Vomwe atumi adachita 14:1-28
14 Paulo na Baranaba pomwe enze ku Ikoniyo, adangena mu sunagoge wa Ayuda ndipo adayankhula bwino maninge mwakuti Ayuda azinji pabodzi na Agiriki adakhala wokhulupirira.
2 Koma Ayuda womwe alibe kukhulupirira, adauza voipa wanthu wa makhaindi yanango nkuwasokoneza maganizo kuti atsutsane na abale mwawo.
3 Pamwapo adamala nthawe itali ankuyankhula molimba ntima, ndawa ya mphanvu ya Yahova.* Iye adatsimikizira mawu ya kukoma ntima kwake kukulu, pakubvuma kuti wopfunzira mwawo ambachite vizindikiro na vodabwisa.
4 Koma gulu ya wanthu wa mu thaundi mwiyo idagawikana. Anango enze kusaidi ya Ayuda, anango kusaidi ya atumi.
5 Pamwapo wanthu wa makhaindi yanango komasoti Ayuda na wolamulira wawo, adakonza chizondo kuti awachitire voipa atumi mwawo nkuwaboma na minyala.
6 Koma iwo padadziwisiwa vimwevi, adathawira m’mathaundi ya Lukaoniya, Lusitara, Debe na m’madera yozungulira.
7 Kumuko adapitiriza kulalikira ntontholo wabwino.
8 Ku Lusitara, kwenze munthu munango wopunduka minyendo ndipo wenze khale pasi. Iye adabadwa wopunduka ndipo wenze akalibe wafambako.
9 Munthu muyo ambabvesera pomwe Paulo angayankhula. Manje Paulo padamunyang’anisisa adawona kuti wenze na chikhulupiriro chakuti angapolesewe.
10 Pamwapo Paulo adayankhula mokuwa kuti: “Imirira!” Padateno, iye adamoga nkuyamba kufamba.
11 Gulu ya wanthu pidawona vomwe Paulo adachita, idakuwa mu chiyankhulo cha Chilukaoniya kuti: “Milungu yakhala ninge wanthu ndipo yabwera kwa ise!”
12 Pamwapo Baranaba adayamba kuchemerewa kuti Zeu, koma Paulo ambamuchemera kuti Heme, ndawa ndiye ambatsogolera pakuyankhula.
13 Manje wantsembe wa Zeu, yemwe kachisi wake wenze pafupi na pongenera pa thaundi mwiyo, adabweresa ng’ombe zimuna na nkhata za mafololi pa misuwo ya mpanda. Iye ambafuna kupereka ntsembe pabodzi na gulu ya wanthu mwiyo.
14 Koma atumi mwawo, Baranaba na Paulo, padabva vimwevi adang’amba malaya yawo yakunja nkuthamanga kukangena mugulu ya wanthu mwawo ankukuwa kuti:
15 “Wanthu imwe, ko mukuchitiranyi vimwevi? Isembo ndise wanthu ndipo tiphonyesambo ninge imwepo. Tikulengeza ntontholo wabwino kwa imwepo kuti muleke vinthu vachabechabe vimwevi nkuyamba kutumikira Mulungu wamoyo, yemwe adakonza kudzulu, dziko yapasi, nyanja na vose viri mumo.
16 Mibadwo ya m’mbuyo yadabvuma wanthu wa makhaindi yose kuti yafambe munjira zawo.
17 Koma iye sikuti adakhala alibe umboni wakuti adachita vabwino. Adakupasani nvula kuchokera kudzulu na nthawe yomwe vokolola vanu vikhala vizinji. Adadzadza mitima yanu na chakudya komasoti kukondwa.”
18 Olo kuti atumi mwawo adanena vimwevi, adashupika kulambiza gulu ya wanthu mwawo kupereka ntsembe kwa iwo.
19 Manje Ayuda omwe adabwera kuchokera ku Antiokeya na ku Ikoniyo adapumpsa wanthu mwawo. Pamwapo adaboma Paulo na minyala nkumukwekwetera kunja kwa thaundi mwiyo poganiza kuti wafa.
20 Koma pomwe wopfunzira adamuzungulira, adamuka nkukangena mu thaundi. Mangwana yake Paulo na Baranaba adachoka nkuyenda ku Debe.
21 Padalalikira ntontholo wabwino mu thaundi mweyi nkupfunzisa wanthu azinji kuti akhale wopfunzira, adabwerera ku Lusitara, ku Ikoniyo na ku Antiokeya.
22 M’malo yose mwaya ambalimbikisa wopfunzira komasoti kuwathandiza kuti apitirize kukhala na chikhulupiriro. Ambawauza kuti: “Tifunika kugumana na mabvuto yazinji kuti tikangene mu Ufumu wa Mulungu.”
23 Adasankhula pomwe akulu mu mpingo uliwose, ndipo padapemphera komasoti kudzimana kudya, adawapereka kwa Yahova* yemwe adamukhulupirira.
24 Patsogolo pake adapita na ku Pisidiya nkuyenda ku Pamfuliya.
25 Padamaliza kulalikira mawu ya Mulungu ku Pega, adayenda ku Ataliya.
26 Pakuchoka kumuko adafamba ulendo wa pamadzi kubwerera ku Antiokeya. Kumuku ndiko komwe m’mbuyo umu abale adawasankhula kuti Mulungu awaonese kukoma ntima kukulu na cholinga chakuti aphate basa, yomwe panthawe mweyi enze adaimaliza.
27 Padafika kumuko adasonkhanisa wanthu wa mumpingu ndipo adawafotokozera vinthu vizinji vomwe Mulungu adachita pakuphatisira basa iwo. Adawafotokozera pomwe kuti Mulungu adafungula pomwe nsuwo kuti wanthu wa makhaindi yanango akhale wokhulupirira.
28 Pamwapo adakhala na wopfunzira mwawo kwakanthawe.
