Vomwe atumi adachita 10:1-48
-
Masomphenya ya Koneliyo (1-8)
-
Masomphenya ya Petulo ya nyama zochenesewa (9-16)
-
Petulo adayenda kunyumba kwa Koneliyo (17-33)
-
Petulo adalalikira ntontholo wabwino kwa wanthu wa makhaindi yanango (34-43)
-
“Mulungu alibe tsankho” (34, 35)
-
-
Wanthu wa makhaindi yanango adatambira mzimu uchena nkubatiziwa (44-48)
10 Ku Kaisareya kwenze munthu munango dzina yake Koneliyo, mtsogoleri wa masocha* ya m’gulu* ya masocha yaku Itália.
2 Iye ambakonda maninge kupemphera ndipo ambagopa Mulungu pabodzi na wanthu wose wa m’banja yake. Komasoti ambapereka vinthu vizinji kwa wanthu wosauka ndipo ambapemphera mogwigwirira kwa Mulungu nthawe zose.
3 Ntsiku inango cha m’ma 15 ora, adawona masomphenya. Mngelo wa Mulungu adabwera kwa iye nkumuuza kuti: “Koneliyo!”
4 Pavidateno, Koneliyo adanyang’anisisa mngelo muyo mwamantha nkunena kuti: “Yankhulani Mbuya wangu.” Mngelo muyo adamuuza kuti: “Mulungu wabva mapemphero yako ndipo waona vinthu vomwe upasa wanthu wosauka.
5 Ndipomwapa tumiza wanthu ku Yopa kuti akachemere munthu munango dzina yake Simoni, yemwe achemerewa pomwe kuti Petulo.
6 Munthu moyu ni mulendo kunyumba kwa Simoni munango wopuka vikumba yemwe nyumba yake iri m’mphepete mwa nyanja.”
7 Mngelo yemwe ambayankhula naye ule padandoti wachoka, Koneliyo adachemera anyabasa wake awiri na msocha munango yemwe ambakonda vopemphera.
8 Iye adawafotokozera vose nkuwatuma kuti ayende ku Yopa.
9 Mangwana yake, iwo ali pa ulendo komasoti padandosala pang’ono kufika muthaundi mweyo, Petulo adakwira padenga kukapemphera cha m’ma 12 ora.
10 Koma adabva njala maninge ndipo ambafuna kudya. Pomwe chakudya chingakonzewa, adayamba kuwona masomphenya.
11 M’masomphenya mwayo adawona kudzulu kwafunguka, ndipo chinthu chinango chowoneka ninge chinguwo chikulu chinkubuluka. Chinthu chimwicho adachiphata makhona yose yanayi nkumbachibulusira padziko yapasi.
12 Pa chinthu mwecho penze makhaindi yaliyose ya nyama za minyendo 4, nyama zokwawa za padziko yapasi na mbalani za mumlengalenga.
13 Patsogolo pake adabva mawu yakuti: “Petulo, nyamuka ndipo phaya vinthu vimwevi udye.”
14 Koma Petulo adati: “Neye Ambuya, inepano nikanati nadyako chinthu chirichose chopsyipiziwa na chonyantsa.
15 Koma adabva pomwe mawu yale kachiwiri kuti: “Vinthu vomwe Mulungu wavichenesa, ulekeretu kunena kuti ni vopsyipiziwa.”
16 Adabva pomwe mawu mwaya kachitatu, ndipo nthawe mwiyoletu chinthu chowoneka ninge chinguwo chire chidatengewa nkuyenda kudzulu.
17 Petulo padasowa chochita ndawa yosakwanisa kubvesa tanthauzo ya masomphenya mwayo, wanthu omwe Koneliyo adawatuma wale adabvunza kuti nyumba ya Simoni iri kuponi ndipo enze adaima pansuwo wa mpanda.
18 Iwo adabvunza mokuwa kuti peno kumuko enze na mulendo dzina yake Simoni wochemerewa pomwe kuti Petulo.
19 Petulo ankuganizira va masomphenya mwayo, mzimu wa Mulungu udamuuza kuti: “Petulo! Pali wanthu atatu omwe ankukufuna.
20 Manje konzeka, buluka uyende nawo pabodzi. Ayi kukaikira, ndawa nawatuma ndine.”
21 Pamwapo Petulo adabuluka nkukagumana na wanthu mwawo ndipo adati: “Yemwe munkumufuna uyo ndine. Munkufuna nikuthandizeni chani?”
22 Iwo adati: “Tachokera kwa Koneliyo, mtsogoleri wa masocha. Iye ni munthu wolungama komasoti wogopa Mulungu ndipo ntundu wose wa Ayuda umutembeja. Mngelo wochena adamupasa malangizo yochokera kwa Mulungu kuti atume wanthu kudzakutengani kuti muyende kunyumba kwake, kuti akabve vomwe imwepo mukanene.”
23 Pamwapo adawangenesa m’nyumba nkuwasamalira ninge alendo wake.
Pakudachena, adanyamuka nkuyenda nawo ndipo abale anango wa ku Yopa adayenda naye pabodzi.
24 Mangwana yake adafika ku Kaisareya ndipo Koneliyo ambawadikhiliradi. Iye wenze adachemeresa azibale wake na azishamwali wake.
25 Petulo akungena, Koneliyo adagumana naye ndipo adagwada* powonesa kumutumikira.
26 Koma Petulo adamuimiririsa nkunena kuti: “Imirira, inembo ndine munthu ninge iwepo.”
27 Patsogolo pake adangena nkati uku ankukambirana ndipo adagumana wanthu azinji womwe adachemeresewa.
28 Pamwapo Petulo adawauza kuti: “Imwepo mukudziwa bwinobwino kuti ni vosabvumizika kuti Muyuda ambacheze na munthu wa khaindi inango panango kumufenderera. Koma Mulungu waniwonesa kuti ayi kuti ninene munthu aliyese kuti ni wopsyipiziwa panango ni wonyantsa.
29 Ndipomwapa niribe kuzeza kubwera pamudatumiza wanthu kuti adzanichemere. Manje niuzeni chomwe mwanichemerera.”
30 Pamwapo Koneliyo adati: “Ntsiku 4 kumbuyo, inepano nikupemphera m’nyumba mwangu muno cha m’ma 15 ora, nidandowona munthu munango wovala vogaka waima kutsogolo kwangu.
31 Munthu muyo adaniuza kuti: ‘Koneliyo, Mulungu wabva pemphero yako ndipo waona vinthu vomwe upasa wanthu wosauka.
32 Ndipomwapa tumiza wanthu ku Yopa kuti akachemere Simoni wochemerewa pomwe kuti Petulo. Munthu muyo ni mulendo mu nyumba ya Simoni wopuka vikumba, yemwe akhala m’mphepete mwa nyanja.’
33 Nthawe mwiyo nidatuma wanthu kuti akakuchemereni ndipo mwabwera ndawa ya kutikomera ntima. Ndipomwapa tose tiri pano pamaso pa Mulungu kuti tibve vose vomwe Yahova* wakulamulani kuti mutiuze.”
34 Petulo padabva vimwevi, adayamba kuyankhula kuti: “Manje nazindikira kuti Mulungu alibe tsankho.
35 Iye atambira munthu wochokera mu khaindi yose, yemwe amugopa na kuchita chilungamo.
36 Mulungu adatumiza mawu kwa Aizirayeli na kulengeza kwa iwo ntontholo wabwino wantendere pakuphatisa basa Yesu Khrisitu. Iye ni Ambuya wa wose.
37 Imwepo munkudziwa nkhani yomwe imbafotokozewa maninge kuyambira ku Galileya mpakana ku Yudeya kose, patsogolo pa ubatizo womwe Yohani angalalikira.
38 Nkhani yake yenze yonena va Yesu waku Nazareti, yemwe Mulungu adamudzodza na mzimu uchena na mphanvu. Pakuti Mulungu wenze naye, adafamba mudziko yose nkumbachita vabwino na kupolesa wanthu wose womwe Ndyerekezi ambawadzudza.
39 Ndipo isepano ndise mboni za vinthu vose vomwe adachita mu dziko ya Ayuda mpakana mu Yerusalemu. Koma Aizirayeli mwawo adamupha mwakuchita kumumanika pamuti.
40 Mulungu adamumukisa pa ntsiku yachitatu nkubvuma kuti wanthu amuwone,
41 osati wanthu wose, koma mboni zomwe Mulungu adasankhuliratu, zomwe ndisepano, omwe tidadya na kumwa naye pabodzi padamukisiwa.
42 Komasoti adatilamula kuti tilalikire kwa wanthu na kupereka umboni wokwana wakuti iye ni yemwe Mulungu adamupasa udindo woweruza wanthu wamoyo na wakufa.
43 Aneneri wose achitira umboni va iye, kuti aliyese womukhulupirira, machimo yake yakhululukiriwa mu dzina yake.”
44 Petulo pambayankhula vimwevi, wanthu wose womwe ambabvesera mawu mwayo adatambira mzimu uchena.
45 Ndipo abale omwe adabwera na Petulo wale, omwe enze pomwe ochitiwa mdulidwe, adadabwa maninge. Iwo adadabwa ndawa mphaso ya fovolo ya mzimu uchena idaperekewambo kwa wanthu wa makhaindi yanango.
46 Ndawa adawabva pomwe akuyankhula viyankhulo vinango na kulemekeza Mulungu. Pamwapo Petulo adati:
47 “Wanthu awa atambira mzimu uchena ninge momwe isembo tidatambirira. Ni mbani yemwe angalambize kuti aleke kubatiziwa m’madzi?”
48 Padateno, adawalamula kuti abatiziwe mudzina ya Yesu Khrisitu. Pamwapo iwo adamukumbira kuti akhale nawo kwa ntsiku zing’onong’ono.
Mawu ya m’nyantsi
^ Ambatsogolera masocha yokwana 100.
^ Gulu yose yenze na masocha 600.
^ Panango kuti: “adamujolimira.”
^ Onani vakumapeto A5.
