Vomwe atumi adachita 11:1-30
11 Manje atumi na abale womwe enze ku Yudeya adabva kuti wanthu wa makhaindi yanango nawombo atambira mawu ya Mulungu.
2 Koma Petulo padayenda ku Yerusalemu, wanthu wolimbikisa mdulidwe adayamba kumunena kuti anamulandu.
3 Iwo ambamunena kuti: “Iwepo udayenda kukangena m’nyumba ya wanthu wosachitiwa mdulidwe ndipo udadya nawo pabodzi.”
4 Pamwapo Petulo adayamba kuwafotokozera bwinobwino vomwe vidachitika kuti:
5 “Ine panimbapemphera mu thaundi ya Yopa, nidawona masomphenya. Nidawona chinthu chowoneka ninge chinguwo chikulu chikubuluka kuchokera kudzulu. Chinthu mwicho adachiphata makhona yose yanayi nkuchibulusira penenze.
6 Panidachinyang’anisisa, nidawona pomwe nyama za minyendo 4 za padziko yapasi, nyama za kuthengo, nyama zokwawa komasoti mbalani zamumlengalenga.
7 Nidabva pomwe mawu yakuti: ‘Petulo, nyamuka ndipo phaya vinthu vimwevi udye.’
8 Koma ine nidati: ‘Neye Ambuya, nkamwa mwangu mukanati mwangenako chinthu chirichose chopsyipiziwa komasoti chonyantsa.’
9 Koma nidabva pomwe mawu mwayale kachiwiri kuti: ‘Vinthu vomwe Mulungu wavichenesa, ulekeretu kunena kuti ni vopsyipiziwa.’
10 Mawu mwayo yadabveka pomwe kachitatu, ndipo patsogolo pake vose mwavire vidatengewa kuyenda kudzulu.
11 Nthawe mwiyo, wanthu atatu omwe adatumiwa kwa ine kuchokera ku Kaisareya adaima panyumba yomwe timbakhala.
12 Patsogolo pake mzimu udaniuza kuti niyende nawo, ayi kuti nikaikire olo pang’ono. Abale 6 awa adayenda nane pabodzi ndipo tidakangena munyumba ya munthu muyo.
13 Iye adatiuza kuti pewenze m’nyumba mwake adawona mngelo ali imirire ndipo adamuuza kuti: ‘Tuma wanthu kuti ayende ku Yopa kuti akachemere Simoni wochemerewa pomwe kuti Petulo.
14 Iye adzakuuze vinthu vomwe vidzathandize kuti iwepo pabodzi na wanthu wa m’banja mwako mupulumuke.’
15 Koma panidandoyamba kuyankhula, iwo adatambira mzimu uchena ninge momwe venzerembo na isepano pakuyamba pale.
16 Pavidateno nidakumbukira mawu yomwe Ambuya ambakonda kuyanena yale yakuti: ‘Yohani ambabatiza na madzi, koma imwepo mudzabatiziwe na mzimu uchena.’
17 Manje peno Mulungu adawapasa mphaso ya fovolo yomwe adatipasambo isepano omwe tidakhulupirira Ambuya Yesu Khrisitu, ko ine ndine mbani kuti nilambize Mulungu?”
18 Padabva vimwevi, adaleka kumutsutsa, ndipo adatamanda Mulungu kuti: “Pamwapa Mulungu waperekambo mwayi kwa wanthu wa makhaindi yanango kuti nawombo alape nkudzagumana moyo.”
19 Wanthu womwe adamwazikana ndawa ya mabvuto yomwe yadayamba ndawa ya vomwe vidachitikira Sitefano, adafika mpaka ku Foinike, ku Kupuro naku Antiokeya. Ndipo ambandolalikira kwa Ayuda wokha.
20 Koma anango pa wanthu mwawa enze wa ku Kupuro na ku Kurene. Iwo padafika ku Antiokeya adayamba kulengeza ntontholo wabwino wa Ambuya Yesu kwa wanthu woyankhula Chigiriki.
21 Djanja* ya Yahova* imbawathandiza ndipo wanthu azinji adakhulupirira nkuyamba kutewera Ambuya.
22 Mpingo waku Yerusalemu udabva va wanthu mwawa ndipo udatumiza Baranaba kuti ayende ku Antiokeya.
23 Padafika kumuko nkuwona kukoma ntima kukulu kwa Mulungu, adakondwa ndipo adayamba kulimbikisa wose kuti apitirize na ntima wose kukhala wokhulupirika kwa Ambuya.
24 Baranaba wenze munthu wabwino na wachikhulupiriro cholimba. Iye ambatsogolerewa maninge na mzimu uchena ndipo wanthu anango azinji adakhulupirira Ambuya.
25 Patsogolo pake Baranaba adayenda ku Tariso kukafagafaga Saulo.
26 Padamugumana adabwera naye ku Antiokeya. Iwo adasonkhana na mpingo kumuko kwa gole yantero ndipo adapfunzisa wanthu azinji. Ku Antiokeya ndiko komwe wopfunzira mwawo adayamba kuchemerewa kuti Akhrisitu, motsogolerewa na Mulungu.
27 Panthawe mweyi, aneneri wochokera ku Yerusalemu adayenda ku Antiokeya.
28 Pa aneneri mwawa m’bodzi dzina yake wenze Agabo, ndipo mothandiziwa na mzimu wa Mulungu, adaneneratu kuti padziko yose yapasi padzagwe njala ikulu. Vimwevi vidachitikadi munthawe ya Kalaudiyo.
29 Pamwapo wopfunzira mwawo adatsimikiza ntima kutumiza thandizo kwa abale waku Yudeya, aliyese mobverana na vomwe adakakwanisa.
30 Ndipo adachitadi vimwevo mwakuti thandizo mwiyo adapasira Baranaba na Saulo kuti akapereke kwa akulu.
