “Ko omwe apolesewa ni wanthulini 10? Manje wanthu 9 anango wale ali kuponi?
18 Ko palibe pomwe aliyese yemwe wabwerera kudzalemekeza Mulungu kupatulapo munthu moyu wa khaindi inango basi?”
19 Pamwapo Yesu adauza munthu muyo kuti: “Nyamuka umbayende. Chikhulupiriro chako chakupolesa.”
20 Afalisi padamubvunza kuti ko nilini pati Ufumu wa Mulungu udzabwere, iye adawadawira kuti: “Ufumu wa Mulungu udzabwerelini mwa maonekedwe yodabwisa.
21 Ndipo wanthu adzanenelini kuti: ‘Onani, uli kuno!’ Panango kuti: ‘Onani, uli uko!’ Ndawa Ufumu wa Mulungu uli pakati panu.”
22 Patsogolo pake adauza wopfunzira wake kuti: “Ntsiku zikubwera pomwe mudzachite shungu kuti muwoneko ntsiku ibodzi pa ntsiku za Mwana wa munthu koma mudzaiwonelini.
23 Wanthu adzakuuzeni kuti: ‘Onani, ali uko!’ Panango ‘Onani, ali kuno!’ Koma imwepo ayi kudzayendako panango kuwatewera.
24 Ndawa molingana na kaphaliwali* komwe kacheruka kuchokera mbali inango ya kudedza kufika mbali inango ya kudedza, vidzakhalembo teno na Mwana wa munthu mu ntsiku yake.
25 Koma afunika kuyamba kugumana na mabvuto yazinji komasoti kulambiwa na m’badwo muyu.
26 Komasoti molingana na vomwe vidachitika mu ntsiku za Nowa, vidzachitikembo chibodzibodzi mu ntsiku za Mwana wa munthu:
27 Mu ntsiku mwizo wanthu angadya na kumwa. Amuna ambalowola ndipo akazi ambalowodwa mpakana ntsiku yomwe Nowa adangena mu chingalawa, ndipo Chigumula chidabwera nkudzonga wanthu wose mwawo.
28 Nchibodzibodzimbo na vomwe vidachitika mu ntsiku za Loti. Wanthu angadya, kumwa, kugula, kugulisa, kubzala komasoti nkumanga.
29 Koma ntsiku yomwe Loti adabula mu Sodomu, kudzulu kudagwa moto na sulufule ninge nvula n’kudzonga wanthu wose.
30 Vidzakhalembo chibodzibodzi pa ntsiku mwiyo, pomwe Mwana wa munthu adzawonekere.
31 “Pa ntsiku mwiyo, munthu yemwe adzakhale padenga ya nyumba koma katundu wake ali m’nyumba, osati adzabuluke kukatenga katundu wake uyo. Nchibodzibodzimbo na munthu yemwe adzakhale m’munda, osati adzabwerere ku vinthu vomwe wavisiya m’mambuyo.
32 Kumbukirani nkazi wa Loti.
33 Aliyese wofunisisa kuteteza moyo wake adzauluze, koma aliyese woluza moyo wake adzausunge.
34 Shuwa ninkukuuzani, usiku muyo wanthu awiri adzagone pabodzi pa m’beda. M’bodzi adzatengewe, koma munango adzasiiwe.
35 Akazi awiri adzakhale ankupeya pabodzi pamphero. M’bodzi adzatengewe, koma munango uyo adzasiiwe.”
36 * ——
37 Pamwapo iwo adamubvunza kuti: “Ko vimwevi vidzachitikire kuponi Ambuya?” Iye adawauza kuti: “Komwe kuli thupi yakufa, mphungu zidzasonkhanembo kumuko.”
