Wonembewa na Luka 9:1-62
-
Adapfunzisa opfunzira 12 momwe angalalikirire (1-6)
-
Herode adasokonezeka padabva vomwe Yesu ankuchita (7-9)
-
Yesu ankudyesa wanthu 5000 (10-17)
-
Petulo adati Yesu ni Khrisitu (18-20)
-
Yesu adaneneratu kuti adzaphewe (21, 22)
-
Vomwe wopfunzira chaiye wa Yesu afunika kuchita (23-27)
-
Yesu adachinja maonekedwe (28-36)
-
Mulumbwana yemwe wenze na chiwanda adapolesewa (37-43a)
-
Yesu ankunena pomwe va kufa kwake (43b-45)
-
Opfunzira wa Yesu ankugegedzana pankhani yakuti nkulu ni mbani (46-48)
-
Munthu yemwe ankutsutsanalini nase, ndiye kuti ali kumbali yathu (49, 50)
-
Wanthu wa ku Samariya adalamba Yesu (51-56)
-
Mwatingatewerere Yesu (57-62)
9 Patsogolo pake Yesu adasonkhanisa atumi 12 wale nkuwapasa mphanvu na ulamuliro pa viwanda vose nakuti ambakwanise kupolesa matenda.
2 Pamwapo adawatumiza kuti ambakalalikire va Ufumu wa Mulungu komasoti kupolesa wanthu.
3 Iye adawauza kuti: “Ayi kutenga kanthu kalikose pa ulendo moyu, peno ikhale mpsyimbo, kachola ka chakudya, nkate, kobiri panango malaya yawiri.*
4 Mukafika panyumba iriyose, mumbakhale m’nyumba mumo mpakana nthawe yochoka kumuko ikwane.
5 Kulikose komwe munthu angakutambirenilini, mukambabula mu thaundi mwiyo mumbakunkhumule pfumbi kumapazi yanu kuti ukhale umboni wowatsutsa.”
6 Pamwapo adanyamuka nkungena dera mwiyo muyi na muyi achimbalalikira ntontholo wabwino na kupolesa wanthu kulikose kwambayenda.
7 Manje Herode,* yemwe ambatonga dera, adabva vose vomwe vimbachitika. Iye adasowa chochita ndawa anango ambanena kuti Yohani wamukisiwa.
8 Koma anango ambanena kuti Eliya waonekera. Anango pomwe ambanena kuti m’bodzi wa aneneri wa kalekale wamuka.
9 Pamwapo Herode adati: “Yohani nidamugwata msolo. Manje yemwe ankuchita vomwe ninkubva ivi ni mbani?” Ndipomwapa ambafunisisa kuti amuwone.
10 Atumi wale padabwererako adafotokozera Yesu vomwe adachita. Padateno adawatenga nkuyenda nawo kwaokha mu thaundi yochemerewa kuti Betsaida.
11 Koma gulu ya wanthu idadziwa vimwevi ndipo idamutewera. Yesu adawatambira bwino nkuyamba kuwauza va Ufumu wa Mulungu, ndipo adapolesa womwe ambafunika kupolesewa.
12 Koma nthawe paidafika cha kumaulo, atumi 12 wale adabwera kwa iye nkunena kuti: “Kuno kulibe wanthu ndipo nthawe yamala, auzeni wanthu mwawa kuti anyamuke, ayende m’mamiyi yapafupi na madera yozungulira kuti akagule chakudya chakuti adye.”
13 Koma iye adawadawira kuti: “Imwepo muwapase chakudya.” Iwo adati: “Tiribe chilichose, tinamikate yashanu na ntsomba ziwiri basi. Panango tindoyenda kukagula chakudya cha wanthu wose mwawa.”
14 Penze amuna wothamangira 5000 ndipo Yesu adauza wopfunzira wake kuti: “Auzeni wanthu mwawa kuti akhale m’magulu ya wanthu 50.”
15 Wopfunzira mwawo adachitadi vimwevo mwakuti wanthu wose mwawo adakhala pasi.
16 Patsogolo pake adatenga mikate 5 na ntsomba ziwiri zire nkunyang’ana kudzulu ndipo adadalisa chakudya mwicho. Padateno adanyemanyema mikate mwayo nkuyapereka kwa wopfunzira wake kuti ayapereke kwa wanthu mwawo.
17 Pamwapo wose adadya mpakana kukhuta, ndipo adakonkhobza vosala vomwe vidadzala madengu 12.
18 Manje pangapemphera payekha, wopfunzira wake adafika kwa iye. Pamwapo iye adawabvunza kuti: “Ko wanthu ankunena kuti inepano ndine mbani?”
19 Iwo adamudawira kuti: “Ankunena kuti ndimwe Yohani M’batizi, anango ankunena kuti ndimwe Eliya, koma anango ankunena kuti ndimwe mnenerimbo basi.”
20 Pamwapo adawabvunza kuti: “Manje imwepo munena kuti ndine mbani?” Petulo adadawira kuti: “Ndimwe Khrisitu wa Mulungu.”
21 Pamwapo adawalangiza mwamphanvu kuti osati auze aliyese vimwevo.
22 Patsogolo pake adati: “Mwana wa munthu akufunika kugumana na mabvuto yazinji na kulambiwa na akulu, antsembe akulu na alembi. Ndipo akaphewe, koma pa ntsiku yachitatu adzamukisiwe.”
23 Patsogolo pake adauza wanthu wose kuti: “Peno munthu ankufuna kunitewera, adzilambe yekha na kutakula muti wake wodzudzikirapo* nkupitiriza kunitewera ntsiku na ntsiku.
24 Ndawa aliyese yemwe ankufuna kupulumusa moyo wake adzauluze, koma aliyese yemwe wauluza moyo wake ndawa ya ine adzaugumane.
25 Ko munthu angaphindule chani peno angagumane vinthu vose va mudziko iyi koma nkuluza moyo wake panango kudzidzonga?
26 Ndawa aliyese wochita manyazi na ine na mawu yangu, Mwana wa munthu adzachitembo naye manyazi akadzabwera mu ulemerero wake, wa Ababa wake na wa angelo wochena.
27 Koma shuwa ninkukuuzani kuti wanthu omwe aimirira pano, pali anango omwe adzalawelini impfa olo pang’ono mpakana adzayambe awona Ufumu wa Mulungu.”
28 Pazidapita ntsiku pafupifupi 8 wanena kale mawu mwaya, iye adatenga Petulo, Yohani na Yakobo nkukwera nawo phiri kukapemphera.
29 Pomwe angapemphera, maonekedwe ya nkhope yake yadachinja ndipo chovala chake chidawoneka chochena maninge na choyetima.
30 Pamwapo padawoneka wanthu awiri ankuyankhula naye. Wanthu mwawa enze Mose na Eliya.
31 Iwo adawonekera na ulemerero ndipo adayamba kukambirana va momwe Yesu adzachokere mu dziko iyi, mu Yerusalemu.
32 Pa nthawe mwiyi nkuti Petulo na anango omwe enze naye aneteratu na tulo. Koma tulo patudawamalira, adawona ulemerero wake komasoti amuna awiri ali imirire naye.
33 Manje pomwe amuna mwawa angasiyana naye, Petulo adauza Yesu kuti: “Mulangizi, vingakhale bwino kuti isepano timbakhale pano. Naboni tikhome matenti yatatu pano, ibodzi yanu, ibodzi ya Mose na inango ya Eliya.” Koma iye ambazindikiralini kuti ambanena chani.
34 Pambayankhula vimwevi, kudachita ntambo ndipo udayamba kuwafunikiza. Ntambo muyo paudawafunikiza, adachita mantha.
35 Pamwapo padabveka mawu yochoka mu ntambo mumo yakuti: “Uyu ni Mwana wangu yemwe namusankhula. Mumbamubvere.”
36 Pomwe mawu mwaya yangabveka, adawona kuti Yesu ali yekha. Koma iwo adakhala chete ndipo alibe kuuza aliyese mu ntsiku zimwezo chilichose pa vinthu vomwe adawona.
37 Mangwana yake, padabuluka m’phiri mumo, chigulu cha wanthu chidamuchunguzira.
38 Munthu munango yemwe wenze mu gulu mwiyo adakuwa kuti: “Mpfunzisi, ninkukukumbirani kuti mukawone mwana wangu mwamuna, ndawa iye ni m’bodzi basi.
39 Mzimu umuphata ndipo mwadzidzidzi akuwa, patsogolo pake umuchitisa kuti aphuphe uku ankuchita phovu. Mzimu moyu umudzonga maninge ndipo umusiyalini kamangu.
40 Nenze nakumbira opfunzira wanu kuti aubulise koma akangira.”
41 Yesu adadawira kuti: “Imwe m’badwo ulibe chikhulupiriro na wosokonezeka maganizo, ko nipitirize kukhala namwe mpakana lini? Nipitirize kukupirirani mpakana lini? Bwera naye kuno mwana wako muyo.”
42 Koma olo angamuyendesa kwa iye, chiwanda mwecho chidamugwesa pasi nkumuchitisa kuti aphuphe mwamphanvu. Yesu adakalipira mzimu wonyantsa muyo nkupolesa mulumbwana muyo ndipo adamupereka kwa ababa wake.
43 Wanthu wose adadabwa na mphanvu zodabwisa za Mulungu.
Wanthu mwawo peenze adakali wodabwa na vose vomwe iye angachita, Yesu adauza wopfunzira wake kuti:
44 “Tetekerani bwinobwino ndipo mumbakumbukire mawu mwaya, ndawa Mwana wa munthu adzaperekewe m’manja mwa wanthu.”
45 Koma wopfunzira mwawo alibe kubvesa vomwe Yesu adawauza. Tanthauzo yake yenze yobisika kwa iwo kuti osati azindikire ndipo ambagopa kumubvunza va mawu mwaya.
46 Patsogolo pake iwo adayamba kugegedzana pa nkhani yakuti nkulu ni mbani pakati pawo.
47 Yesu padazindikira vomwe angaganiza muntima mwawo, adatenga mwana mng’ono nkumuyimiririsa pambali pake.
48 Pamwapo adawauza kuti: “Aliyese yemwe watambira mwana mng’ono ninge muyu mu dzina yangu, watambirambo inepano. Ndipo aliyese yemwe watambira inepano, watambira pomwe yemwe adanituma. Ndipomwapa aliyese yemwe achita vinthu ninge mng’ono pakati panu ndiye nkulu.”
49 Patsogolo pake Yohani adanena kuti: “Mulangizi, isepano tawona munthu munango ankubulisa viwanda mu dzina yanu, koma tamulambiza, ndawa ankufambalini nase pabodzi.”
50 Koma Yesu adamuuza kuti: “Ayi kumulambiza ndawa yemwe ankutsutsanalini namwe, ali kumbali yanu.”
51 Pazimbafendera ntsiku zakuti atengewe nkuyenda kudzulu, adatsimikiza ntima kuyenda ku Yerusalemu.
52 Pamwapo adatuma wanthu kuti atsogole. Wanthu mwawo adayenda kukangena m’muyi wa Asamariya kuti akakonzekere kufika kwake.
53 Koma wanthu wa m’muyi muyo alibe kumutambira bwino ndawa wenze adatsimikiza muntima mwake kuti ayende ku Yerusalemu.
54 Wopfunzira wake, Yakobo na Yohani padawona vimwevi, adanena kuti: “Ambuya, ko mukufuna kuti tiwachemerere moto kuchokera kudzulu kuti uwanyekese?”
55 Koma iye adachungunuka nkuwatsuula.
56 Pamwapo Yesu na wopfunzira wake adayenda kumuyi unango.
57 Manje ali pa ulendo muyo, munthu munango adauza Yesu kuti: “Nikutewereni kulikose kwamungayende.”
58 Koma Yesu adamudawira kuti: “Nkhandwe ziri nazo mphako zokhala, ndipo mbalani zamunlengalenga zinavisa, koma Mwana wa munthu alibiretu olo potsamirisa msolo wake.”
59 Patsogolo pake adauza munthu munango kuti: “Bwera umbanitewere.” Koma munthu muyo adati: “Ambuya, nibvumizeni kuti niyambe nayenda kukaikha maliro ya ababa wangu.”
60 Yesu adamudawira kuti: “Asiye wakufa aikhe wakufa anzawo, koma iwe uyende ukalengeze va Ufumu wa Mulungu kulikose.”
61 Munango pomwe adanena kuti: “Inepano nikutewereni Ambuya, koma munibvumize niyambe nayenda kukalairana na wa m’banja mwangu.”
62 Yesu adamuuza kuti: “Aliyese wophata gedjo nkumbanyang’ana vinthu vakumambuyo, ankuyenereralini Ufumu wa Mulungu.”
Mawu ya m’nyantsi
^ Panango kuti: “vovala vizinji.”
^ Onani matanthauzo ya mawu yanango.
^ Onani matanthauzo ya mawu yanango.
