Vomwe atumi adachita 13:1-52
13 Mumpingo wa ku Antiokeya mwenze aneneri na apfunzisi. Iwo enze Baranaba, Sumiyoni, wochemerewa pomwe kuti Nigeri, Lukiyo waku Kurene, Saulo na Manayeni yemwe adapfunzira pabodzi na Herode wotonga chigawo.
2 Pomwe iwo ambatumikira Yahova* na kudzimana kudya, mzimu uchena udawauza kuti: “Munipatulireko Baranaba na Saulo kuti aphate basa yomwe nidawachemerera.”
3 Padamaliza kudzimana kudya na kupemphera, adawaphata pamsolo nkuwabvumiza kuti ayende.
4 Pamwapo wanthu mwawo womwe adatumiziwa na mzimu uchena, adayenda ku Selukeya ndipo kuchokera kumuko adayenda ulendo wapamadzi kuyenda ku Kupuro.
5 Padafika mu thaundi ya Salami adayamba kulalikira mawu ya Mulungu m’masunagoge ya Ayuda. Iwo enze pomwe na Yohani yemwe angawatumikira.*
6 Iwo adafambafamba pantsuwa yose ya ku Kupuro mpakana adafika ku Pafo. Kumuko adagumana na Muyuda munango wamatsenga dzina yake Bara-Yesu, yemwe wenze pomwe mneneri wabodza.
7 Iye wenze pabodzi na governador Serigio Paulo, yemwe wenze munthu wanzeru. Governador moyu adachemera Baranaba na Saulo ndawa ambafunisisa kubva mawu ya Mulungu.
8 Koma Elima, wamatsenga, (ndawa dzina yake mweyi aitsumbudzulira tene) adayamba kutsutsana nawo. Iye ambayesesa kuti governador muyo ayi kuti akhulupirire Ambuya.
9 Koma Saulo wochemerewa pomwe Paulo, padadzadziwa na mzimu uchena, adamunyang’anisisa
10 nkunena kuti: “Iwe munthu wodzala na mabodza ya khaindi yose na voipa, mwana wa Ndyerekezi komasoti mzondi wa chinthu chirichose cholungama, ko udzasiye nthawe yanyi kuphwanya mpfundo za Yahova?*
11 Manje bvesera! Djanja ya Yahova* iri pa iwepo ndipo ukhale wosaona. Ndipo kwakanthawe, ukwaniselini kuwona kugaka kwa dzuwa.” Nthawe mwiyo adawona pfulere yamphanvu m’maso mwake na mdima wopasa mantha, ndipo adayamba kufagafaga wanthu wakuti amuphate djanja na kumutsogolera.
12 Governador ule padawona vimwevi, adakhulupirira, ndawa adadabwa maninge pa vomwe adapfunzira pa nkhani ya Yahova.*
13 Patsogolo pake Paulo na anzake wale, adayamba ulendo wa panyanja kuchoka ku Pafo, ndipo adakafika ku Pega, ku Pamfuliya. Koma Yohani adawasiya nkubwerera ku Yerusalemu.
14 Padachoka ku Pega adakafika ku Antiokeya waku Pisidiya. Kumuko adakangena musunagoge pantsiku ya Satade nkukhala pasi.
15 Chilamulo na vomwe aneneri adanemba pavidawerengewa pamaso pa wanthu, atsogoleri wa sunagoge adatuma munthu kukawauza kuti: “Abale imwe, peno munamawu yaliyose yomwe yangalimbikise wanthu awa, yayankhuleni.”
16 Pamwapo Paulo adaimirira ndipo adaimisa djanja yake mdzulu nkunena kuti:
“Wanthu imwe, Aizirayeli, komasoti mose imwepo womwe mugopa Mulungu, bveserani.
17 Mulungu wa wanthu awa Aizirayeli adasankhula azibereki wathu wakale. Pomwe iwo ambakhala mudziko yachilendo ya Iguputo, iye adawachitisa kukhala ntundu wamphanvu, ndipo adawabulisa mudziko mumo na djanja yake yamphanvu.
18 Kwa magole yothamangira 40, iye adapirira khalidwe yawo muchipululu.
19 Ndipo padadzonga mitundu 7 ya wanthu mudziko ya Kanani, adapereka dziko mwiyo kwa Aizirayeli kuti ikhale dziko yawo.
20 Vose vimwevi vidachitika kwa magole yothamangira 450.
Vimwevi pavidamala adawapasa woweruza mpakana kudzafika panthawe ya mneneri Samueli.
21 Koma patsogolo pake wanthu mwawo adanena kuti akufuna mpfumu. Ndipo Mulungu adawapasa mwana wa Kusi, munthu wa dzinza ya Benjamim ndipo adakhala mpfumu yawo kwa magole 40.
22 Padachosa moyu, adawapasa Davide kuti akhale mpfumu yawo. Iye Mulungu adamuchitira umboni kuti: ‘Nagumana Davide mwana wa Jese, munthu wapamoyo pangu. Moyu adzachite vose vomwe nikufuna.’
23 Mobverana na polomisi yake kuchokera pa mbadwa za munthu moyu, Mulungu wabweresa wopulumusa wanthu mu Izirayeli yemwe ni Yesu.
24 Mpulumusi moyu akanati wafika, Yohani adalalikira kwa wanthu wose wa ku Izirayeli va ubatizo, ninge chizindikiro cha kulapa.
25 Koma pomwe Yohani angamaliza utumiki wake, ambanena kuti: ‘Ko mukuganiza kuti inepano ndine mbani? Yemwe mukumuganizira uyo ndinepanolini. Koma munango ankubwera m’mambuyo mwangu, yemwe ine ndinelini woyenerera kuvula ntsapato zake.’
26 Wanthu imwe, abale wangu, imwepo mbadwa za Abulahamu, na wanthu wose wogopa Mulungu womwe munawo pabodzi awa, mawu ya chipulumuso chimwechi yatumiziwa kwa ise.
27 Ndawa atongi wa mu Yerusalemu na wanthu wawo alibe kumuzindikira. Koma pomwe angamuweruza, adakwanirisa vose vomwe aneneri adanena, vomwe vimbawerengewa mokuwa satade iriyose.
28 Podiya kuti alibe kugumana chifukwa chakuti amuphere, adachichimiza Pilato kuti moyu aphewe.
29 Ndipo padakwanirisa vinthu vose vomwe vidanembewa pakufotokoza va iye, adamubulusa pamuti nkumuikha m’manda.*
30 Koma Mulungu adamumukisa.
31 Ndipo kwa ntsiku zizinji adawonekera kwa wanthu omwe adafamba naye kuchokera ku Galileya nkuyenda ku Yerusalemu. Manjeuno mwawa ni mboni zake kwa wanthu.
32 Ndipomwapa isepano tinkulalikira kwa imwepo ntontholo wabwino wonena za vinthu vomwe azibereki wathu adapolomisiwa.
33 Ntontholo moyu ni wakuti Mulungu wakwanirisa vose vomwe adapolomisa kwa ise wana wawo pakumukisa Yesu, mobverana na vomwe vidanembewa mu salimo yachiwiri kuti: ‘Iwepo ndiwe mwana wangu. Lero ine nakhala baba wako.’
34 Ndipo nkhani yakuti iye adamumukisa ndipo angabwererelini pomwe ku thupi yomwe iwola, adaifotokoza tene: ‘Wanthu imwe, ine nidzakuwoneseni chikondi chokhulupirika chomwe nidapolomisa Davide. Polomisi mweyi ni yothembeka.’
35 Ndipo salimo inango inena pomwe kuti: ‘Mudzabvumelini kuti thupi ya wokhulupirika wanu iwole.’
36 Davide adachita vomwe Mulungu akufuna panthawe ya m’badwo wake, adamwalira nkuikhiwa m’manda ya azibereki wake ndipo thupi yake idawola.
37 Koma yemwe Mulungu adamumukisa ule thupi yake iribe kuwola.
38 Manje dziwani abale wangu kuti, isepano tikulalikira kwa imwepo va kukhululukiriwa kwa machimo pakuphatisira basa moyu.
39 Dziwani pomwe kuti pa vinthu vose vomwe kwenze kosakwanisika kuti muwonewe kuti mulibe mulandu pophatisira basa Chilamulo cha Mose, aliyese wokhulupirira akuwonewa kuti alibe mulandu pophatisira basa moyu.
40 Ndipomwapa samalani kuti vomwe aneneri adanemba ayi kuti vikuchitikireni, vomwe vinena kuti:
41 ‘Imwepo wonyoza onani vomwe ine nikuchita nkudabwa navo. Patsogolo pake mudzamale, ndawa mudzakhulupirirelini olo pang’ono vomwe nidzachite muntsiku zanu, podiya munango achikufotokozerani vose bwinobwino.’”
42 Manje pomwe ambabula, wanthu adawagwigwirira kuti adzawafotokozere pomwe nkhani zimwezi Satade ikubwera.
43 Pamwapo nsonkhano wa musunagoge paudamala, Ayuda na wanthu azinji womwe adachita kuchinja nkukhala Ayuda womwe angatumikira Mulungu adalondola Paulo na Baranaba. Ndipo iwo adauza wanthu mwawo kuti apitirize kukhala woyenerera kutambira kukoma ntima kukulu kwa Mulungu.
44 Pa Satade inango, wanthu azinji adasonkhana kudzabvesera mawu ya Yahova.*
45 Ayuda padawona gulu ya wanthu mwiyo, adachita njiru ndipo adayamba kutsutsa mwamwano vomwe Paulo angayankhula.
46 Pamwapo Paulo na Baranaba adayankhula molimba ntima kuti: “Imwepo mwenze woyenerera kuti muyambe kuuziwa mawu ya Mulungu. Koma pakuti mwachita kulamba ndipo munkudziweruza mwekha kuti ndimwe wosayenerera moyo wosapera, ise tikuyenda kwa wanthu wa makhaindi yanango.
47 Ndipo Yahova* watilamula kuti: ‘Nakupasani udindo kuti mukhale kugwerewera kwa wanthu wa makhaindi yanango, kuti mukhale chipulumuso mpakana kumamaliziro ya dziko yapasi.’”
48 Wanthu wa makhaindi yanango padabva vimwevi, adakondwa ndipo adatamanda mawu ya Yahova.* Wanthu wose omwe enze na maganizo yabwino yomwe yadakawathandiza kugumana moyo wosapera adakhala wokhulupirira.
49 Komasoti, mawu ya Yahova* yadapitiriza kulengezewa mudziko yose mwiyo.
50 Koma Ayuda adauza amayi obvekera ogopa Mulungu na amuna wolemekezeka wa mu thaundi mwiyo mawu yoipa. Pamwapo iwo adachitisa kuti Paulo na Baranaba ayambe kudzudziwa ndipo adawaponya kunja kwa thaundi yawo.
51 Koma Paulo na Baranaba adakunkhumula pfumbi kumapazi yawo kuti ukhale umboni wowatsutsa ndipo adayenda ku Ikoniyo.
52 Ndipo wopfunzira mwawo adapitiriza kukhala wokondwa komasoti mzimu uchena umbawathandiza maninge.
Mawu ya m’nyantsi
^ Onani vakumapeto A5.
^ Panango kuti: “angawathandiza.”
^ Onani vakumapeto A5.
^ Onani vakumapeto A5.
^ Onani vakumapeto A5.
^ Panango kuti: “manda yachikumbuso.”
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
