Wonembewa na Luka 19:1-48
19 Manje Yesu adangena mu Yeriko, koma adandogwatiramo.
2 Kumuko kwenze munthu munango dzina yake Zakeyu. Iye wenze nkulu wa wotsonkhesa mtsonkho ndipo wenze wolemera.
3 Zakeyu ambafunisisa kuti awone Yesu, koma alibe kukwanisa kumuwona ndawa ya gulu ya wanthu pakuti iye wenze mfupi.
4 Ndipomwapa adathamangira kutsogolo nkukwera m’muti wa nkuyu kuti akwanise kumuwona, ndawa Yesu ambagwata na njira mwiyo.
5 Yesu padafika pamalo mwapo, adanyang’ana mdzulu mumo n’kumuuza kuti: “Zakeyu, buluka kankulumize, ndawa lero ninkufunika kukakhala m’nyumba mwako.”
6 Padabva vimwevo adabuluka kankulumize, ndipo adamutambira m’nyumba mwake ninge mulendo mokondwa.
7 Wanthu padawona Yesu akungena m’nyumba mumo, wose adayamba kung’ung’udzika kuti: “Iye wayenda kukakhala mu nyumba ya munthu yemwe ni wochimwa.”
8 Koma Zakeyu adaimirira n’kuuza Ambuya kuti: “Ambuya, shuwa inepano nipereke hafu ya chuma changu kwa osauka. Ndipo chilichose chomwe nidatengera munthu aliyese nibwezere kuthimizira maulendo 4.”
9 Padabva vimwevi, Yesu adamuuza kuti: “Lero chipulumuso chafika mu nyumba ino, ndawa nayembo ni mwana wa Abulahamu
10 Mwana wa munthu adabwera kudzafagafaga na kupulumusa wanthu wosokera.”
11 Pomwe iwo ambabvesera vimwevi, iye adawauza chitsanzo chinango, ndawa enze pafupi na Yerusalemu ndipo wanthu mwawo ambaganiza kuti Ufumu wa Mulungu uwonekere pa nthawe mwiyo.
12 Pamwapo iye adanena kuti: “Munthu munango wa m’banja yachifumu ambakonzekera kuti ayende kudziko yakutali kuti akatambire ufumu nkubwerako.
13 Pamwapo adachemera akapolo wake 10 nkuwapasa kobiri 10 za mina ndipo adawauza kuti: ‘Muchite bizi na kobiri zimwezi mpakana nidzabwere.’
14 Koma wanthu wa mudziko ya kwawo adazondana naye ndipo iye padayenda wanthu mwawo adatumiza wanthu womuimira kuti akanene kuti: ‘Isepano tinkufunalini kuti munthu muyu akhale mpfumu yathu.’
15 Padabwerera kwawo padati watambira ufumu muyo, adachemera akapolo womwe adawapasa kobiri* wale kuti abwere kwa iye, kuti awerengerane na kuona momwe aphindulira pa bizi yawo.
16 Woyamba adabwera ndipo adanena kuti: ‘Abwana, kobiri yanu ya mina ire idaphindula kobiri zinango 10 za mina.’
17 Iye adamuuza kuti: ‘Wachita bwino, ndiwe kapolo wabwino! Pakuti waonesa kuti ndiwe wokhulupirika pa chinthu ching’ono, nikuikhe kuti umbanyang’anire mathaundi 10.’
18 Patsogolo pake padabwera wachiwiri ndipo adati: ‘Abwana, kobiri yanu ya mina ire yaphindula zinango 5.’
19 Iye adauza pomwe muyo kuti: ‘Nawembo ukhale wonyang’anira mathaundi 5.’
20 Koma kudabwera munango ndipo adanena kuti: ‘Abwana, kobiri yanu ya mina ire ni iyi. Nidaimanga panguwo nkuibisa.
21 Nidachita vimwevi ndawa nikugopani. Imwepo ndimwe munthu woipa ntima. Mutenga vomwe mulibe kusungisa ndipo mukolola vomwe mulibe kubzala.’
22 Iye adamuuza kuti, ‘Nikuweruze mobverana na vomwe wanena, kapolo woipa iwe. Wati umbadziwa kuti inepano ndine munthu woipa ntima, wotenga vomwe niribe kusungisa na wokolola vomwe nilibe kubzala.
23 Manje ndawa chani ulibe kusungisa kobiri yangu mwiyo ku banko? Udakachita vimwevo, inepano pakubwera nidakaitenga kobiri mwiyo pabodzi na kalowa wake.’
24 Padateno adauza wanthu omwe enze pafupi kuti: ‘Mutengereni kobiri ya mina mwiyo nkuipereka kwa yemwe anakobiri 10 za mina.’
25 Koma iwo adamuuza kuti: ‘Bwana wathu, muyu alikale na kobiri za mina 10!’—
26 ‘Shuwa ninkukuuzani, aliyese yemwe anazo, adzapasiwe zinango zizinji, koma yemwe alibe adzatengerewe olo zomwe anazo.
27 Komasoti azondi wangu awa, omwe alibe kufuna kuti inepano nikhale mpfumu yawo, bwerani nawo kuno muwaphe inepano nikuwona.’”
28 Padamaliza kunena vimwevi, adapitiriza ulendo wake woyenda ku Yerusalemu.
29 Manje padasala pang’ono kufika ku Betefage na ku Betaniya paphiri yochemerewa kuti phiri ya Maolivi, adatumiza wopfunzira wake awiri.
30 Iye adawauza kuti: “Yendani m’muyi womwe munkuwona ule, ndipo mukangena mumo mukagumane bulu mng’ono mwamuna ali mangirire, yemwe munthu akanati kumupakirako. Mukamumasule nkubwera naye kuno.
31 Koma aliyese akakakubvunzani kuti: ‘Ndawa chani munkumumasula bulu muyu?’ Mukanene kuti: ‘Ambuya ankumufuna.’”
32 Pamwapo wanthu adatumiwa wale adanyamuka ndipo adamugumanadi ninge momwe iye adawauzira.
33 Koma pomwe angamumasula bulu muyo, anikachiro adawabvunza kuti: “Ndawa chani munkumumasula bulu moyu?”
34 Iwo adadawira kuti: “Ambuya ankumufuna.”
35 Pamwapo iwo adamutenga nkuyenda naye kwa Yesu. Patsogolo pake iwo adayanza malaya yawo yakunja pa bulu muyo ndipo Yesu adakwerapo.
36 Pomwe angafamba, wanthu angayanza malaya yawo yakunja munsewu.
37 Padandofika pafupi na nsewu wochokera m’phiri ya Maolivi, gulu yose ya wopfunzira mwawo idayamba kukondwa na kutamanda Mulungu mokuwa ndawa ya basa zose zamphanvu zomwe adawona.
38 Iwo ambanena kuti: “Wodalisiwa ni yemwe ankubwera ninge Mpfumu mu dzina ya Yahova!* Ntendere kudzulu na ulemerero kudzuludzulu muko!”
39 Koma Afalisi anango mu gulu mwiyo adauza Yesu kuti: “Mpfunzisi, atsuuleni wopfunzira wanu awa.”
40 Pakudawira iye adati: “Shuwa ninkukuuzani, peno mwawa angakhale chete, minyala yangakwanise kukuwa.”
41 Manje Yesu padasala pang’ono kufika mu thaundi ya Yerusalemu, adawona thaundi mwiyo nkuyamba kuilirira.
42 Iye adati: “Udakati iwepo lero wazindikira vinthu va ntendere— koma manje vabisika kuti osati ukwanise kuwona.
43 Ndawa ntsiku zidzakufikire pomwe azondi wako adzamange mpanda wavintsonga kukuzungulira. Azondi mwawo adzakufungire na kukuukira* kuchokera kumbali zose.
44 Iwo adzakugwese pasi nkukudzonga pabodzi na wana womwe unawo. Ndipo adzasiyelini mwala padzulu pa mwala unzake, ndawa ulibe kuzindikira kuti nthawi yokuzungira yenze idakwana.”
45 Manje adangena mu kachisi nkuyamba kuthamangisa wanthu womwe angagulisamo vinthu,
46 nkuwauza kuti: “Malemba yanena kuti: ‘Nyumba yangu idzakhale nyumba yopemphereramo,’ koma imwepo mwaisandusa mphako ya vigananga.”
47 Ndipo ntsiku na ntsiku iye adapitiriza kupfunzisa mu kachisi mumo. Koma wantsembe akulu, alembi na akuluakulu wa wanthu ambafunisisa kumupha.
48 Koma alibe kukwanisa kuchita vimwevi ndawa wanthu azinji ambamubomberera kuti amubvesere ndipo ambatayanalini naye.
Mawu ya m’nyantsi
^ Kobiri zimwezi zenze za siliva.
^ Onani matanthauzo ya mawu yanango.
^ Panango kuti: “kukupanikiza.”
