Vomwe atumi adachita 12:1-25
12 Panthawe mweyi Mpfumu Herode adayamba kudzudza wanthu anango mu mpingu.
2 Iye adapha Yakobo, m’bale wake wa Yohani na chibemba.
3 Padawona kuti vimwevi Ayuda akondwa navo, adamanga pomwe Petulo. (Adamumanga mu ntsiku za chikondwerero cha Mikate yalibe vofufumisa.)
4 Adamuphata nkumufungira mudjeri ndipo adamusiya m’manja mwa magulu 4 ya masocha kuti yambachinjane pakumudikhirira. Gulu iriyose yenze na masocha 4. Cholinga cha Herode chenze chakuti adzamutonge* pamaso pa wanthu Pasika akamala.
5 Pamwapo Petulo adafungiriwa mudjeri mumo, koma mpingo umbamupempherera maninge kwa Mulungu.
6 Pomwe Herode angakonza vakuti abwerese Petulo kwa wanthu, usiku muyo Petulo adagona pakati pa masocha yawiri ali womanga na matcheni yawiri. Pansuwo penze pomwe magwarda yomwe yambadikhirira djeri mwiyo.
7 Koma mwadzidzidzi mngelo wa Yahova* adafika, ndipo muchipinda cha djeri mwiyo mudagwerewera. Patsogolo pake mngelo muyo adamusa Petulo pakumugunduza kumbabvu nkunena kuti: “Muka kankulumize!” Padateno matcheni yomwe adamumanga nayo m’manja mwake yadagwa pasi.
8 Mngelo muyo adamuuza kuti: “Vala vovala vako na ntsapato zako.” Iye adachitadi vimwevo. Patsogolo pake adamuuza kuti: “Vala malaya yako yakunja ndipo umbanilondole.”
9 Iye adabula nkumbamulondola, koma alibe kudziwa kuti vomwe vimbachitika na mngelo muyo venzedi chaivo. Ambandoganiza kuti ankuwona masomphenya.
10 Padapitirira gulu yoyamba ya masocha pansuwo wachiwiri, adafika pansuwo wachisimbi wobulira pakungena muthaundi, ndipo udafunguka wokha. Padabula adayenda pabodzi msewu ubodzi, ndipo mwadzidzidzi mngelo ule adachoka.
11 Koma Petulo padayamba kuzindikira vomwe vikuchitika adati: “Manje nadziwa kuti Yahova* ndiye yemwe watumiza mngelo wake kudzanipulumusa m’manja mwa Herode komasoti ku vinthu vose vomwe Ayuda ambadikhirira kuti vichitike.”
12 Padazindikira vimwevi, iye adayenda kunyumba kwa Mariya mayi wake wa Yohani wochemerewa pomwe kuti Maliko. Kumuko kwenze kudasonkhana wanthu azinji nkumbapemphera.
13 Padagogodza pansuwo wa mpanda, mtsikana munango yemwe wenze nyabasa dzina yake Roda adayenda kuti akawone yemwe ankugogodza.
14 Koma padazindikira mawu ya Petulo, adakondwa maninge mwakuti m’malo mofungula nsuwo muyo, adathamangira nkati nkukanena kuti Petulo ali pansuwo.
15 Koma iwo adamudawira kuti: “Iwepo wafuntha kani!” Iye padalimbikira kunena kuti ni zedi, wanthu mwawo adayamba kunena kuti: “Ni mngelo wake muyo.”
16 Koma Petulo adapitiriza kugogodza. Iwo padafungula, adawona kuti ndiyedi ndipo adadabwa maninge.
17 Koma iye adawauza na manja kuti akhale chete, ndipo adawafotokozera bwinobwino momwe Yahova* adamubulisira mudjeri. Patsogolo pake adati: “Nkhani mweyi mukauze Yakobo na abale.” Padateno adabula nkuyenda kunango.
18 Pakudachena, masocha yale yadasokonezeka maninge ndawa yambadziwalini vomwe vachitikira Petulo.
19 Herode adamufagafaga Petulo kulikose ndipo padamusowa, adayamba kushupa magwarda yale na mibvunzo ndipo adalamula kuti awatenge nkukawalanga. Patsogolo pake Herode adachoka ku Yudeya nkuyenda ku Kaisareya, ndipo kumuko adakhalako ntsiku zing’onong’ono.
20 Herode adakalipa maninge ndawa ya wanthu waku Turo na wa ku Sidoni. Kumuko wanthu mwawo adabwera kwa iye mobverana ndipo padanyengerera Barasito, yemwe anganyang’anira nyumba ya mpfumu, adakumbira ntendere. Iwo adachita vimwevo ndawa dziko yawo imbathemba chakudya chochokera mudziko ya mpfumu mwiyo.
21 Pantsiku inango yomwe adasankhula, Herode adavala vovala vake vachifumu nkukhala pa mpando wake wotongera milandu ndipo adayamba kuyankhula na wanthu.
22 Wanthu mwawo padabva mawu yake adayamba kukuwa kuti: “Mwaya ni mawu ya Mulungu, osati ya munthu!”
23 Nthawe mwiyo mngelo wa Yahova* adamudwalisa, ndawa alibe kulemekeza Mulungu. Ndipo adadyewa na nkhonye nkufa.
24 Koma mawu ya Yahova* yadapitiriza kulengezewa ndipo wanthu azinji adakhala wokhulupirira.
25 Baranaba na Saulo padamaliza basa yopereka thandizo ku Yerusalemu, adabwerera. Pakuyenda adatenga Yohani, wochemerewa pomwe kuti Maliko.
Mawu ya m’nyantsi
^ Panango kuti: “adzamubulise nkumudzudza.”
^ Onani matanthauzo ya mawu yanango.
^ Onani matanthauzo ya mawu yanango.
^ Onani matanthauzo ya mawu yanango.
^ Onani matanthauzo ya mawu yanango.
^ Onani matanthauzo ya mawu yanango.
