Wonembewa na Luka 5:1-39
5 Nthawe inango, gulu ya wanthu imbabvesera pomwe Yesu angapfunzisa mawu ya Mulungu m’mphepete mwa nyanja ya Genesarete* ndipo wanthu mwawo angamupanikiza.
2 Manje iye adawona mabarko yawiri yali tsamise m’mphepete mwa nyanja mwiyo, koma wanthu wakupha ntsomba enze adabulukamo ndipo ambatsuka akombe wawo.
3 Pamwapo iye adangena mu barko ibodzi, yomwe yenze ya Simoni ndipo adamukumbira kuti aigwinyire m’madzi pang’ono. Patsogolo pake adakhazikika m’barko mumo nkuyamba kupfunzisa gulu ya wanthu mwaire.
4 Padamaliza kuyankhula, adauza Simoni kuti: “Chapira kodiba,* ndipo muthuse akombe wanu kuti muphe ntsomba.”
5 Koma Simoni adadawira kuti: “Mulangizi, ise taphuphudza usiku wose tinkuphata basa koma tiribe kuphako olo ntsomba ibodzi. Koma pakuti mwanena ndimwepo, nithuse akombe mwawa.”
6 Padachita vimwevi, adaphata ntsomba zizinji maninge. Ndipo akombe wawo adayamba kung’ambika.
7 Pamwapo adachemera anzawo omwe enze mu barko inango kuti adzawathandize. Iwo adabweradi, ndipo ntsomba mwizo zidadzadza mabarko yose yawiri, mpakana mabarko mwayo yadayamba kumira.
8 Padawona vimwevi, Simoni Petulo adagwada pamaso pa Yesu ndipo adamuuza kuti: “Ambuya, chokani pafupi na ine ndawa ndine munthu wochimwa.”
9 Simoni komasoti womwe enze naye pabodzi, adadabwa maninge na ntsomba zomwe iwo adapha.
10 Komasoti Yakobo na Yohani, wana wa Zebedayo, omwe angapha ntsomba pabodzi na Simoni adadabwa maninge. Koma Yesu adauza Simoni kuti: “Ayi kuchita mantha. Kuyambira lero umbasodze wanthu wamoyo.”
11 Pamwapo mabarko yale adafika nayo kuntunthu, ndipo iwo adasiya chilichose nkuyamba kumutewera.
12 Nthawe inango pomwe wenze mu thaundi inango, adagumana na munthu yemwe wenze na khate thupi yose. Munthu muyo padawona Yesu, adagwada nkujolima mpakana nkhope yake pasi ndipo adamukumbira kuti: “Ambuya, nikudziwa kuti peno munkufuna mungakwanise kunichenesa.”
13 Pamwapo Yesu adapfuthula djanja yake nkumugumirira ndipo adanena kuti: “Inde nikufuna! Khala wochena.” Nthawe mwiyoletu khate yake ire idamala.
14 Patsogolo pake adalamula munthu muyo kuti osati auze munthu aliyese. Pamwapo adamuuza kuti: “Koma uyende ukadziwonese kwa wantsembe ndipo ukapereke ntsembe ya kuchenesewa kwako, ninge momwe Mose adalamulira, kuti ikhale umboni kwa iwo.”
15 Koma mbiri yake idafalikira maninge ndipo magulu ya wanthu yambasonkhana pabodzi kudzamubvesera komasoti kudzapolesewa matenda yawo.
16 Koma nthawe zizinji iye ambayenda kumalo kwayekha kukapemphera.
17 Ntsiku inango pomwe iye angapfunzisa, Afalisi na apfunzisi wa Chilamulo omwe ambachokera m’mamiyi yose ya Galileya, ku Yudeya na ku Yerusalemu adakhala pasi pa malo mwayo. Ndipo mphanvu ya Yahova* yenze pa Yesu kuti akwanise kuwapolesa.
18 Patsogolo pake padafika wanthu womwe enze takule munthu wozizira vidzo pamachira. Iwo ambafagafaga njira yakuti amungenesere m’nyumba mumo nkukamuikha pafupi na Yesu.
19 Koma padakangira kupita naye ndawa ya kuwanda kwa wanthu, adakwera padenga. Ndipo pakuphatisira basa chibowo chomwe adachikonza padenga mwapo, adamubulusa pabodzi na machira mwayo nkumufikisa pakati pa wanthu omwe enze pabodzi na Yesu.
20 Padawona chikhulupiriro chawo, iye adati: “Machimo yako yakhululukiriwa.”
21 Patsogolo pake alembi na Afalisi adayamba kudzibvunza kuti: “Ko moyu ni mbani kuti ambanyoze Mulungu tene? Ko munango pomwe ni mbani yemwe angakhululukire machimo kupatulapo Mulungu?”
22 Koma Yesu padazindikira vomwe iwo angaganiza, adawabvunza kuti: “Ko munkuganizira chani m’mitima mwanu?
23 Chosashupa nchiponi kunena kuti: ‘Machimo yako yakhululukiriwa,’ panango kunena kuti: ‘Nyamuka umbayende’?
24 Koma kuti mudziwe kuti Mwana wa munthu anamphanvu padziko yapasi zokhululukira machimo—” patsogolo pake adauza wozizira vidzo ule kuti: “Ninkuyankhula na iwepo: Nyamuka, tenga machira yako aya ndipo umbayende kwanu.”
25 Nthawe mwiyoletu adaimirira wose ankuwona, ndipo adanyamula machira yake yale nkuyenda kwawo ankutamanda Mulungu.
26 Pamwapo wanthu wose mwawo adadabwa maninge, ndipo adayamba kutamanda Mulungu mwakuti adachita mantha. Iwo ambanena kuti: “Koma vatawona lero ni vodabwisa!”
27 Pavidachitika vimwevi, Yesu adachokako. Patsogolo pake adawona munthu munango wotsonkhesa mtsonkho dzina yake Levi ali khale mu ofesi yotsonkheramo mtsonkho, ndipo adamuuza kuti: “Ukhale wotewera wangu.”
28 Levi muyo adasiya chirichose ndipo adanyamuka nkuyamba kumutewera.
29 Patsogolo pake Levi adakonzera phwando ikulu Yesu m’nyumba mwake. Kumuko kudabwera wanthu azinji wotsonkhesa mtsonkho na wochimwa ndipo angadya pabodzi* na Yesu na wopfunzira wake.
30 Afalisi na alembi wawo padawona vimwevi, adayamba kung’ung’uzika nkubvunza wopfunzira wake kuti: “Ndawa chani imwepo mukudya na kumwa pabodzi na wanthu wotsonkhesa mtsonkho na wochimwa?”
31 Yesu adawadawira kuti: “Wanthu wosadwala afunikalini mfulumero, koma wodwala.
32 Inepano nilibe kubwera kudzachemera wanthu wolungama, koma wochimwa kuti alape.”
33 Iwo adamuuza kuti: “Wopfunzira wa Yohani adzimana kudya kawirikawiri ndipo apemphera mogwigwirira. Wopfunzira wa Afalisi achitambo chibodzibodzi koma wanu awa andodya na kumwa.”
34 Koma Yesu adawadawira kuti: “Imwepo mungauzelini anzake wa mwamuna yemwe ankulowola kuti adzimane kudya pa nthawe yomwe anaye pabodzi, ko mungachite teno?
35 Koma ntsiku zidzafike pomwe mwamuna muyo adzachosewe pakati pawo. Pamwapo muntsiku mwizo iwo adzadzimane kudya.”
36 Komasoti adawafotokozera chitsanzo chakuti: “Palibe yemwe agwata chigamba pa malaya yakunja inyowani nkuchisonerera pa malaya yakunja yakale. Munthu akachita vimwevo chigamba chinyowani icho chichoka pa nguwo yakale ire. Ndiposoti chigamba cha nguwo inyowani iyo, chibveranalini na malaya yakale yale.
37 Komasoti palibe yemwe akhuthulira vinyu unyowani m’machola yachikumba yakale. Akachita vimwevo, vinyu unyowani uyo uphulisa machola yachikumba yale ndipo utayika. Ndipo machola yachikumba yale yadzongeka.
38 Koma vinyu unyowani ufunika kuikhiwa m’machola ya chikumba yanyowani.
39 Munthu akamwa vinyu wakale afunalini pomwe unyowani, ndawa anena kuti: ‘Wakale moyu uli bwino maninge.’”
Mawu ya m’nyantsi
^ Imweyi ni nyanja ya Galileya.
^ Panango kuti: “konoka maninge.”
^ Onani vakumapeto A5.
^ Panango kuti: “ali khale mozungulira meza.”
