Wonembewa na Luka 7:1-50
7 Yesu padamaliza kunena vose vomwe angafuna kuuza wanthu, adangena mu thaundi ya Kaperenao.
2 Kumuko kapolo wa mtsogoleri munango wa masocha, yemwe mtsogoleri muyo ambamukonda maninge angadwala ndipo wenze adasala pang’ono kumwalira.
3 Mtsogoleri muyo padabva va Yesu, adatumiza akulu anango wa Ayuda kwa iye kukamukumbira kuti abwere kudzapolesa kapolo wake muyo.
4 Wanthu mwawo padafika kwa Yesu, adayamba kumugwigwirira na ntima wose kuti: “Moyu ni wofunikadi kuti mumuthandize,
5 ndawa akonda wanthu wakhaindi yathu ndipo adatimangira sunagoge.”
6 Pamwapo Yesu adanyamuka nawo pabodzi. Koma padasala pang’ono kufika kunyumba muko, adagumana na anzake wa nkulu wa masocha ule womwe adawatuma kuti adzamuuze kuti: “Ambuya ayi kushupika kubwera, ndinelini munthu woyenerera kuti imwepo mungene m’nyumba mwangu.
7 Ndipomwapa inepano nilibe kudziwona kuti ndine woyenerera kubwera kwa imwepo. Koma mundonena mawu yokha ndipo nyabasa wangu moyu apole.
8 Ndawa inembo nina akuluakulu omwe adaikhiwa kuti ambaninyang’anire komasoti nina masocha yomwe niyanyang’anira. Nikauza m’bodzi kuti: ‘Yenda!’ ayenda, munango nikamuuza kuti: ‘Bwera!’ abwera. Nyabasa wangu nikamuuza kuti: ‘Chita ichi!’ achitiratu.”
9 Yesu padabva vimwevi, adadabwa na munthu moyu. Pamwapo adachungunuka nkunyang’ana gulu ya wanthu omwe angamutewera nkuwauza kuti: “Kunena shuwa ninkukuuzani, olo mu Izirayeli nikalibe kugumanamo munthu aliyese wachikhulupiriro chikulu ninge chimwechi.”
10 Koma wanthu omwe adatumiwa wale padabwerera kunyumba, adagumana kapolo ule ali bwinobwino.
11 Paidamala nthawe ing’ono, adanyamuka nkuyenda ku thaundi inango yochemerewa Naini. Opfunzira wake komasoti gulu ikulu ya wanthu ingafamba naye pabodzi.
12 Padasala pang’ono kufika pansuwo wa mpanda wa thaundi mwiyo, adagumana na wanthu omwe enze takule maliro. Yemwe wenze adamwalira uyo wenze mwana wachimuna m’bodzi yekha basi kwa amayi wake. Komasoti amayi wake mwawo enze nkazi wamasiye. Gulu ikulu ya wanthu ochokera mu thaundi mwiyo yenze pabodzi na amayi mwawo.
13 Ambuya padawona amayi mwawo, adawabvera ntsisi ndipo adawauza kuti: “Nyamalani amayi.”
14 Padateno, adafendera nkuphata machira yale ndipo omwe enze adanyamula wale adandoimirira. Patsogolo pake iye adanena kuti: “Mulumbwana iwe, ninkuyankhula na iwepo, muka!”
15 Pavidateno, mulumbwana yemwe wenze adamwalira ule adamuka nkuyamba kuyankhula ndipo Yesu adamupereka kwa amayi wake.
16 Padaona vimwevi, wanthu wose adachita mantha ndipo adayamba kutamanda Mulungu kuti: “Mneneri nkulu waonekera pakati pathu.” Adanena pomwe kuti: “Mulungu wakumbukira wanthu wake.”
17 Nkhani yonena va Yesu mwiyi, idabvekera palipose mu Yudeya mose na m’madera yose yozungulira.
18 Pamwapo opfunzira wa Yohani adamuuza vinthu vose vimwevi.
19 Patsogolo pake Yohani adachemeresa opfunzira wake awiri nkuwatuma kuti ayende kwa Ambuya kukawabvunza kuti: “Ko Mesiya yemwe tinkumudikhira uyo ndimwepo, panango tidikhire munango?”
20 Padafika kwa iye, amuna mwawo adanena kuti: “Yohani M’batizi watituma kudzakubvunzani kuti: ‘Ko Mesiya yemwe tinkumudikhira uyo ndimwepo, panango tidikhire munango?’”
21 Nthawe mweyoletu iye adapolesa wanthu azinji omwe angashupika na matenda yosiyanasiyana komasoti omwe angadwala mwa penopeno na kubulisa mizimu yoipa. Adathandiza pomwe wanthu azinji omwe enze na bvuto yosaona kuti ayambe kuona.
22 Pamwapo pakudawira adauza amuna awiri wale kuti: “Yendani mukamuuze Yohani vomwe mwaona na kubva: Omwe enze na bvuto yosaona ankuona, wopunduka ankufamba, wakhate ankuchenesewa ndipo omwe enze na bvuto yosabva ankubva. Wakufa akumukisiwa ndipo osauka ankuuziwa ntontholo wabwino.
23 Wokondwa ni wale omwe agumanalini chokhumudwisa kwa inepano.”
24 Wanthu omwe Yohani enze adawatuma wale padachoka, Yesu adayamba kuuza gulu ya wanthu va Yohani kuti: “Ko mwenze mwayenda mu chipululu kukawona chani? Ko mwenze mwayenda kukawona ntsanga yogunduzika na mphepo?
25 Manje mwenze mwayenda kukawona chani? Panango munthu wovala vovala vapadzulu?* Neye, pale omwe avala vovala vapadzulu komasoti wanthu omwe akhala na vinthu vizinji pamoyo wawo agumanika m’nyumba zachifumu.
26 Manje chikulukulu chemwenze mwayenda kukawona ni chani? Mneneri panango? Inde, ninkukuuzani, Yohani wenze mneneri koma wenze wofunika maninge kuposha aneneri.
27 Malemba yanena va iye kuti: ‘Tetekera! Ine ninkutumiza nthumi yangu kuti itsogole kukakukonzera njira.’
28 Shuwadi ninkukuuzani, pa wanthu wose, palibe nkulu kuposha Yohani. Koma munthu yemwe ni mng’onoko mu Ufumu wa Mulungu ni nkulu kuposha iye.”
29 (Wanthu wose komasoti wotsonkhesa mtsonkho padabva vimwevi, adalengeza kuti Mulungu ni wolungama, ndawa iwo enze adabatiziwa na Yohani.
30 Koma Afalisi na wanthu odziwa Chilamulo adanyalanyaza malangizo* yomwe Mulungu adawapasa. Ndipomwapa Yohani alibe kuwabatiza.)
31 “Ko wanthu wa m’badwo uyu niwalinganize na mbani ndipo ko ankulingana na mbani?
32 Iwo ali ninge wana ang’ono omwe akhala pasi mubazali nkumbakuwirirana kuti: ‘Tidakulizirani chinonje, koma mulibe kuvina. Tidalira mokuwa, koma imwepo mulibe kulira.’
33 Molingana na vimwevi, Yohani M’batizi adabwera ndipo ambadyalini chakudya panango kumwa vinyu, koma imwepo mukunena kuti: ‘Anachiwanda.’
34 Mwana wa munthu wabwera ndipo iye akudya na kumwa, koma imwepo mukunena kuti: ‘Onani! Munthu wolungwa na wokonda maninge vinyu, shamwali wa wotsonkhesa mtsonkho na wochimwa!’
35 Mulimose mwavingakhalire, nzeru itsimikizirika kuti ni yolungama ndawa ya basa zake.”
36 Patsogolo pake, Mfalisi munango adachichimiza Yesu kuti akadye naye. Pamwapo adayenda kunyumba kwa Mfalisi muyo ndipo adamupasa chakudya.
37 Koma mayi munango yemwe wenze wodziwika kuti wenze wochimwa, adabva kuti Yesu ankudya chakudya munyumba ya Mfalisi muyo. Pamwapo adayenda kumuko na botolo yokonzewa na mwala wa alabasitala, inamafuta yonunkhira.
38 Padafika adagwada pa mapazi yake nkuyamba kulira, mwakuti adayamba kutotesa mapazi mwayo na misozi, uku ankupukuta mapazi mwayo na tsitsi ya munsolo mwake. Komasoti adabejali mapazi mwayo mwachikondi nkuyadzoleka mafuta yonunkhira yale.
39 Mfalisi yemwe adamuchemera ule padaona vimwevi, muntima mwake adanena kuti: “Sembe munthu muyu ni mneneridi, adakadziwa kuti nkazi yemwe ankumuphata uyu ni mbani, komasoti kuti ni wotani. Adakadziwa kuti ni wochimwa.”
40 Koma Yesu adamudawira kuti: “Simoni, ninkufuna nikuuze kanthu kanango.” Iye adati: “Niuzeni Mpfunzisi!”
41 “Amuna awiri adatenga chikwerete kwa munthu munango wokweretesa kobiri. M’bodzi adatenga chikwerete cha madinari 500, koma munango adatenga chikwerete cha madinari 50.*
42 Padakangira kubwezera vikwerete vire, munikachiro ule adawakhululukira na ntima wose. Ko ni mbani pa awiri wale yemwe angamukonde maninge?”
43 Simoni pakudawira, adati: “Nikuganiza kuti ni ule yemwe adakhululukiriwa zizinji.” Yesu adamuuza kuti: “Wadawira bwino.”
44 Padateno, adachungunukira mayi ule nkuuza Simoni kuti: “Wamuwona mayi uyu? Olo kuti nangena mu nyumba yako, iwepo ulibe kunipasa madzi yotsukira mapazi yangu. Koma mayi uyu watotesa mapazi yangu na misozi yake nkuyapukuta na tsitsi yake.
45 Iwepo ulibe kunibejali. Koma padangena m’nyumba muno, mayi uyu alibe kusiya kubejali mapazi yangu mwachikondi.
46 Iwepo ulibe kuthira mafuta munsolo mwangu, koma mayi uyu wapakasira mapazi yangu mafuta yonunkhira.
47 Ndawa ya vimwevi, ninkukuuza kuti machimo yake yakhululukiriwa, podiya kuti ni yazinji. Ndipomwapa ankuwonesa chikondi chikulu maninge. Koma yemwe wakhululukiriwa machimo yang’onong’ono, awonesambo chikondi ching’onong’ono.”
48 Patsogolo pake adauza mayi ule kuti: “Machimo yako yakhululukiriwa.”
49 Wanthu wose omwe enze adakhala naye pabodzi pameza mwapo adayamba kudzibvunza muntima mwawo kuti: “Ko munthu muyu ni mbani yemwe akwanisa pomwe olo kukhululukira machimo?”
50 Koma iye adauza mayi ule kuti: “Chikhulupiriro chako chakupulumusa. Yenda mu ntendere.”
Mawu ya m’nyantsi
^ Panango kuti: “vovala vabwino maninge.”
^ Panango kuti: “malamulo.”
^ Onani vakumapeto B14.
