Wonembewa na Luka 2:1-52
2 Manje mu ntsiku mwezo, Kaisara Augusto adalamula kuti wanthu wose mu dziko mwiyo akachite kanembera.
2 (Kanembera moyu wenze woyamba ndipo udachitika pomwe Kureniyo wenze governador wa Siriya.)
3 Wanthu wose adayenda kukanembesa ndipo aliyese adakanembesera ku thaundi ya kwawo.
4 Nayembo Yosefe adachoka ku Galileya mu thaundi ya Nazareti nkuyenda ku Yudeya, ku thaundi ya Davide yochemerewa Betelehemu, ndawa wenze wa m’banja na dzinza ya Davide.
5 Adayenda kukanembesa pabodzi na Mariya yemwe adalowolana naye mobverana na pangano. Pa nthawe mweyi Mariya wenze adasala pang’ono kubereka.
6 Ali kumuko, nthawe idamukwanira yakuti abereke.
7 Iye adabereka mwana wake woyamba mwamuna ndipo adamukukutidza nguwo nkumugonesa modyeramo vipfuwo, ndawa m’nyumba ya alendo alibe kugumanamo malo.
8 Mudera mweyi mwenze pomwe anyakabusa omwe angagoneratu kumalo yodyeserako vipfuwo nkumbayang’anira nkhosa zawo usiku wose.
9 Mwadzidzidzi mngelo wa Yahova* adaimirira pafupi na iwo, ndipo ulemerero wa Yahova* udagaka pa malo yose mwayo mwakuti adachita mantha maninge.
10 Koma mngelo muyo adawauza kuti: “Ayi kugopa! Ine nabwera kudzalengeza kwa imwe ntontholo wabwino wa chimwemwe chikulu chomwe wanthu wose adzakhale nacho.
11 Ndawa lero, mu thaundi ya Davide mwabadwa mpulumusi wanu, yemwe ni Ambuya Khrisitu.
12 Nikukupasani chizindikiro ichi: Kumuko mukagumane mwana kacheche ali kukutidze na nguwo ali gonesewe modyeramo vipfuwo.”
13 Mwadzidzidzi, padawoneka gulu ikulu yakudzulu iri pabodzi na mngelo muyo ndipo imbatamanda Mulungu kuti:
14 “Ulemerero kwa Mulungu kudzuludzulu, ndipo padziko ya pasi pano, ntendere pakati pa wanthu womwe iye akondwera nawo.”
15 Pamwapo angelo wale padachoka nkubwerera kudzulu, anyakabusa wale adayamba kuuzana kuti: “Naboni tiyende ku Betelehemu kuti tikawone vomwe vachitika, vomwe Yahova* watidziwisa.”
16 Iwo adayenda mwakankulumize ndipo adakagumana Mariya, Yosefe komasoti kacheche ule ali gonese modyeramo vipfuwo.
17 Padawona vimwevi, adafotokoza ntontholo womwe adauziwa wonena va mwana muyu.
18 Wose womwe adabva vomwe anyakabusa mwawa adawauza, adadabwa maninge.
19 Koma Mariya adasunga mawu yose mwaya, ndipo adayamba kuganizira tanthauzo ya vimwevi muntima mwake.
20 Pamwapo anyakabusa wale adabwerera, akulemekeza komasoti kutamanda Mulungu ndawa ya vose vomwe adabva na kuviwona, mobverana na vomwe adauziwa.
21 Pazidamala ntsiku 8, nthawe yakuti achite mdulidwe wa mwana muyo paidakwana, adamupasa dzina yakuti Yesu. Imweyi ni dzina yomwe mngelo ule adanena Mariya akanati kukhala na mimba.
22 Komasoti nthawe yakuti iwo achenesewe mobverana na Chilamulo cha Mose paidakwana, adayenda na mwana muyo ku Yerusalemu kukamupereka kwa Yahova.*
23 Vimwevi venze vobverana na vomwe vidanembewa mu Chilamulo cha Yahova* kuti: “Mwana aliyese mwamuna woyamba kubadwa, adzakhale wochena kwa Yahova.”
24 Kumuko iwo adapereka ntsembe mobverana na vomwe Chilamulo cha Yahova* chinena kuti: “Njiwa ziwiri panango wana awiri wa nkhangaiwa.”
25 Manje mu Yerusalemu mwenze munthu munango dzina yake Simiyoni. Mwamuna moyu wenze wolungama komasoti wodzipereka kwa Mulungu. Iye ambadikhira nthawe yomwe Mulungu adzalimbikise Izirayeli ndipo mzimu uchena wenze pa iye.
26 Komasoti Mulungu adamuululira pophatisa basa mzimu uchena kuti adzafelini akalibe waona Khrisitu wa Yahova.*
27 Manje motsogolerewa na mzimu, adabwera ku kachisi. Ndipo pomwe azibereki wa mwana muyo, Yesu, adamubweresa kudzamuchitira vomwe Chilamulo chingafuna,
28 iye adatakula mwana muyo m’manja mwake nkutamanda Mulungu kuti:
29 “Manje, Ambuya Nkulu maninge, mukubvuma kapolo wanu kuyenda muntendere mobverana na vomwe imwepo mudanena,
30 ndawa maso yangu yawona njira yanu yopulumusira wanthu
31 yomwe mwakonza pamaso pa wanthu wa makhaindi yose.
32 Maso yangu yawona kugwerewera kochosa nguwo yofunikiza yomwe ikukangisa makhaindi ya wanthu kuti yaleke kuwona, komasoti naona ulemerero wa wanthu wanu Aizirayeli.”
33 Ababa wa mwana muyo na amayi wake ambandodabwa na vomwe Simiyoni anganena pa nkhani ya mwana muyo.
34 Komasoti Simiyoni adadalisa azibereki mwawo ndipo adauza Mariya mayi wa mwana muyo kuti: “Bvesera! Mwana moyu waikhiwa kuti azinji agwe nakuti azinji amuke pomwe mu Izirayeli. Komasoti kuti akhale chizindikiro chomwe wanthu adzachitsutse
35 (inde, chibemba chitali chidzakulase), kuti vomwe wanthu azinji ankuganiza muntima mwawo viwonekere pachena.”
36 Kwenze pomwe mneneri wachikazi, dzina yake Ana mwana wa Fanueli, wa dzinza ya Aseri. Mayi moyu wenze wachikulire maninge, ndipo adakhala na mwamuna wake magole 7 yokha kuchokera pomwe adalowolana.
37 Manje wenze nkazi wamasiye ndipo wenze na magole 84 koma ambashotalini pa kachisi. Ambachita utumiki wopatulika usiku na masikati ndipo ambadzimana kudya komasoti ambapemphera mogwigwirira.
38 Pa nthawe mwiyoletu iye adafika pafupi nkuyamba kutembeja Mulungu na kuyankhula va mwana muyo kwa wose womwe angadikhirira chipulumuso cha Yerusalemu.
39 Pamwapo padachita vose mobverana na chilamulo cha Yahova,* adabwerera ku Galileya, ku thaundi yawo ya Nazareti.
40 Mwana muyo adapitiriza kukula komasoti kukhala wamphanvu. Nzeru zake zimbawanda ndipo Mulungu adapitiriza kukondwera naye.
41 Gole iriyose, azibereki wake ambakonda kuyenda ku Yerusalemu, ku chikondwerero cha Pasika.
42 Manje pewenze na magole 12, iwo adayenda naye kumuko mobverana na mwambo wa chikondwerero mwicho.
43 Chikondwerero mwicho pachidamala, iwo adanyamuka nkubwerera kwawo. Koma mulumbwana muyo Yesu adakhalilira ku Yerusalemu ndipo azibereki wake alibe kudziwa vimwevo.
44 Iwo ambaganiza kuti iye wenze nawo mugulu ya wanthu omwe enze paulendo wale mwakuti adafamba ulendo wa ntsiku yantero. Patsogolo pake adayamba kumufagafaga mwa azibale na azinzawo.
45 Koma padamusowa, adabwerera ku Yerusalemu. Kumuko adamufagafaga malo yaliyose.
46 Manje pazidamala ntsiku zitatu, adamugumana ali mu kachisi alikhale pakati pa apfunzisi ndipo angawabvesera nkumbawabvunza mibvunzo.
47 Koma wose womwe angamubvesera, adadabwa maninge na midawiro yake komasoti pakuwona kuti iye wenze wobvesa vinthu maninge.
48 Azibereki wake padamuwona adadabwa maninge, ndipo amayi wake adamubvunza kuti: “Mwanangu, ndawa chani watishupisa tene? Ine na ababa wako awa tenze na nkhawa maninge ndipo timbakufagafaga.”
49 Koma iye adawadawira kuti: “Ko ndawa chani mumbanifagafaga? Ko mukudziwalini kuti nifunika kugumanika mu nyumba ya Ababa wangu?”
50 Koma vomwe iye ambawauza, iwo alibe kubvesa.
51 Patsogolo pake adanyamuka nawo pabodzi nkubwerera ku Nazareti ndipo adapitiriza kuwabvera.* Pamwapa pomwe amayi wake mwawa adasunga mosamala maninge mawu yose mwaya muntima mwawo.
52 Koma Yesu adapitiriza kukula na kukhala na nzeru zizinji. Ndipo Mulungu na wanthu adapitiriza kukondwera naye.
Mawu ya m’nyantsi
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Panango kuti: “kuwagonjera.”
