Wonembewa na Luka 4:1-44
4 Pamwapo Yesu adachoka ku Yorodano ali dzadziwe na mzimu uchena, ndipo mzimu muyo udamutenga nkumuyendesa kumalo yosiyanasiyana muchipululu
2 kwa ntsiku 40, komwe angayesewa na Ndyerekezi. Ntsiku zose zimwezo alibe kudya chilichose, ndipo pazidamala ntsiku mwizo adabva njala.
3 Ndyerekezi padawona vimwevi, adamuuza kuti: “Peno ndimwedi mwana wa Mulungu, uzani mwala uyu kuti usanduke nkate.”
4 Koma Yesu adamudawira kuti: “Malemba yanena kuti: ‘Munthu angakhalelini na moyo na chakudya chokha.’”
5 Pamwapo adayenda naye padzulu ndipo adamuwonesa maufumu yose ya padziko yapasi mu kanthawe kang’onong’ono.
6 Patsogolo pake Ndyerekezi adamuuza kuti: “Nikupaseni ulamuliro pa maufumu yose mwaya na ulemerero wawo wose, ndawa udaperekewa kwa inepano ndipo ningakwanise kuupereka kwa aliyese yemwe ningakonde kumupasa.
7 Manje peno imwepo munganitumikireko kabodzi kokha basi, ulamuliro wose muyu udzakhale wanu.”
8 Pakudawira, Yesu adamuuza kuti: “Malemba yanena kuti: ‘Yahova* Mulungu wako ndiye yemwe ufunikira kumupempherera ndipo ufunika kutumikira iye yekha basi.’”
9 Patsogolo pake adayenda naye ku Yerusalemu ndipo adamukwiza padzulu pa mpanda wa kachisi n’kumuuza kuti: “Peno ndimwedi mwana wa Mulungu, mudzithuse pasi kuchokera pano.
10 Pale Malemba yanena kuti: ‘Iye adzalamule angelo wake va imwepo kuti akutetezeni,’
11 ndipo ‘adzakunyamuleni m’manja mwawo, kuti phazi yanu osati imenye mwala.’”
12 Pakudawira, Yesu adamuuza kuti: “Malemba yanena kuti: ‘Ayi kumbamuyesa Yahova* Mulungu wanu.’”
13 Pamwapo Ndyerekezi muyo padamaliza mayesero yose mwayo, adamusiya mpakana pa nthawe inango yabwino.
14 Manje Yesu adabwerera ku Galileya ali wodzala na mphanvu ya mzimu. Ndipo mbiri yake yabwino idabveka palipose m’madera yose yozungulira.
15 Komasoti adayamba kupfunzisa m’masunagoge yawo ndipo wanthu wose ambamulemekeza.
16 Patsogolo pake adayenda ku Nazareti komwe adakulira. Mobverana na chizolowezi chake pa ntsiku ya Satade, adangena mu sunagoge n’kuimirira kuti awerenge Malemba.
17 Pamwapo adamupasa mpukutu wa mneneri Yesaya. Iye adapfuthula mpukutu muyo nkugumana pomwe padanembewa mawu yakuti:
18 “Mzimu wa Yahova* uli pa inepano, ndawa iye adanidzodza kuti nilengeze ntontholo wabwino kwa wanthu wosauka. Adanituma kudzalengeza va ufulu kwa wanthu omwe adaphatiwa n’kutengewa kuyenda kudziko inango komasoti vakuti alombe ayambe kuwona. Adanituma kudzamasula woponderezewa kuti akhale pa ufulu,
19 na kudzalalikira va gole yobvumizika kwa Yahova.”*
20 Padateno adafunya mpukutu muyo nkuubwezera kwa otumikira mumo ndipo adakhala pasi. Maso ya wanthu wose omwe enze mu sunagoge mumo yenze pa iye nkumbamunyang’anisisa.
21 Patsogolo pake adayamba kuwauza kuti: “Lero lemba iyi, yomwe mwandoibva manjemanje apa yakwanirisiwa.”
22 Pavidateno, wose adayamba kumutamanda komasoti adadabwa na mawu yofika pamoyo yomwe yadachokera pakamwa pake, mwakuti adanena kuti: “Ko ni mwanalini wa Yosefe muyu?”
23 Padabva vimwevi, iye adawauza kuti: “Mosakaikira mudzanene mawu aya kwa ine kuti: ‘Wopolesa iwe, dzipolese wekha. Vinthu vizinji vomwe tidabva kuti udachita ku Kaperenao, vichitembo kwanu kuno.’”
24 Iye adanena kuti: “Shuwa ninkukuuzani, palibe mneneri yemwe atambiriwa kwawo.
25 Shuwa ninkukuuzani kuti: Mu Izirayeli mwenze akazi azinji wamasiye mu ntsiku za Eliya, pomwe kudzulu kudafungika kwa magole yatatu na minyezi 6, ndipo mudziko yose mwenze njala ikulu.
26 Koma Eliya alibe kutumiziwa kwa aliyese pa akazi mwawo. Koma adatumiziwa kwa nkazi wamasiye wa ku Zarefati mu dziko ya Sidoni.
27 Ndiposoti mwenze wakhate azinji mu Izirayeli panthawe ya mneneri Elisa. Olo nteno, pa wanthu wakhate mwawo palibe aliyese yemwe adachenesewa, koma Namani, wa ku Siriya.”
28 Manje wanthu wose omwe ambabvesera vimwevi mu sunagoge mumo adakalipa maninge.
29 Iwo adanyamuka ndipo mwakankulumize adamubulisira kunja kwa thaundi. Patsogolo pake adayenda naye padzulu pa phiri pomwe penze thaundi yawo kuti akamuthuse kuphompho.
30 Koma Yesu adandogwata na pakati pawo nkumbayenda.
31 Patsogolo pake adayenda ku Kaperenao, mu thaundi ya Galileya. Ndipo ambawapfunzisa pa ntsiku ya Satade.
32 Kumuko wanthu adadabwa maninge na kapfunzisidwe kake, ndawa ambayankhula mowonesa kuti anaulamuliro.
33 Manje mu sunagoge mumo mwenze munthu munango wophatiwa na mzimu, chiwanda chonyantsa ndipo ambakuwa mwamphanvu kuti:
34 “Aaa! Ko munkufuna chani kwa ise, imwepo Yesu wa ku Nazareti? Ko mwabwera kudzatidzonga? Inepano ninkukudziwani bwino maninge, ndimwe Wochena wa Mulungu!”
35 Koma Yesu adadzudzula mzimu muyo kuti: “Khala chete, ndipo bula mwa iye.” Pamwapo chiwanda chire chidamugwesa pasi munthu muyo pakati pawo, patsogolo pake chidabula mwa iye ne kumudzonga.
36 Padawona vimwevi, wanthu wose adadabwa maninge ndipo adayamba kukambirana kuti: “Onani, mawu yake ni yamphanvu maninge! Ndawa ankukwanisa kudzudzula mizimu yonyantsa mwa ulamuliro na mphanvu ndipo mizimu mwayo yankubuladi.”
37 Pamwapo mbiri yake idapitiriza kufalikira palipose m’mamiyi yose yozungulira.
38 Padabula mu sunagoge mumo, adakangena mu nyumba ya Simoni. Pa nthawe mwiyo apongozi wachikazi wa Simoni enze fesuke maninge, pamwapo adamukumbira kuti awathandize.
39 Manje adaimirira pomwe amayi mwawo enze gone nkuwapolesa ndipo matenda yawo yadamaliratu. Nthawe mweyoletu amayi mwawo adamuka nkuyamba kuwaphikira.
40 Koma pomwe dzuwa ingachoma, wose omwe enze na wanthu wodwala matenda yosiyanasiyana, adawabweresa kwa iye ndipo iye adawapolesa mwa kuchita kuwaikha manja.
41 Navombo viwanda vidabula mwa wanthu azinji uku vinkukuwa kuti: “Imwepo ndimwe Mwana wa Mulungu.” Koma iye adadzudzula viwanda mwivo ndipo alibe kuvibvumiza kuti viyankhule ndawa vimbamudziwa kuti ni Khrisitu.
42 Pakudachena, adachoka nkuyenda kumalo kulibe wanthu. Koma gulu ya wanthu idayamba kumufagafaga ndipo idafika komwe iye wenze, ndipo wanthu mwawo adamukumbira kuti ayi kuti achoke.
43 Koma iye adawauza kuti: “Nifunika kulengeza pomwe ntontholo wabwino wa Ufumu wa Mulungu ku mathaundi yanango ndawa ndivo vomwe Mulungu adanituma kudzachita.”
44 Pamwapo adayenda kukalalikira m’masunagoge ya ku Yudeya.
Mawu ya m’nyantsi
^ Onani matanthauzo ya mawu yanango.
^ Onani matanthauzo ya mawu yanango.
^ Onani matanthauzo ya mawu yanango.
^ Onani matanthauzo ya mawu yanango.
