Wonembewa na Luka 6:1-49
-
Yesu ni “Mbuya wa Satade” (1-5)
-
Mwamuna wopunduka djanja adapolesewa (6-11)
-
Atumi 12 (12-16)
-
Yesu ankupfunzisa wanthu na kuwapolesa (17-19)
-
Kukhala okondwa na kukhala na tsoka (20-26)
-
Kukonda omwe atizonda (27-36)
-
Lekani kuweruza (37-42)
-
Adziwika na vipaso vawo (43-45)
-
Nyumba yomangiwa bwino na nyumba yomwe ilibe fundasau yolimba (46-49)
6 Nthawe inango pa ntsiku ya satade, Yesu angafamba na kugwata na m’munda wa tirigu, ndipo wopfunzira wake ambabudula ngalangala za tirigu nkumbazipukunya m’manja mwawo nkumbadya.
2 Afalisi anango padawona vimwevi adati: “Ndawa chani mukuchita vinthu vomwe ni vosabvumizika pa ntsiku ya Satade?”
3 Koma Yesu adawadawira kuti: “Ko mulibe kuwerenga vomwe Davide adachita, iye na amuna omwe enze naye padabva njala?
4 Ko mulibe kuwerenga kuti iye adangena m’nyumba ya Mulungu ndipo adadya mikate yowonesewa kwa Mulungu, yomwe iye na wanthu omwe enze naye wale ambafunikalini kudya mobverana na malamulo, koma wantsembe wokha?”
5 Pamwapo, adapitiriza kuwauza kuti: “Mwana wa munthu ni Mbuya wa Satade.”
6 Ntsiku inango pomwe pa satade, iye adangena mu sunagoge nkuyamba kupfunzisa. Mumo mwenze munthu munango yemwe djanja yake ya makulu yenze yopunduka.*
7 Alembi na Afalisi angamunyang’anisisa kuti awone peno angapolese munthu muyo pa satade, na cholinga chakuti amugumane na mulandu.
8 Koma iye adadziwa vomwe iwo ambaganiza. Pamwapo adauza munthu wopunduka djanja ule kuti: “Imirira, bwera ukhale pakati apa.” Munthu muyo adaimirira nkuyenda pamwapo.
9 Patsogolo pake Yesu adawabvunza kuti: “Ko malamulo yabvumiza kuchita chani pa Satade, chabwino panango choipa? Kupulumusa moyo panango kupha?”
10 Padanyang’ana uku na uku, adauza munthu ule kuti: “Pfuthula djanja yako.” Iye adaipfuthuladi ndipo idakhala pomwe bwinobwino.
11 Koma iwo adakalipa maninge ndipo adayamba kukambirana vati amuchite Yesu.
12 Mu ntsiku mwizo, Yesu adayenda kuphiri kuti akapemphere ndipo adaphuphudza usiku wose ankupemphera kwa Mulungu.
13 Pakudachena adachemera wopfunzira wake nkusalulapo 12 omwe adawapasa dzina yakuti atumi.
14 Iye adasankhula Simoni, yemwe angamuchemera kuti Petulo, na Andireya m’bale wake. Adasankhula pomwe Yakobo, Yohani, Filipo, Batolomeyo,
15 Mateyu, Thomasi, Yakobo mwana wa Alifeyo, na Simoni wochemerewa kuti “wakhama.”
16 Komasoti adasalula Yudasi mwana wa Yakobo na Yudasi Isikariyoti, yemwe patsogolo pake adamupereka.
17 Patsogolo pake adabuluka nawo m’phiri mule nkukaima pa malo yokhazikira. Pamwapo penze gulu ikulu ya opfunzira wake. Penze pomwe chigulu cha wanthu chochokera ku Yudeya kose na ku Yerusalemu kose, komasoti kumadera ya m’mphepete mwa nyanja ya ku Turo na ku Sidoni. Wose mwawa adabwera kuti adzamubvesere nakuti adzawapolese.
18 Olo wale womwe ambashupisiwa na mizimu yonyantsa ambapolesewa.
19 Gulu yose ya wanthu mwawale imbayesesa kuti imuphate, ndawa mphanvu zimbachoka mwa iye nkupolesa wanthu wose mwawo.
20 Pamwapo adanyang’ana wopfunzira wake nkuyamba kuwauza kuti:
“Wosauka imwe ndimwe wokondwa, ndawa Ufumu wa Mulungu ni wanu.
21 “Wokondwa ndimwe womwe munkubva njala, ndawa mudzakhute.
“Okondwa ndimwe omwe munkulira, ndawa mudzaseke.
22 “Ndimwe wokondwa wanthu akambakuzondani, kukunyozani komasoti kulamba dzina yanu nkumbanena kuti ni yoipa, ndawa ya Mwana wa munthu.
23 Kondwani pa ntsiku mwiyo ndipo mumogemoge mokondwa, ndawa mphoto yomwe Mulungu adzakupaseni ni ikulu. Pakuti vinthu vimwevo ni vomwembo azibereki wawo wakale adachitira aneneri.
24 “Koma tsoka kwa imwe wachuma, ndawa munkutambiriratu vose vokukondweresani.
25 “Tsoka kwa imwepo omwe munkukhuta manjeuno, ndawa mudzabve njala.
“Tsoka kwa imwepo omwe munkuseka manjeuno, ndawa mudzakwinyirire komasoti kulira.
26 “Munatsoka wanthu wose akambanena vabwino va imwepo, ndawa vinthu vimwivo ndivo vomwe azibereki wawo wakale adachitira aneneri abodza.
27 “Koma imwepo omwe munkubvesera, ine ninkukuuzani kuti: Pitirizani kukonda azondi wanu na kuchitira vabwino omwe akuzondani.
28 Pitirizani kudalisa wanthu omwe ankukutembererani komasoti kupempherera wale omwe ankukunyozani.
29 Yemwe wakukwantsa mbama kuphutu iyi, umuperekere pomwe phutu inango. Yemwe wakutengera malaya yako yakunja, ayi kumulambiza kutenga malaya yako yankati.
30 Aliyese yemwe wakukumbira kanthu umupase, ndipo yemwe wakutengera chinthu ayi kumuchichimiza kuti akubwezere.
31 “Ndipomwapa, vomwe munkufuna kuti wanthu akuchitireni, imwembo muwachitire vimwivo.
32 “Ko mukambakonda wanthu wale okha omwe akukondani, mudzaphindule chani? Ndawa olo ochimwa* akonda wanthu wale okha omwe awakonda.
33 Peno muchitira vabwino wale okha omwe akuchitirani vabwino, mudzaphindule chani? Ndawa olo ochimwa achitambo vimwivo.
34 Komasoti peno munkukweretesa palibe kalowa wale okha omwe munkudikhira kuti adzabwezere chikwerete mwicho, mudzaphindule chani? Wochimwambo akweretesa ochimwa anzawo palibe kalowa, kuti adzawabwezere vimwevo.
35 Mosiyana na vimwevo, imwepo pitirizani kukonda azondi wanu. Pitirizani kuchita vabwino na kukweretesa palibe kalowa, osadikhira kutambira kalikose. Mukateno, mphoto yanu idzakhale ikulu ndipo mudzakhale wana wa Wam’dzulum’dzulu, ndawa iye akomera ntima wanthu osayamika na oipa.
36 Pitirizani kukhala wachifundo ninge Ababa wanu womwembo ni wachifundo.
37 “Ndipo lekani kuweruza anango, mukateno imwepo mudzaweruziwelini. Lekani kutsutsa anango, ndipo imwembo mudzatsutsiwelini. Pitirizani kukhululukira wanthu machimo yawo ndipo machimo yanumbo yadzakhululukiriwe.
38 Khalani wopasa, ndipo imwembo wanthu adzakupaseni. Adzakukhuthulireni m’machola yanu mpimo wabwino wotsindirika, wodzala bwino mpakana kutaikira. Ndipo mpimo womwe munkupimira anango, iwombo adzakupimireni muyo.”
39 Pamwapo adawauza pomwe chitsanzo chakuti: “Munthu wosaona angatsogolerelini wosaona munzake, ko angachite teno? Peno angachite teno, wose awiri angagwere mu dindi, ntenolini?
40 Muluno* aposhalini mpfunzisi* wake, koma aliyese yemwe wapfunzisiwa bwino adzalingane na mpfunzisi wake.
41 Manje ndawa chani unyang’ana kachitsotso m’diso ya m’bale wako, koma osakwanisa kuwona ntanda wa denga ya nyumba womwe uli m’diso yako?
42 Ko ungauze tani m’bale wako kuti: ‘M’bale wangu, imirira kuti nikuchose kachitsotso komwe kali m’diso yako,’ pomwe iwepo ukukangira kuwona ntanda wa denga ya nyumba womwe uli m’diso yako? Munthu woipa iwe! Yamba wachosa ntanda wa denga ya nyumba womwe uli m’diso yako iyo, ukateno udzawone bwinobwino ndipo udzakwanise kuchosa kachitsotso komwe kali m’diso ya m’bale wako.
43 “Muti wabwino ungaberekelini chipaso choipa ndipo muti woipa ungaberekelini chipaso chabwino.
44 Ndawa muti uliwose udziwika na chipaso chake. Mwakulinganiza, wanthu athyolalini nkhuyu pa muti wa minga panango kuthyola uva pa chitsamba cha minga.
45 Munthu wabwino achosa chinthu chabwino mu chuma chabwino cha muntima mwake. Koma munthu woipa achosa voipa mu chuma choipa cha muntima mwake, ndawa pakamwa payankhula vinthu vomwe vili muntima.
46 “Ndawa chani munichemera kuti ‘Ambuya! Ambuya!’ koma osachita vomwe niyankhula?
47 Aliyese yemwe abwera kwa ine kudzabva mawu yangu, nkuchita vomwe wabva, nikuuzeni yemwe alingana naye:
48 Iye ali ninge munthu yemwe pakumanga nyumba, adakumba maninge nkumanga maziko yake pachidwale.* Ndipo kamadzi pakadadzala, madzi yadamenya nyumba mwiyo, koma yalibe kukwanisa kuigwesa ndawa adaimanga bwino.
49 Koma munthu yemwe wabva koma osachita chilichose, ali ninge munthu yemwe wamanga nyumba ilibe maziko padongo.* Panthawe mwiyo kamadzi kadadzala ndipo madzi yadamenya nyumba mwiyo ndipo nthawe mwiyo idagwa, mwakuti kugwa kwake kwenze kopasa mantha.”
Mawu ya m’nyantsi
^ Panango kuti: “imbaphatalini basa.”
^ Panango kuti: “oipa.”
^ Panango kuti: “wopfunzira.”
^ Panango kuti: “ticha.”
^ Panango kuti: “pamwala.”
^ Panango kuti: “panchenga.”
