Wonembewa na Luka 23:1-56
23 Pamwapo gulu yose idanyamuka pabodzi nkuyenda na Yesu kwa Pilato.
2 Pamwapo adayamba kumunamizira kuti: “Ise tagumana munthu uyu ankupandusa ntundu wathu, ankulambiza wanthu kuti ayi kuti ambatsonkhe mtsonkho kwa Kaisara komasoti ankunena kuti ni Khrisitu mpfumu.”
3 Manje Pilato adamubvunza kuti: “Ko ndiwe Mpfumu ya Ayuda?” Iye adadawira kuti: “Viriteno, ninge momwe mwanenera.”
4 Patsogolo pake, Pilato adauza antsembe akulu na gulu ya wanthu mwawo kuti: “Ninkuchiwonalini chomwe munthu moyu waphonya.”
5 Koma iwo adangingimira kunena kuti: “Moyu ankusokoneza wanthu mwa kupfunzisa mu Yudeya mose, kuyambira ku Galileya mpakana kudzafika pomwe kuno.”
6 Padabva vimwevi, Pilato adabvunza peno munthu moyu ni wa ku Galileya.
7 Manje padadziwa kuti ankuchokera mudera yomwe imbatongewa na Herode, adamutumiza kwa Herode yemwe mu ntsiku mwizo wenze ku Yerusalemu.
8 Herode padawona Yesu adakondwa maninge. Kwa nthawe itali, ambafunisisa kuti awone Yesu ndawa wenze adabva vizinji va iye. Komasoti ambadikhirira kuti awone chizindikiro chomwe iye angachite.
9 Ndipomwapa, adayamba kumubvunza vinthu vizinji, koma iye alibe kumudawira.
10 Koma antsembe akulu na alembi ambandonyamukanyamuka nkumbamunamizira mwaukali.
11 Manje Herode pabodzi na masocha yake adamuchitira vinthu voipa. Adamunyoza pa kumuvazika chovala chokhuza maninge, patsogolo pake adamutumiza pomwe kwa Pilato.
12 Ntsiku mwiyo Herode adakhala munzake wa Pilato, koma vimwevi vikalibe vachitika, iwo ambazondana maninge.
13 Manje Pilato adasonkhanisa antsembe akulu, olamulira na wanthu anango
14 nkuwauza kuti: “Imwepo mwabweresa munthu uyu kwa inepano na mulandu wakuti ankulimbikisa wanthu kupanduka. Koma mwawona mwekha! Inepano namubvunza pamaso panu ndipo nilibe kumugumana na chifukwa chonichitisa kuti niwone kuti anamilandu yomwe imwepo munkumunamizira.
15 Ndipo olo Herode alibe kumugumana na mulandu, ndipomwapa wamubwezera kwa ise. Shuwadi, moyu alibe kuchita chilichose chofunika chilango cha impfa.
16 Ndipomwapa nindomukwapula nkumumasula.”
17 * ——
18 Koma gulu yose idakuwa kuti: “Moyu aphewe basi, koma ise timasulireni Baraba!”
19 (Munthu moyu adaikhiwa mudjeri ndawa ya kupandukira boma komwe kudachitika mu thaundi mweyo, komasoti ndawa yakuti adapha munthu.)
20 Pilato adayankhula nawo pomwe kachiwiri ndawa ambafunisisa kuti amasule Yesu.
21 Manje wanthu mwawo adayamba kukuwa kuti: “Amanikiwe muyo!* Amanikiwe muyo!”
22 Adawabvunza kachitatu kuti: “Ndawa chani? Ko moyu waphonya chani? Ine nilibe kumugumana na chifukwa chilichose chomuphera. Ndipomwapa nindomukwapula na kumumasula.”
23 Padabva vimwevi adamuchichimiza mwa kuchita kukuwa kuti Yesu aphewe basi. Wanthu mwawo ambakuwa mwamphanvu mwakuti Pilato adandobvuma.
24 Pamwapo Pilato adamutonga mobverana na vomwe wanthu mwawo ambafuna.
25 Iye adamasula munthu yemwe wanthu mwawo ambafuna yemwe adaikhiwa mudjeri ndawa ya mulandu wopandukira boma komasoti kupha munthu. Koma Yesu adamupereka m’manja mwawo kuti achite vomwe iwo ankufuna.
26 Pomwe ambayenda naye, iwo adaphata Simoni wa ku Kurene, yemwe ambachokera kudera ya kumuyi. Iwo adamusenzesa muti wodzudzikirapo* kuti autakule nkumbalondola pambuyo pa Yesu.
27 Gulu ikulu ya wanthu imbamulondola kuphatanidzapo azimayi azinji womwe ambadzigugudza pachifuwa ndawa ya kukwinyirira komasoti ambamulirira.
28 Yesu adacheukira azimayi mwawo nkunena kuti: “Imwe wana akazi wa Yerusalemu, lekani kunilirira. Koma mudzilirire mwekha na wana wanu.
29 Ndawa ntsiku zikubwera pomwe wanthu adzanene kuti: ‘Wokondwa ni akazi alibe wana, akazi womwe alibe kuberekako komasoti akazi womwe alibe kuyamwisako!’
30 Mu ntsiku zimwezo, iwo adzayambe kuuza mapiri kuti: ‘Tigwereni!’ ndipo adzauze mapiri yang’onoyang’ono kuti: ‘Tifuchireni!’
31 Peno ankuchita vinthu vimwevi na muti womwe ukali uwisi, ko tani muti moyu ukadzauma?”
32 Wanthu mwawa adatengasoti amuna anango awiri womwe enze vigananga, kuti akawaphe pabodzi na Yesu.
33 Manje padafika pa malo yochemerewa Chibade, adamukhomerera pamuti pabodzi na vigananga vile. M’bodzi adamumanika kusaidi yake ya kumakulu ndipo munango kumadzere kwake.
34 Koma Yesu adanena kuti: “Ababa, akhululukireni, ndawa ankudziwalini vomwe ankuchita.” Iwo adagawana vovala vake mwakuchita maere.
35 Wanthu adandoima nkumbanyang’anira vomwe vimbachitika. Koma atsogoleri ambamunena monyoza kuti: “Anango adakwanisa kuwapulumusa, musiyeni adzipulumuse yekha, peno alidi Khrisitu wa Mulungu, Wosankhuliwa.”
36 Olo masocha nayombo yambamuchitira voipa, yangabwera kudzamupasa vinyu wowawasha
37 nkumbanena kuti: “Peno ndiwe Mpfumu ya Ayuda, dzipulumuse wekha.”
38 Padzulu pake adanembapo mawu yakuti: “Uyu ni Mpfumu ya Ayuda.”
39 Pamwapo, m’bodzi wa vigananga vomwe vidamanikiwa naye pabodzi vile, adayamba kumuyankhulira vinthu voipa kuti: “Ko iwepo ndiwelini Khrisitu? Dzipulumuse wekha pabodzi na ise.”
40 Munzake ule pakudawira adamutsuula kuti: “Ko iwembo unkugopalini Mulungu pakuwona kuti unkutambira chilango cholingana na cha munthu moyu?
41 Isepano mpake kulangiwa tene, ndawa tinkutambira vomwe timbafunika kutambira mobverana na vomwe tidachita. Koma munthu uyu alibe kuphonya chilichose.”
42 Patsogolo pake adanena kuti: “Yesu mukanikumbukire mukakangena mu Ufumu wanu.”
43 Yesu adamuuza kuti: “Shuwa ninkukuuza lero, iwe udzakhale na ine mu Paradaiso.”
44 Apa nkuti nthawe ili cha m’ma 12 ora, koma kudachita mdima dziko yose mpaka 15 ora,
45 ndawa dzuwa idachita mdima. Panthawe mwiyo, nguwo yogwatiza ya mu nyumba yopatulika idang’ambika katinakati kuchokera padzulu mpaka pasi.
46 Patsogolo pake Yesu adakuwa maninge kuti: “Ababa, ninkupereka mzimu wangu m’manja mwanu!” Padanena vimwevi adamalizika.*
47 Padawona vomwe vidachitika, mtsogoleri wa masocha adayamba kutamanda Mulungu kuti: “Shuwadi, munthu moyu wenze wolungama.”
48 Wanthu wose womwe adasonkhana kumuko kudzanyang’anira vomwe vimbachitika, padawona vose vomwe vidachitika, adabwerera kwawo ankudzigugudza pachifuwa.
49 Wanthu wose womwe angamudziwa adaimirira patali komasoti azimayi womwe ambafamba naye kuchokera ku Galileya enze pamwapo ndipo adawona vinthu vimwevi.
50 Manje penze mwamuna munango dzina yake Yosefe yemwe wenze wa mu Tiribunali Ikulu ya Ayuda. Munthu moyu wenze wabwino komasoti wolungama.
51 (Iye alibe kubverana na chiwembu chawo komasoti vomwe adachita.) Yosefe wenze wochokera ku Arimateya, thaundi ya wanthu wa ku Yudeya ndipo ambadikhirira Ufumu wa Mulungu.
52 Iye adayenda kwa Pilato kukakumbira thupi* ya Yesu.
53 Pamwapo adaibulusa nkuikulungira na nguwo yabwino maninge ndipo adaiyikha m’manda* yomwe adayagoba ku chimwala, ndipo yenze yakalibe kuikhiwako munthu.
54 Manje yenze Ntsiku Yokonzekera, ndipo Satade yenze idasala pang’ono kuyamba.
55 Koma azimayi womwe adabwera na Yesu kuchokera ku Galileya, adamulondola ndipo adawona manda* mwayo komasoti momwe thupi yake adaiyikhira.
56 Padateno adabwerera kukakonza vonunkhirisa na mafuta yonunkhira koma pa ntsiku ya Satade adapumula mobverana na chilamulo.
Mawu ya m’nyantsi
^ Panango kuti: “mukhomerereni pa muti wodzudzikirapo.”
^ Onani matanthauzo ya mawu yanango.
^ Panango kuti: “adatsindira moyo.”
^ Mawu yeke chaiyo ni “chitanda.”
^ Panango kuti: “manda yachikumbuso.”
^ Panango kuti: “manda yachikumbuso.”
