Wonembewa na Luka 21:1-38
21 Manje padakwiza maso, adawona wanthu wolemera ankuponya vopereka vawo mosungira vopereka.
2 Pamwapo adawona nkazi munango wamasiye wosauka ankuponya tukobiri tuwiri tung’ono, tochepa mphanvu maninge.
3 Ndipo iye adati: “Shuwa ninkukuuzani kuti nkazi wamasiye wosauka moyu, waponya zizinji kuposha anango wose omwe aponya kobiri zawo.
4 Ndawa wose mwawa aponya zomwe atapa pa zizinji zomwe anazo, koma mayi uyu, mu umphawi wake, waponya zose zomwe zidakamuthandiza pa moyo wake.”
5 Nthawe inango, pomwe wanthu angayankhula va kachisi, momwe adamukhuzisira na minyala yabwino maninge komasoti mphaso zoperekewa kwa Mulungu,
6 iye adanena kuti: “Kunena va vinthu vomwe mukuviona ivi, ntsiku zidzafike pomwe padzasalelini mwala uliwose padzulu pa mwala unzake womwe udzagwesewelini.”
7 Manje adamubvunza kuti: “Mpfunzisi, ko nilini pomwe vinthu vimwevi vidzachitike, ndipo chizindikiro chowonesa kuti nthawe yakuti vinthu vimwevi vichitike yasala pang’ono chidzakhale chani?”
8 Iye adadawira kuti: “Samalani kuti osati adzakusokereseni, ndawa azinji adzabwere mu dzina yangu nkumbanena kuti: ‘Khrisitu ule ndine,’ komasoti adzanene kuti: ‘Nthawe ire yafendera.’ Ayi kudzawatewera.
9 Ndipo mukadzabva zungo ya nkhondo na vipiringu, ayi kudzachita mantha. Ndawa vimwevi vifunika kuyamba kuchitika, koma mapeto yadzafikelini nthawe mwiyo.”
10 Patsogolo pake adawauza kuti: “Ntundu udzaukirane na ntundu unango ndipo ufumu udzaukirane na ufumu unango.
11 Kudzachitike vivomezi vamphanvu ndipo kudzakhale miliri na njala m’malo yosiyanasiyana. Kudzaoneke vinthu vopasa mantha ndipo kudzulu kudzaoneke vizindikiro vodabwisa.
12 Koma vinthu vose vimwevi vikanati vachitika, wanthu adzakuphateni nkukudzudzani ndipo adzakuperekeni kumasunagoge na kudjeri. Adzakuyendeseni kwa mafumu na kwa magovernador ndawa ya dzina yangu.
13 Vimwevi vidzakupaseni mpata wakuti muchitire umboni.
14 Ndipomwapa tsimikizirani m’mitima yanu kuti ayi kuti muchite kukonzekera vati mukadawire pakudziteteza,
15 ndawa inepano nidzakuuzeni mawu yakuti muyankhule komasoti nidzakupaseni nzeru zomwe wanthu wose wokutsutsani adzakwaniselini kuzilamba panango kuzitsutsa.
16 Komasoti azibereki wanu chaiwo, azibale wanu, wanthu wa m’banja mwanu na anzanu, adzakuperekeni* ndipo adzaphe anango pa imwepo.
17 Wanthu wose adzazondane namwe ndawa ya dzina yangu.
18 Koma olo tsitsi ibodzi yokha ya mumsolo mwanu idzadzongekelini.
19 Peno imwepo mudzapirire, mudzagumane* moyo.
20 Koma mukadzawona kuti magulu yankhondo yazungulira Yerusalemu, mudzadziwe kuti thaundi mweyi yasala pang’ono kudzongewa.
21 Pamwapo omwe ali mu Yudeya adzayambe kuthawira kumapiri, ndipo omwe ali nkati mwa thaundi mwiyo adzabulemo. Omwe ali m’madera yakumuyi ayi kuti adzangene mu thaundi mwiyo,
22 ndawa mwizi ni ntsiku zopereka chiweruzo kuti vose vomwe vidanembewa vikwanirisiwe.
23 Tsoka kwa akazi wamimba na woyamwisa wana mu ntsiku zimwezo! Ndawa mu dziko mweyi mudzakhale mabvuto yakulu na ukali pa wanthu mwawa.
24 Wanthu adzaphewe na vibemba komasoti adzatengewe nkuyendesewa ku ukapolo kumakhaindi yanango yose. Wanthu wa makhaindi yanango adzapondeponde Yerusalemu mpakana nthawe zoikhiwiratu za wanthu wa makhaindi yanango mwawo zidzakwane.
25 Komasoti padzakhale vizindikiro pa dzuwa, mwezi na nyenyezi. Padziko yapasi wanthu wa makhaindi yanango adzadzudzike ndawa yosowa chochita pakuwona kuti nyanja inkuchita zungo na kuwinduka.
26 Wanthu adzakomoke ndawa ya mantha komasoti ndawa yodikhirira vomwe vichitikire dziko yapasi komwe kuli wanthu, pakuti mphanvu za kudzulu zidzagunduzike.
27 Pamwapo adzawone Mwana wa munthu ankubwera muntambo na mphanvu komasoti ulemerero ukulu.
28 Koma vinthu vimwevi vikadzayamba kuchitika, mudzaimirire na kuimisa misolo yanu, ndawa chipulumuso chanu chafendera.”
29 Padanena vimwevi, adawauza chitsanzo kuti: “Onesesani muti wa nkuyu na miti yanango yose.
30 Mukaona miti yachita mabvokoko, mudziwa kuti manje chisalo chafendera.
31 Chibodzibodzimbo imwepo, mukadzawona vinthu vimwevi vinkuchitika, mudzadziwe kuti Ufumu wa Mulungu wafendera.
32 Shuwa ninkukuuzani kuti m’badwo uyu udzamalelini wose kufa, mpaka vinthu vose vidzachitike.
33 Kudzulu na dziko yapasi vidzachoke, koma mawu yangu yadzakhalepo mpakana kalekale.
34 Koma samalani kuti mitima yanu ayi kuti ilemedwe na kudya maninge, kumwa maninge komasoti nkhawa za moyo, kuti ntsiku mwiyo ingadzakufikireni modzidzimusa
35 ninge nsampha. Ndawa idzafikire wose wokhala padziko yose yapasi.
36 Ndipomwapa khalani maso ndipo mumbapemphere mogwigwirira nthawe zose, kuti mudzakwanise kuthawa vinthu vose vimwevi vomwe vifunika kuchitika, komasoti kuti mudzakwanise kuimirira pamaso pa Mwana wa munthu.”
37 Masikati Yesu angapfunzisa mu kachisi, koma usiku ambayenda kukagona kuphiri ya Maolivi.
38 Ndipo wanthu wose ambabesera machibese maninge kuyenda kwa iye kukachisi kuti akamubvesere.
