Wonembewa na Luka 18:1-43
18 Manje Yesu adawauza chitsanzo pakufuna kuwaonesa kufunika kwakuti ambapemphere nthawi zose komasoti kuti osati ambataye ntima.
2 Iye adati: “Mu thaundi inango mwenze munthu munango wotonga milandu yemwe ambatumikiralini Mulungu ndipo ambaikhiralini nzeru wanthu.
3 Mu thaundi mweyi mwenze soti nkazi wamasiye yemwe ambayenda kawirikawiri kwa wotonga nkhani ule kukamukumbira kuti: ‘Nitongereni mulandu wangu na munthu yemwe ninaye mulandu, kuti pachitike chilungamo.’
4 Kwakanthawe wotonga ule ambafunalini, koma patsogolo pake adanena muntima mwake kuti: ‘Podiya kuti nitumikiralini Mulungu panango kuikhira nzeru munthu aliyese,
5 niwonesese kuti chilungamo chachitika kwa nkazi wamasiye moyu ndawa yakuti ankunishupisa. Nichite vimwevi kuti osati apitirize kubwera nkuninetesa* na vomwe ankukumbira ivo.’”
6 Pamwapo Ambuya adati: “Mwabva vomwe woweruza moyu adanena podiya kuti wenze wosalungama!
7 Manje ko Mulungu adzawoneseselini kuti chilungamo chachitika kwa wosankhuliwa wake, womwe amugwigwirira usiku na masikati, pomwe ankuchita nawo vinthu modekha?
8 Shuwa ninkukuuzani, iye adzawonesese kuti chilungamo chachitika kwa iwo mwakankulumize. Ko Mwana wa munthu akadzafika, adzagumanedi chikhulupiriro ninge mwichi padziko yapasi?”
9 Yesu adanena pomwe chitsanzo chinango kwa anango omwe angadziwona ninge wolungama omwe ambawona pomwe wanthu anango ninge alibe na basa. Iye adati:
10 “Wanthu awiri adayenda ku kachisi kukapemphera. M’bodzi wenze Mfalisi ndipo munango wenze wotsonkhesa mtsonkho.
11 Mfalisi ule adaimirira nkuyamba kupemphera muntima mwake kuti: ‘Mulungu wangu, ninkukutembejani ndawa ndine wosiyana na wanthu anango wose. Iwo ni vigananga, wosalungama na wachigololo. Ndine pomwe wosiyana na wotsonkhesa mtsonkho uyu.
12 Ine nidzimana kudya kawiri pa sondo ndipo nipereka chakhumi pa vinthu vose vomwe nigumana.’
13 Koma wotsonkhesa mtsonkho ule, ali imirire pataliko, alibe kufuna olo kukwiza maso yake kudzulu. Iye ambandodzigugudza pachifuwa nkumbanena kuti: ‘Mulungu wangu, nikomereni ntima* munthu wochimwa ine.’
14 Shuwa ninkukuuzani, munthu moyu adayenda kwawo wawonewa kuti ni wolungama maninge kuposha Mfalisi ule. Ndawa aliyese wodzikwiza adzachitisiwe manyazi, koma aliyese yemwe adzichepesa adzakwiziwe.”
15 Manje wanthu ambamubweresera wana wawo kuti awagumirire na manja yake, koma wopfunzira wake padawona vimwevo adayamba kuwakalipira.
16 Koma olo venze teno, Yesu adachemera wana mwawo. Iye adati: “Alekeni wana mwawo abwere kwa inepano, ayi kuwalambiza. Ndawa Ufumu wa Mulungu ni wa wanthu ninge mwawa.
17 Shuwa ninkukuuzani, aliyese yemwe atambiralini Ufumu wa Mulungu ninge mwana mng’ono adzangenelini olo pang’ono mu Ufumu muyo.”
18 Manje wolamulira munango adamubvunza kuti: “Mpfunzisi Wabwino, nichite chani kuti nikagumane moyo wosapera?”
19 Yesu adamudawira kuti: “Ndawa chani unkunichemera kuti wabwino? Palibe wabwino, koma Mulungu yekha.
20 Iwepo uyadziwa malamulo yakuti: ‘Ayi kuchita chigololo, ayi kupha munthu, ayi kuba, ayi kupereka umboni wabodza komasoti yakuti, mumbalemekeze ababa wanu na amayi wanu.’”
21 Pamwapo iye adati: “Vose vimwevi nakhala ninkuvitewedza kuchokera nili mng’ono.”
22 Yesu padabva vimwevo, adamuuza kuti: “Panachinthu chibodzi chomwe chinkushota kwa iwepo: Ukagulise vinthu vose vomwe unavo ndipo kobiri mwizo ukagawire wanthu wosauka. Ukateno udzakhale na chuma kudzulu, patsogolo pake ubwere udzakhale wotewera wangu.”
23 Padabva vimwevi, adakwinyirira maninge, ndawa wenze wolemera maninge.
24 Yesu adamunyang’ana n’kunena kuti: “Vidzakhale voshupa maninge kuti wanthu wa kobiri adzangene mu Ufumu wa Mulungu!
25 Shuwadi, nivosashupa kuti ngamila ingene pa kamubo ka ntsingano kusiyana nakuti munthu wolemera angene mu Ufumu wa Mulungu.”
26 Womwe adabva vimwevi adabvunza kuti: “Manje ni mbani angapulumuke?”
27 Iye adawauza kuti: “Vinthu vosakwanisika kwa wanthu nivokwanisika kwa Mulungu.”
28 Koma Petulo adanena kuti: “Onani! Ise tasiya vinthu vathu nkukutewerani.”
29 Yesu adawauza kuti: “Shuwa ninkukuuzani, palibe yemwe wasiya nyumba, nkazi, azibale, azibereki panango wana, ndawa ya Ufumu wa Mulungu
30 yemwe adzagumanelini vizinji maninge kuposha vimwevi mu nthawe ino, ndipo mu nthawe yomwe inkubwera,* adzagumane moyo wosapera.”
31 Patsogolo pake Yesu adatengera pambali wopfunzira wake 12 wale n’kuwauza kuti: “Bvani! Manje tinkuyenda ku Yerusalemu ndipo vose vomwe vidanembewa na aneneri pakunena va Mwana wa munthu vikakwanirisiwe.
32 Mwakulinganiza, akamupereke kwa wanthu wa makhaindi yanango ndipo akamuchitire vinthu voipa, kumunyoza na kumulavulira mata.
33 Akakamaliza kumukwapula akamuphe, koma pa ntsiku yachitatu iye adzamuke.”
34 Koma iwo alibe kubvesa tanthauzo ya chilichose chomwe Yesu adafotokoza ndawa mawu mwaya yadabisiwa kwa iwo, ndipo alibe kubvesa vomwe vidanenewa.
35 Manje pomwe Yesu adasala pang’ono kufika ku Yeriko, munthu munango wosawona adakhazikika m’mbali mwa nsewu n’kumbakumbira vinthu kwa wanthu.
36 Padabva gulu ya wanthu inkugwata pafupi na mwapo, adabvunza chomwe chimbachitika.
37 Iwo adamuuza kuti: “Pankugwata Yesu wa ku Nazareti!”
38 Padabva vimwevo, adakuwa kuti: “Yesu, Mwana wa Davide, nichitireni chifundo!”
39 Pamwapo wanthu womwe enze patsogolo adayamba kumutsuula nkumbamuuza kuti akhale chete. Koma akateno ndipo pangakuwa maninge kuti: “Mwana wa Davide, nichitireni chifundo!”
40 Pamwapo Yesu adaimirira n’kulamula kuti amubwerese munthu muyo kwa iye. Padafika pafupi, Yesu adamubvunza kuti:
41 “Unkufuna kuti nikuchitire chani?” Iye adadawira kuti: “Ambuya, nithandizeni kuti niyambe kuwona.”
42 Pamwapo Yesu adamuuza kuti: “Yamba kuwona, chikhulupiriro chako chakupolesa.”
43 Nthawi mwiyoletu adayamba kuona, ndipo adayamba kumutewera ankulemekeza Mulungu. Komasoti wanthu wose padaona vimwevi, adatamanda Mulungu.
Mawu ya m’nyantsi
^ Panango kuti: “kunisowesa mpata.”
^ Panango kuti: “nichitireni chifundo.”
^ Panango kuti: “mapeto ya nthawe ino. Onani matanthauzo ya mawu yanango.”
