Wonembewa na Luka 20:1-47
20 Ntsiku inango pangapfunzisa wanthu mu kachisi na kulengeza ntontholo wabwino, kudabwera antsembe akulu, alembi pabodzi na akulu,
2 nkudzamubvunza kuti: “Tiuzeni, ko munaulamuliro wochitira vinthu vimwevi? Panango ni mbani yemwe adakupasani ulamuliro muyu?”
3 Yesu adawadawira kuti: “Inembo nikubvunzeni mbvunzo m’bodzi ndipo munidawire:
4 Ko ubatizo womwe Yohani ambachita udachokera kudzulu panango kwa wanthu?”*
5 Pamwapo iwo adayamba kukambirana kuti: “Tikanena kuti: ‘Udachokera kudzulu,’ iye atibvunze kuti: ‘Manje ndawa chani mulibe kumukhulupirira?’
6 Koma tikanena kuti: ‘Udachokera kwa wanthu,’ wanthu wose mwawa atiphe na minyala, ndawa iwo akhulupirira na ntima wose kuti Yohani wenze mneneri.”
7 Pamwapo adadawira kuti akudziwalini komwe udachokera.
8 Yesu adawauza kuti: “Inembo nikuuzenilini yemwe adanipasa ulamuliro omwe nichitira vimwevi.”
9 Pamwapo iye adayamba kuuza wanthu mwawo chitsanzo ichi: “Munthu munango adalima munda wa uva ndipo adausiya m’manja mwa alimi nkuyenda ku dziko inango komwe adakhalako nthawe itali.
10 Manje nthawe ya vipaso paidakwana, adatumiza kapolo wake kwa alimi mwawo kuti akamupaseko vipaso va m’munda wa uva muyo. Koma alimi mwawo adamumenya nkumubweza alibe chinthu.
11 Koma iye adawatumizira pomwe kapolo munango. Muyo pomwe adamumenya nkumuchitira voipa, ndipo adamubweza alibe chinthu.
12 Adatumiza pomwe wachitatu. Muyo pomwe adamupweteka nkumuponya kunja kwa munda.
13 Pavidateno munichiro wa munda wa uva ule adati: ‘Manje nichite tani pamwapa? Lekani nitumize mwana wangu wapamoyo. Ninashuwa kuti mwana wangu moyu yekha akamulemekeze.’
14 Alimi mwawo padamuwona adayamba kukambirana kuti: ‘Yaa, uyu ndiye wati adzatambire chuma cha banja. Naboni timuphe kuti chuma mwicho chikhale chathu.’
15 Pamwapo adamubulisa m’munda wa uva muyo nkumupha. Manje munikachiro wa munda wa uva muyo adzachite nawo chani alimi mwawo?
16 Iye adzabwere nkupha alimi mwawo ndipo munda wa uva muyo adzaupereke kwa anango.”
Padabva vimwevi iwo adati: “Osati vikhale teno pulizi!”
17 Koma iye adawanyang’anisisa nkunena kuti: “Pale malemba yanena kuti: ‘Mwala womwe womanga nyumba adaulamba wakhala mwala wapakhona wofunika maninge.’ Ko mawu mwaya yatanthauza chani?
18 Aliyese yemwe adzagwere pamwala muyo adzaphwanyike. Ndipo aliyese yemwe adzagwerewe na mwala muyo, adzachenekeke.”
19 Alembi na wantsembe akulu wale padazindikira kuti muchitsanzo mwicho akunena va iwo, adayesesa kugumana mpata kuti amuphatiretu nthawe mwiyo, koma angagopa wanthu.
20 Manje padawonesesa vochita vake, adatuma anyabasa mwachintsintsi kuti akadziwonese ninge wolungama, na chakulinga chakuti amugumanire vifukwa pa vomwe angayankhule, kuti akamupereke ku boma na kwa governador.
21 Pamwapo iwo adamubvunza kuti: “Mpfunzisi, tinkudziwa kuti munena na kupfunzisa chaivo ndipo mulibe tsankho, koma mupfunzisa njira ya Mulungu mobverana na choonadi.
22 Ko ni vobvumizika* kuti isepano timbapereke mtsonkho kwa Kaisara panango neye?”
23 Koma Yesu adazindikira ndale zawo ndipo adawauza kuti:
24 “Niwoneseni kobiri ya dinari. Ko nkhope na mawu yali pamwapa ni va mbani?” Iwo adadawira kuti: “Ni va Kaisara.”
25 Iye adawauza kuti: “Ndipomwapa perekani vinthu va Kaisara kwa Kaisara, koma va Mulungu kwa Mulungu.”
26 Iwo adakangira kumutapa nkamwa pa vomwe adanena ivi pamaso pa wanthu, koma adadabwa na mdawiro wake mwakuti adandokhala chete kusowa chonena.
27 Koma Asaduki anango, omwe ambanena kuti wakufa adzamukisiwelini, adabwera nkumubvunza kuti:
28 “Mpfunzisi, Mose adatinembera kuti: ‘Peno mwamuna wamwalira nkusiya nkazi koma alibe kubereka wana, m’bale wake afunika kulowola nkazi muyo nkuberekera m’bale wake ule wana.’
29 Manje penze amuna 7 wa pachibale. Woyamba adalowola nkazi, koma adaferamo ne kubereka mwana.
30 Wachiwirimbo nchibodzibodzi.
31 Patsogolo pake wachitatu adamulowola. Vidachitika chibodzibodzi kwa amuna wose 7 wale, wose adamwalira ne kusiya wana.
32 Pamapeto pake nkazi ule adamwalirambo.
33 Ko pamwapa, wakufa akadzamukisiwa nkazi muyu adzakhale wa mbani? Pakuti wose 7 adamulowola.”
34 Yesu adawadawira kuti: “Wana wa mu nthawe ino alowola na kulowodwa.
35 Koma omwe awonewa kuti ni woyenerera kudzagumana moyo pa nthawe mwiyo nkudzamukisiwa kwa wakufa adzalowolelini panango kulowodwa.
36 Ndipo iwo adzafelini pomwe, ndawa adzakhale ninge angelo. Iwo adzakhale pomwe wana wa Mulungu pakukhala wana wa kumuka kwa akufa.
37 Koma vakuti wakufa amukisiwa olo Mose adafotokoza mu nkhani ya chitsamba cha minga, pomwe adanena kuti Yahova* ni ‘Mulungu wa Abulahamu, Mulungu wa Isaki na Mulungu wa Yakobo.’
38 Iye ndi Mulungu wa wanthu wamoyo, osati wa akufa, ndawa kwa iye wose mwawa ni wamoyo.”
39 Podawira, anango pa alembi mwawo adanena kuti: “Mpfunzisi, mwanena bwino.”
40 Adanena vimwevi ndawa alibe kukhala pomwe na chikanga kuti amubvunze mbvunzo olo m’bodzi.
41 Pamwapo iye adawabvunza kuti: “Ndawa chani wanthu anena kuti Khrisitu ni mwana wa Davide?
42 Ndawa Davide muyo adanena m’bukhu ya Masalimo kuti: ‘Yahova* adauza Ambuya wangu kuti: “Khala kudjanja yangu yamakulu
43 mpakana nidzaikhe azondi wako kuti akhale chopondapo mapazi yako.”’
44 Pakuti Davide adamuchemera kuti Ambuya, manje vinkukwanisika tani kuti akhale mwana wake?”
45 Patsogolo pake wanthu wose ankubvesera, iye adauza wopfunzira wake mwawo kuti:
46 “Chenjerani na alembi omwe akonda kufambafamba ali vale mikhanjo komasoti akonda kumonisiwa m’mabazali. Akonda pomwe kukhala m’mipando yakutsogolo* m’masunagoge komasoti m’malo yolemekezeka maninge pa chakudya cha kumaulo.
47 Iwo atengera chuma* akazi wamasiye ndipo apereka mapemphero yataliyatali pakufuna kudziwonesera. Wanthu mwawa adzapasiwe chilango chowawa maninge.”
Mawu ya m’nyantsi
^ Panango kuti: “kwa wanthu woyambirira.”
^ Panango kuti: “vabwino.”
^ Onani matanthauzo ya mawu yanango.
^ Onani matanthauzo ya mawu yanango.
^ Panango kuti: “yabwino.”
^ Panango kuti: “nyumba.”
