Wonembewa na Luka 22:1-71
-
Wantsembe ankupangana vakuti aphe Yesu (1-6)
-
Ankukonzekera Pasika womalizira (7-13)
-
Yesu adayambisa Chakudya chamaulo cha Ambuya (14-20)
-
“Wati adzanipereke nili naye pampano pameza” (21-23)
-
Adagegedzana maninge pankhani yakuti nkulu ni mbani (24-27)
-
Yesu adachita nawo pangano ya Ufumu (28-30)
-
Yesu adaneneratu kuti Petulo adzamulambe (31-34)
-
Adawauza kuti akonzekere ndipo adakwanisa vibemba viwiri (35-38)
-
Pemphero ya Yesu pa Phiri ya Maolivi (39-46)
-
Yesu adamangiwa (47-53)
-
Petulo ankulamba Yesu (54-62)
-
Yesu ankunyozewa (63-65)
-
Ankuboneresewa mu Tiribunali ya Sanihedirini (66-71)
22 Manje Chikondwerero cha Mikate Yalibe Vofufumisa, chomwe chimbadziwika pomwe kuti Pasika, chenze chidafendera.
2 Komasoti antsembe akulu na alembi ambafagafaga njira yabwino yakuti aphere Yesu, ndawa ambagopa wanthu.
3 Koma Satana adangena mwa Yudasi, yemwe ambadziwika kuti Isikariyoti, m’bodzi pa wopfunzira 12 wale.
4 Iye adayenda kukakambirana na wantsembe akulu na wonyang’anira kachisi va momwe angamuperekere kwa iwo.
5 Iwo adakondwa ndipo adabverana kuti amupase kobiri za siliva.
6 Pamwapo iye adabvuma, ndipo adayamba kufagafaga mpata wabwino kuti amupereke kwa iwo palibe gulu ya wanthu pafupi.
7 Manje ntsiku ya Chikondwerero cha Mikate Yalibe Vofufumisa idafika, ntsiku yomwe ntsembe ya Pasika imbafunika kuperekewa.
8 Yesu adatumiza Petulo na Yohani nkuwauza kuti: “Yendani mukatikonzere Pasika kuti tidye.”
9 Iwo adamubvunza kuti: “Ko mukufuna tikakukonzereni kuponi?”
10 Iye adawadawira kuti: “Mukangena mu thaundi, mwamuna munango akagumane namwe ali senze mtsuko wa madzi. Mukamulondole mpakana m’nyumba yomwe akangene.
11 Ndipo mukauze munikachiro wa nyumba kuti: ‘Mpfunzisi wanena kuti: “Chipinda cha alendo chili kuponi momwe inepano ningadyeremo Pasika pabodzi na wopfunzira wangu?”’
12 Pamwapo munthu muyo akakuoneseni chipinda chikulu cha mdzulu chokonzewa bwino. Mukakonzere mumo.”
13 Pamwapo adanyamuka ndipo vidachitikadi ndendende ninge momwe adawauzira. Ndipo adakonza vinthu zose vofunika pa Pasika.
14 Nthawe paidakwana, adakhala pa meza yachakudya pabodzi na atumi wake.
15 Manje adawauza kuti: “Nakhala ninkufunisisa maninge kuti nidye Pasika muyu pabodzi na imwepo nikalibe kuyamba kudzudzika.
16 Ndawa ninkukuuzani kuti nidzadyelini pomwe Pasika mpakana kukwanirisika kwa vose vomwe Pasika moyu unkuimira mu Ufumu wa Mulungu.”
17 Mwapo adatambira khapu nkupemphera, patsogolo pake adati: “Tambirani khapu iyi, ndipo mumwe mose mopasirana.
18 Shuwa ninkukuuzani, kuyambira manje nidzamwelini chakumwa chochokera ku uva mpakana kubwera kwa Ufumu wa Mulungu.”
19 Patsogolo pake adatenga nkate. Padapemphera, adaunyemanyema nkuwapasa ndipo adati: “Nkate uyu unkuimira thupi yangu yomwe inkuperekewa ndawa ya imwepo. Mumbachite vimwevi pakunikumbukira.”
20 Adachita chibodzibodzi na khapu padamaliza kudya chakudya chakumaulo mwicho. Iye adati: “Khapu iyi inkuimira pangano inyowani yomwe idakhazikisiwa pakuphatisira basa magazi yangu, yomwe yadzakhesewe ndawa ya imwepo.
21 Koma onani! Wonipereka ninaye pabodzi pameza pano.
22 Ndawa Mwana wa munthu achoke mobverana na vomwe vidaneneweratu. Koma tsoka kwa munthu yemwe akumupereka!”
23 Pamwapo adayamba kukambirana wokhawokha va yemwe adakonza chiwembu chimwicho.
24 Patsogolo pake adayamba kugegedzana va yemwe wenze nkulu maninge.
25 Koma Yesu adawauza kuti: “Mafumu ya wanthu wa makhaindi yanango yachita ulamuliro pa wanthu wawo, ndipo omwe anamphanvu pa wanthu mwawo adziwika kuti ni wanthu omwe achitira anango vabwino.
26 Imwepo ayi kuti mukhale teno. Koma yemwe ali nkulu maninge pakati panu akhale ninge mng’ono maninge pa imwepo, ndipo yemwe ni mtsogoleri akhale ninge wotumikira.
27 Ko nkulu ni mbani, yemwe akudya pameza panango yemwe akutumikira? Ko ni ulelini yemwe akudya pameza? Koma inepano nili pakati panu ninge wotumikira.
28 Koma podiya viri teno, imwepo mwakhala na inepano m’mayesero yangu.
29 Ndipomwapa ninkuchita namwe pangano, ninge momwe Ababa wangu wachitira pangano ya ufumu na ine,
30 kuti mukadye na kumwa pameza yangu mu Ufumu wangu, komasoti kuti mukakhale m’mipando yachifumu nkumbaweruza madzinza 12 ya Izirayeli.
31 Simoni, Simoni! Shuwa Satana akufuna kuti mose imwepo akupepeteni ninge tirigu.
32 Koma ine nakupempherera kuti chikhulupiriro chako ayi kuti chimale. Ndipomwapa iwembo ukabwerera, ukalimbikise abale wako.”
33 Patsogolo pake iye adauza Yesu kuti: “Ambuya, ndine wokonzeka kuyenda namwe kudjeri panango kufa namwe pabodzi.”
34 Koma iye adati: “Nikukuuza iwepo Petulo, tambala akalibe kulira lero, unilambe katatu kuti unidziwalini.”
35 Yesu adauza pomwe wopfunzira mwawo kuti: “Pomwe nidakutumizani mulibe chikwama cha kobiri, chombo cha chakudya, panango ntsapato, ko mudasowa kanthu?” Iwo adati: “Neye!”
36 Patsogolo pake adawauza kuti: “Koma manje yemwe anachikwama cha kobiri achitenge, chibodzibodzimbo na chombo cha chakudya. Ndipo yemwe alibe chibemba agulise malaya yake yakunja nkugula chibemba.
37 Ndawa ninkukuuzani kuti vomwe vidanembewa vifunika kukwanirisiwa kwa ine, vakuti: ‘Iye adaikhiwa mu gulu ya wanthu wosabvera malamulo.’ Viri teno ndawa vomwe vidanenewa pa nkhani ya ine vikukwanirisiwa.”
38 Pamwapo iwo adati: “Ambuya, onani! Tinavibemba viwiri ivi.” Iye adawauza kuti: “Vimwevi ni vokwana.”
39 Padachoka kumuko adayenda ku phiri ya Maolivi ninge momwe ambachitira nthawe zose ndipo wopfunzira wake nawombo adamutewera.
40 Padafika pamalo mwayo adauza wopfunzira mwawo kuti: “Pitirizani kupemphera kuti osati muyesewe.”
41 Iye adachoka pomwe penze wopfunzira mwawo nkuyenda kansenga, kutalimpha kwake ninge pomwe pangagwere mwala munthu akauponya. Kumuko adagwada nkuyamba kupemphera,
42 kuti: “Ababa, peno mukufuna, nichosereni khapu iyi. Koma vomwe mukufuna vichitike osati vofuna vangu.”
43 Padateno mngelo wochokera kudzulu adawonekera kwa iye nkumulimbikisa.
44 Koma adawawiwa maninge mumtima mwake, mwakuti adapitiriza kupemphera na ntima wose ndipo kaluma wake ambawoneka ninge madontho yamagazi yomwe yakugwera pasi.
45 Padachoka pomwe ambapempherera apo nkuyenda kwa wopfunzira wale, adawagumana ankugona ndawa enze wofoka na wokwinyirira.
46 Iye adawauza kuti: “Ndawa chani munkugona? Mukani ndipo mupitirize kupemphera kuti muleke kuyesewa.”
47 Akalibe kumaliza kuyankhula, padafika gulu ya wanthu pabodzi na Yudasi, m’bodzi wa wopfunzira 12 wale, akuwatsogolera. Manje Yudasi adayenda pomwe penze Yesu kuti akamubejali.
48 Koma Yesu adamubvunza kuti: “Yudasi, ko ukupereka Mwana wa munthu na bejo?”
49 Wanthu omwe enze naye pafupi padaona vomwe vimbachitika, adati: “Ambuya, ko tiwateme na chibemba?”
50 M’bodzi pa iwo adatemadi kapolo wa nkulu wa antsembe nkugwatiratu dzitu yake yakumakulu.
51 Koma Yesu adati: “Ayi kuchita vimwevi.” Ndipo adaphata dzitu ire nkumupolesa.
52 Manje Yesu adabvunza antsembe akulu, onyang’anira kachisi na akulu omwe adabwera kudzamuphata kuti: “Ndawa chani mwabwera na vibemba na vimibonga ninge mukukamenyana na chigananga?
53 Ntsiku na ntsiku nenze namwe mu kachisi koma mulibe kuniphata. Koma ino manje ni nthawe yanu komasoti nthawe ya ulamuliro wa mdima.”
54 Pavidateno adamuphata nkuyenda naye ndipo adamungenesa m’nyumba ya nkulu wa antsembe. Koma Petulo ambawalondola ali patali.
55 Padagasa moto pamuyi mwapo na kukhala pasi wose pabodzi, Petulo nayembo adakhala nawo pamwapo.
56 Koma mtsikana munango nyabasa, padamuwona alikhale pafupi na moto wogaka, adamunyang’anisisa nkunena kuti: “Akulu awa enze naye pabodzi.”
57 Koma iye adalamba kuti: “Mtsikana iwe, inepano ninkumudziwalini moyu.”
58 Pakadapita kanthawe pang’ono, munthu munango adamuwona nkunena kuti: “Iwembo uli mugulu ya wopfunzira wake.” Koma Petulo adati: “Munthu iwe, neye ndinepanolini.”
59 Paidapita pafupifupi ora ibodzi, munthu munango pomwe adayamba kunena motsimikizira kuti: “Shuwa nikukaikalini, munthu moyu wenze naye pabodzi, komasoti moyu ni wa ku Galileya!”
60 Koma Petulo adati: “Munthu iwe, ine nikudziwalini vomwe unkunena.” Nthawe mwiyoletu akalibe kumaliza kuyankhula, tambala adalira.
61 Pavidateno Ambuya adacheuka nkunyang’ana Petulo, ndipo Petulo adakumbukira mawu yomwe Ambuya adamuuza yale, yakuti: “Tambala akanati kulira lero, unilambe katatu.”
62 Patsogolo pake Petulo adabula panja nkuyamba kulira mowawiwa ntima maninge.
63 Manje amuna omwe adaphata Yesu wale adayamba kumuchitira voipa komasoti kumumenya.
64 Iwo ambamubisa kunkhope nkumbamubvunza kuti: “Lotera. Wakumenya ni mbani?”
65 Ndipo adapitiriza kunena vinthu vizinji vomunyoza.
66 Patsogolo pake pakudachena, gulu ya akulu, kuphatanidzapo antsembe akulu komasoti alembi, adasonkhana pabodzi, ndipo adamutenga nkuyenda naye ku Tiribunali Ikulu ya Ayuda. Kumuko iwo adati:
67 “Tiuze peno ndiwe Khrisitu.” Koma iye adawadawira kuti: “Olo nikuuzeni, mukhulupirirelini.
68 Komasoti nichikubvunzani, mungakwaniselini kunidawira olo pang’ono.
69 Koma kuyambira manjeuno mpaka kutsogolo, Mwana wa munthu adzakhale kudjanja yamakulu yamphanvu ya Mulungu.”
70 Padanena vimwevi wose adati: “Ko ndiye kuti ndiwe Mwana wa Mulungu?” Iye adawadawira kuti: “Imwembo mukunena mwekha kuti ndinedi.”
71 Iwo adati: “Tinkufuniranyi pomwe umboni unango? Pamwapa tadzibvera tekha kuchokera pakamwa pake.”
