Wonembewa na Luka 8:1-56
-
Nkazi ankulondolera Yesu (1-3)
-
Chitsanzo cha wowaza mbewu (4-8)
-
Chomwe chidachitisa kuti Yesu aphatise basa vitsanzo (9, 10)
-
Adabvekesa chitsanzo cha munthu wowaza mbewu (11-15)
-
Kandyero amubunikiralini na dengu (16-18)
-
Amayi na azibale wa Yesu (19-21)
-
Yesu ankulekesa chimphepo (22-25)
-
Yesu ankutumiza viwanda kuti viyende mu nkhumba (26-39)
-
Mwana nkazi wa Yairo; nkazi ankuphata chovala cha Yesu (40-56)
8 Paidapita nthawe pang’ono, Yesu adayamba kuyenda thaundi na thaundi komasoti muyi na muyi nkumbalalikira na kulengeza ntontholo wabwino wa Ufumu wa Mulungu. Ndipo atumi 12 wale enze naye pabodzi.
2 Enze pomwe na azimayi anango omwe adawachosa mizimu yoipa na kuwapolesa matenda yawo. Anango mwa azimayi mwawa enze Mariya yemwe ambachemerewa pomwe kuti wa ku Magadala, yemwe adachosewa viwanda 7.
3 Jowana nkazi wa Kuza yemwe wenze wonyang’anira nyumba ya Herode, Suzana na azimayi anango azinji, omwe ambatumikira Yesu na atumi mwawo pakuphatisa basa chuma chawo.
4 Pamwapo gulu ikulu ya wanthu paidasonkhana, pabodzi na anango omwe ambachokera m’mathaundi yosiyanasiyana, Yesu adawafotokozera chitsanzo chakuti:
5 “Wowaza mbewu adayenda kukawaza mbewu zake. Pangawaza, mbewu zinango zidagwera m’mphepete mwa nsewu n’kupondewapondewa ndipo zidadyewa na mbalani za munlengalenga.
6 Zinango zidagwera pamwala. Koma pazidamera, zidauma ndawa penze palibe mnyontho.
7 Mbewu zinango zidagwera pa minga ndipo minga mwizo zimbakulira pabodzi na mbewu mwizo ndipo zidakangisa mbewu mwizo kukula.
8 Koma zinango zidagwera padothi yabwino, ndipo pazidakula, zidabereka vipatso kupitirira maulendo 100.” Padanena vimwevi, adayankhula mokuwa kuti: “Yemwe anamatu yakubva, abve.”
9 Koma wopfunzira wake adamubvunza tanthauzo ya chitsanzo mwechi.
10 Iye adati: “Imwepo mwapasiwa mwayi wakuti mubvese vintsintsi vopatulika va Ufumu wa Mulungu. Koma kwa anango awa, vose vandokhala vitsanzo basi. Viri teno kuti kunyang’ana ambanyang’ane, koma kukhale kulibe phindu, kubva ambabve, koma osati ambabvesese vomwe vinkunenewa.
11 Manje chitsanzo mwechi tanthauzo yake ni iyi: Mbewu zire ni mawu ya Mulungu.
12 Zogwera m’mphepete mwa msewu zire ni wanthu womwe akubva mawu mwayo. Patsogolo pake Ndyerekezi abwera n’kudzachosa mawu mwayo m’mitima yawo kuti aleke kukhulupirira komasoti kuti aleke kupulumuka.
13 Zogwera pamwala ni wanthu wale womwe akandobva mawu mwayo, ayatambira mokondwa, koma mwawa azikalini mizu. Akhulupirira kwa kanthawe, koma nthawi yoyesewa ikafika akugwa.
14 Zomwe zidagwera paminga, ni wanthu wale omwe abva mawu ya Mulungu koma ndawa ya nkhawa, chuma na vokondweresa va moyo uno, akulalini bwino ndipo vipaso vawo vikhumalini.
15 Koma zogwera pa dothi yabwino, ni wanthu wale womwe patsogolo pa kubva mawu mwayo na ntima wabwino maninge, ayaphatisisa n’kubereka vipaso mopirira.
16 “Palibe yemwe agasa kandyero, nkuugwanankhira na chombo panango kuyikha kuntsi kwa m’bedi. Koma auyikha pa choikhapo kandyero kuti omwe akungena awone kugwerewera.
17 Ndawa palibe chobisika chomwe chidzaululikelini. Ndipo vinthu vose vosungiwa mwachintsintsi maninge vidzadziwike, vidzabisikelini mpakana kalekale.
18 Ndipomwapa mumbabvesere mwatcheru maninge. Ndawa omwe ali navo, adzapasiwe vizinji, koma omwe alibe, adzatengerewe olo vomwe aganiza kuti ali navo.”
19 Manje amayi wake na azibale wake adabwera kumuko, koma ndawa ya kuwanda kwa wanthu, adakangira kufika komwe iye wenze.
20 Koma anango adamuuza kuti: “Amayi wanu na azibale wanu ali imirire panja apa akufuna kuti muwonane nawo.”
21 Koma Yesu pakudawira, adawauza kuti: “Amayi wangu na azibale wangu ni awa womwe abvesera mawu ya Mulungu n’kumbayachita.”
22 Ntsiku inango Yesu na wopfunzira wake adakwera barko ndipo adawauza kuti: “Naboni tiyambuke tiyende tsidya inango ya nyanja.” Pamwapo iwo adayamba kuchapa.
23 Koma pakati pa ulendo, Yesu adagona. Patsogolo pake panyanja mwiyo padayamba kuchita chonzi, ndipo madzi yadayamba kudzala m’barko mule mwakuti sembe adamira.
24 Patsogolo pake adayenda kukamumusa nkumuuza kuti: “Mulangizi, Mulangizi, moyo wathu uli pangozi!” Padabva vimwevi adamuka nkutsuula chonzi na mabimbi yamphanvu yale, mwakuti vidaleka, ndipo panyanja mwapo padademba.
25 Manje adawabvunza kuti: “Chikhulupiriro chanu chili kuponi?” Koma iwo adachita mantha ndipo adasowa chochita, mwakuti adayamba kubvunzana kuti: “Ko munthu moyu ni mbani makamaka? Manje onani, ankukwanisa kulamula chonzi na madzi ndipo vikumubvera.”
26 Pamwapo adatsamisa barko ire mu dera ya Agerasa, tsidya inango yonyang’anana na Galileya.
27 Yesu padandobuluka nkufika kuntunthu, adagumana na munthu munango yemwe wenze na chiwanda wochokera muthaundi mweyo. Kwa nthawi itali, munthu muyo ambandokhala ali chadje komasoti ambakhalalini mu nyumba, koma kumanda.*
28 Munthu muyo padaona Yesu, adakuwa maninge n’kudzigwesa pasi pafupi na Yesu. Pamwapo adakuwa mwamphanvu kuti: “Ko mukufuna chani kwa ine, Yesu, Mwana wa Mulungu Wam’dzulum’dzulu? Pulizi nikukukumbirani, ayi kunidzudza.”
29 (Ndawa Yesu ambauza mzimu wonyantsa ule kuti ubule mwa munthu moyu. Mzimu moyu udamuphata mwamphanvu maulendo yazinji. Mobwerezabwereza ambamumanga na matcheni komasoti matangadza n’kumbamuyang’anira. Koma ndawa ya mphanvu ya chiwanda mwicho, ambagwata matcheni n’kuthawira kumalo kulibe wanthu.)
30 Yesu adamubvunza kuti: “Dzina yako ndiwe mbani?” Iye adadawira kuti: “Gulu,” ndawa mwa iye mudangena viwanda vizinji.
31 Viwanda mwivo vimbamugwigwirira mobwerezabwereza kuti avilamule kuti viyende kuphompho.
32 Manje gulu ikulu ya nkhumba ingadyera paphiri kumuko. Pamwapo viwanda vire vidamugwigwirira kuti avibvumize kukangena mu nkhumba zire ndipo iye adavibvumiza.
33 Pavidateno viwanda vire vidabula mwa munthu ule nkukangena mu nkhumba mwizo. Nkhumba zose mwizo zidathamangira kuphompho nkumogera mu nyanja ndipo zidamira.
34 Koma anyakabusa wa nkhumba zire padawona vomwe vidachitika ivo, adathawa n’kukanena vimwevi m’mathaundi na m’mamiyi.
35 Patsogolo pake wanthu adayenda kukawona vomwe vidachitika ivo. Iwo padafika kwa Yesu adagumana munthu yemwe adabulisiwa viwanda ule ali khale pasi pafupi na Yesu. Munthu muyo wenze alivale bwinobwino komasoti maganizo yake yenze bwinobwino ndipo iwo adachita mantha.
36 Omwe adawona vomwe vidachitika vile adawafotokozera momwe munthu wenze na viwanda ule adapoleserewa.
37 Patsogolo pake gulu yose yochokera m’miyi yapafupi ya Agerasa idamukumbira kuti achoke kwawo muko, ndawa idachita mantha maninge. Padateno iye adapakira barko kuti ambayende.
38 Manje munthu yemwe adachosewa viwanda ule adakumbira Yesu mobwerezabwereza kuti ambafambe naye. Koma Yesu adauza munthu muyo kuti ayende kwawo. Iye adati:
39 “Yenda kumuyi ndipo ukafotokoze vomwe Mulungu wakuchitira.” Pamwapo munthu ule adayendadi ndipo ambafalisa muthaundi yose mwiyo vomwe Yesu adamuchitira.
40 Yesu padabwerera ku Galileya, gulu ya wanthu idamutambira bwino, ndawa wose angamudikhirira.
41 Patsogolo pake padafika munthu munango dzina yake Yairo. Munthu muyu wenze mtsogoleri wa sunagoge. Pamwapo adadzigwesa pa mapazi ya Yesu n’kuyamba kumugwigwirira kuti ayende kunyumba kwake.
42 Yairo adachita vimwevi ndawa mwana wake nkazi yemwe wenze na magole pafupifupi 12, wenze adasala pang’ono kumwalira ndipo iye wenze na mwana m’bodzi yekha.
Pomwe Yesu angayenda, wanthu azinji angamulondola ndipo angamupanikiza.
43 Manje penze mayi munango yemwe ambadwala matenda yotaya magazi kwa magole 12, ndipo palibe munthu aliyese yemwe adakwanisa kumupolesa.
44 Mayi muyu adamulondola Yesu kumbuyo nkumuphata usalu woposa wa m’mphepete mwa malaya yake yakunja. Nthawe mwiyoletu magazi yake yadaleka kubula.
45 Pamwapo Yesu adabvunza kuti: “Ko ni mbani yemwe waniphata?” Wose padalamba, Petulo adati: “Mulangizi, mukuwonambolini kuti wanthu wose mwawa akuzungulirani ndipo ankukupanikizani?”
46 Koma Yesu adati: “Shuwa alipo yemwe waniphata, ndawa nabva mphanvu inkubula mwa inepano.”
47 Nkazi muyo padawona kuti vomwe wachita ivo vadziwika, adayenda kwa Yesu ankunjenjemera ndipo adagwada n’kuulula pamaso pa wanthu wose chomwe chidamuchitisa kuti amuphate, na momwe wapolera nthawi mwiyo.
48 Koma iye adauza mayi muyo kuti: “Mwana iwe, chikhulupiriro chako chakupolesa. Yenda mu mtendere.”
49 Adakali kuyankhula, padafika munthu wotumiwa kwa mtsogoleri wa sunagoge ule, ndipo adamuuza kuti: “Mwana wanu ule wamwalira. Musiyeni Mpfunzisi muyu ayi kumushupa.”
50 Yesu padabva vimwevi, adamuuza kuti: “Ayi kugopa, undokhala na chikhulupiriro basi, ndipo mwana wako akhale pomwe na moyo.”
51 Padafika kunyumba muko alibe kubvuma kuti munthu aliyese angene naye pabodzi m’nyumba mumo kuchosapo Petulo, Yohani na Yakobo komasoti ababa na amayi wa mwana muyo.
52 Koma wanthu wose ambalira na kudzigugudza pachifuwa ndawa yokwinyirira. Pamwapo Yesu adawauza kuti: “Nyamalani, ndawa mwana muyu alibe kumwalira, koma ankugona.”
53 Padanena vimwevi, wanthu mwawo adayamba kumuseka monyoza, ndawa ambadziwa kuti mwana muyo wamwalira.
54 Koma iye adamuphata djanja nkumuchemera kuti: “Mtsikana iwe, muka!”
55 Pavidateno mzimu wake udabwerera ndipo nthawi mwiyo adamuka. Pamwapo Yesu adawauza kuti amupase chakudya mtsikana muyo.
56 Pamwapo, azibereki wake mwawo adakondwa maninge, koma Yesu adawalangiza kuti ayi kuti auze aliyese vomwe vachitika.
Mawu ya m’nyantsi
^ Panango kuti: “kumanda ya chikumbuso.”
