Wonembewa na Luka 24:1-53
24 Koma pa ntsiku yoyamba ya sondo mwiyo, azimayi wale adabesera maninge kuyenda kumanda* kumuko, alitakule vonunkhira vomwe adakonza vire.
2 Koma adagumana mwala wakunkhuliziwa pamanda* mwapo,
3 ndipo padangena m’manda mumo thupi ya Ambuya Yesu alibe kuigumanamo.
4 Padasowa vochita na vimwevi, adandowona amuna awiri ali vale vovala voyetima ali imirire pambali pawo.
5 Azimayi mwawa adachita mantha ndipo adajolimira pasi. Patsogolo pake amuna mwawo adawabvunza kuti: “Ndawa chani munkufagafaga munthu wamoyo pakati pa wanthu wakufa?
6 Iye kuno kulibe, wamukisiwa. Kumbukirani vomwe adakuuzani pomwe wenze ku Galileya.
7 Pale adanena kuti Mwana wa munthu ankufunika kuperekewa m’manja mwa wanthu wochimwa na kuphewa pakumumanika pa muti nkumuka pa ntsiku yachitatu.”
8 Pamwapo adakumbukira mawu yake yale
9 ndipo adachoka kumanda* kumuko nkubwerera kukanena vose vimwevi kwa wopfunzira 11 wale na kwa anango wose.
10 Azimayi mwawa enze Mariya wa ku Magadala, Jowana na Mariya mayi wake wa Yakobo. Komasoti azimayi anango wose womwe enze nawo pabodzi ambauza atumi vinthu vimwevi.
11 Koma kwa iwo, vomwe angawauza ivo vimbawoneka ninge vilibe basa ndipo alibe kuwakhulupirira azimayi mwawo.
12 Koma Petulo adanyamuka nkuthamangira kumanda* kumuko, ndipo padasuzira nkati, adandowona nguwo zokhazokha. Pamwapo adachoka ali wodabwa maninge na vomwe vidachitika.
13 Koma pa ntsiku mweyi, awiri wa iwo enze pa ulendo woyenda ku muyi unango wochemerewa Emau, pa nsenga wa 11 kilometro kuchokera ku Yerusalemu.
14 Iwo ambakambirana vinthu vose vomwe vidachitika.
15 Adakali kukambirana vinthu vimwevi, Yesu adafika nkuyamba kufamba nawo pabodzi.
16 Koma alibe kumuzindikira.
17 Iye adawabvunza kuti: “Ko mukukambirana nkhani zanyi pomwe munkufamba pa nsewu pano?” Iwo adandoimirira pulu ali wokwinyirira.
18 Podawira, m’bodzi wa iwo dzina yake Keleopa adamubvunza kuti: “Ko ukhala wekhawekha mu Yerusalemu ninge mulendo, mwakuti ukudziwalini vinthu vomwe vachitika mumo mu ntsiku zimwezi?
19 Iye adawabvunza kuti: “Vinthu vake viponi?” Iwo adamuuza kuti: “Vinthu vofotokoza va Yesu wa ku Nazareti, yemwe wenze mneneri wamphanvu mu vochita komasoti m’mawu pamaso pa Mulungu na wanthu wose.
20 Komasoti vofotokoza momwe antsembe wathu akulu na olamulira momwe adamuperekera kwa wanthu omwe adamuweruza kuti aphewe ndipo adamukhomerera pa muti.
21 Koma ise timbadikhira kuti munthu muyu ndiye wati adzapulumuse Izirayeli. Kuingizira pamwapa, lero ni ntsiku yachitatu kundochokera pomwe vidachitika vinthu vimwevi.
22 Komasoti azimayi anango mu gulu yathu mweyi atidabwisa maninge. Iwo enze abesera maninge kumanda* kumuko,
23 koma paona kuti thupi yake alibe kuigumana, abwerera nkumbanena kuti aona masomphenya ya angelo omwe awauza kuti iye anamoyo.
24 Komasoti anango mu gulu yathu mweyi enze ayenda kumanda* kumuko, ndipo agumanadi kuti m’manda mumo mulibe aliyese, mobverana na vomwe amayi mwawa anena, koma iye alibe kumuwona.”
25 Pamwapo iye adawauza kuti: “Wanthu mulibe nzeru imwe komasoti okaikirakaikira pa vinthu vose vomwe aneneri adanena!
26 Ko venzelini vofunika kuti Khristu abve vowawa vose vimwevi nkungena mu ulemerero wake?”
27 Padateno adayamba kuwafotokozera nkhani zofotokoza va iye m’Malemba yose, kuyambira na vonemba va Mose komasoti vose vomwe aneneri adanemba.
28 Ndipo padasala pang’ono kufika m’muyi womwe ambayenda, iye adachita ninge ankupitirira na ulendo wake.
29 Koma iwo adamungingimira kuti: “Naboni tipitirize kukhala pabodzi, ndawa kunja kwayamba kudoka ndipo ntsiku yasala pang’ono kumala.” Padanena vimwevo adangena m’nyumba ndipo adakhala nawo.
30 Pomwe angadya nawo chakudya, adatenga mkate nkuudalisa, patsogolo pake adaunyemanyema nkuyamba kuwagawira.
31 Padawona vimwevi, maso yawo yadafungukiratu ndipo adamuzindikira, koma iye adandosowa.*
32 Iwo adayamba kuuzana kuti: “Ko si pale tadabwisiwa maninge muntima mwathu pomwe ambayankhula nase mu nsewu na kumbatifotokozera Malemba mobveka bwino?”
33 Pa nthawe mwiyoletu adanyamuka nkubwerera ku Yerusalemu. Kumuko adakagumana wopfunzira 11 wale komasoti wanthu anango womwe enze adasonkhana nawo pabodzi.
34 Iwo adawauza kuti: “Shuwadi Ambuya amuka kwa akufa ndipo aonekera kwa Simoni!”
35 Nawombo adafotokoza vomwe vidachitika pa nsewu komasoti momwe iwo adamuzindikirira pomwe adanyemanyema mkate.
36 Pambayankhula vimwevi, Yesu adaimirira pakati pawo ndipo adawauza kuti: “Ntendere ukhale namwe.”
37 Koma pakuti iwo adadzidzimuka maninge na kuchita mantha, angaganiza kuti awona mzimu.
38 Pamwapo iye adawabvunza kuti: “Ndawa chani munkushupika maganizo komasoti kukaikira m’mitima yanu?
39 Onani manja na mapazi yangu, mutsimikize kuti ndinedi. Nigumirireni muwone, ndawa mzimu ulibe nyompfu na mabonzo ninge yangu yomwe mukuyaona aya.”
40 Pomwe ambanena vimwevi, adawawonesa manja na mapazi yake.
41 Koma pakuti iwo ambakhulupiriralini ndawa ya kukondwa na kudabwa, iye adawabvunza kuti: “Ko munachakudya chilichose pano?”
42 Pamwapo adamupasa pitsi* ya ntsomba yowotcha,
43 ndipo iye adatambira nkudya wose akuwona.
44 Patsogolo pake adawauza kuti: “Penenze namwe pabodzi nidakuuzani mawu yakuti, vose vomwe vidafotokozewa pa nkhani ya ine vomwe vidanembewa mu Chilamulo cha Mose, vomwe aneneri adanemba komasoti vomwe vidanembewa m’Masalimo vifunika kukwanirisiwa.”
45 Pavidateno adafunguliratu maganizo yawo kuti abvese tanthauzo ya Malemba
46 ndipo adawauza kuti: “Malemba yanena kuti: Khrisitu adzadzudzike ndipo ntsiku yachitatu adzamuke kwa wakufa,
47 ndipo mu dzina yake, ntontholo wakuti wanthu alape machimo yawo kuti akhululukiriwe udzalalikiriwe kwa wanthu wa makhaindi yose, kuyambira ku Yerusalemu.
48 Imwepo mudzakhale mboni za vinthu vimwevi.
49 Ndipo ine nidzakutumizireni chomwe Ababa wangu adakupolomisani. Koma imwepo mudzapitirize kukhala mu thaundi mweyi mpakana mudzatambire mphanvu zochokera kudzulu.”
50 Pamwapo adawatsogolera mpakana kukafika nawo ku Betaniya ndipo kumuko adakweza manja nkuwadalisa.
51 Padawadalisa, adasiyana nawo ndipo Mulungu adamutenga kuyenda naye kudzulu.
52 Iwo adamugwadira nkubwerera ku Yerusalemu ali wokondwa maninge.
53 Nthawe zose iwo enze mukachisi nkumbatamanda Mulungu.
Mawu ya m’nyantsi
^ Panango kuti: “manda yachikumbuso.”
^ Panango kuti: “manda yachikumbuso.”
^ Panango kuti: “manda yachikumbuso.”
^ Panango kuti: “manda yachikumbuso.”
^ Panango kuti: “manda yachikumbuso.”
^ Panango kuti: “manda yachikumbuso.”
^ Panango kuti: “adanyangalika; adasowa modabwisa.”
^ Panango kuti: “duntswa.”
