Vomwe atumi adachita 16:1-40
16 Patsogolo pake Paulo adafika ku Debe komasoti ku Lusitara. Kumuko kwenze wopfunzira munango dzina yake Timoteyo, mwana wa mayi wa Chiyuda wokhulupirira, koma ababa wake enze Mgiriki.
2 Abale wa ku Lusitara na wa ku Ikoniyo adapereka umboni wabwino wofotokoza va iye.
3 Paulo adawonesa kuti ankufuna kumutenga pa ulendo wake. Pamwapo adamutenga nkumuchita mdulidwe ndawa ya Ayuda omwe enze kumuko, pakuti wose ambadziwa kuti ababa wake enze Mgiriki.
4 M’mathaundi yose yomwe iwo angapita, angapasa wokhulupirira wa kumuko malamulo yofunika kuyatewedza, mobverana na vomwe atumi komasoti akulu wa ku Yerusalemu adagamula.
5 Pamwapo wanthu wa m’mipingu adapitiriza kukhala na chikhulupiriro cholimba ndipo chiwerengero chimbaingizirika ntsiku na ntsiku.
6 Patsogolo pake iwo adayenda ku Fulugiya komasoti mu dziko ya Galatiya, ndawa mzimu uchena udawalambiza kuyankhula mawu ya Mulungu muchigawo cha Ásia.
7 Padafika ku Musiya adayesesa kuti ayende ku Bituniya, koma mzimu wa Yesu ulibe kuwabvumiza.
8 Ndipomwapa adandogwata* na ku Musiya nkukafika ku Torowa.
9 Manje usiku Paulo adawona masomphenya. Adawona munthu munango waku Makedoniya ali imirire nkumuuza kuti: “Yambukirani kuno ku Makedoniya mudzatithandize.”
10 Padawona masomphenya mwayo, tidaganiza voyenda ku Makedoniya. Tidatsimikizira kuti Mulungu watichemera kuti tikalengeze ntontholo wabwino kwa wanthu wa kumuko.
11 Pamwapo tidanyamuka ulendo wapanyanja kuchokera ku Torowa nkuyenda ku Samatirake. Koma mangwana yake tidafika ku Neapoli.
12 Patidachoka kumuko tidafika ku Filipi, mu thaundi yolamuliwa na Aroma, yomwe ni thaundi ikulu yachigawo cha Makedoniya. Tidakhala mu thaundi mweyi kwa ntsiku zing’onong’ono.
13 Pantsiku ya satade tidabula na pansuwo wa pampanda nkuyenda m’mphepete mwa kamadzi, komwe timbaganiza kuti kuli malo yopempherera. Patsogolo pake tidakhala pasi nkuyamba kuyankhula na azimayi omwe adasonkhana kumuko.
14 Pagulu mwiyo penze mayi munango dzina yake Lidiya ndipo ambatumikira Mulungu. Iye adachokera mu thaundi ya Tiyatira ndipo ambagulisa nguwo na vovala vifuwira. Pomwe ambabvesera, Yahova* adafungula maninge ntima wake kuti abvesere vomwe Paulo angayankhula.
15 Iye na wanthu wa m’banja yake padabatiziwa adatikumbira kuti: “Abale wangu, peno mwawona kuti ndine wokhulupirika kwa Yahova,* naboni mukakhale kwathu.” Ndipo adatitenga nkuyenda kwawo.
16 Ntsiku inango pomwe timbayenda kumalo yopempherera, tidagumana na nyabasa munango wachitsikana yemwe wenze na mzimu woipa, chiwanda choneneratu vakutsogolo. Iye ambachitisa kuti mabwana yake ambaphindule maninge ndawa ya vomwe ambaneneratu.
17 Mtsikana muyo ambandolondola Paulo na isepano nkumbakuwa kuti: “Wanthu awa ni akapolo wa Mulungu Wamdzulumdzulu ndipo akulengeza njira yachipulumuso kwa imwepo.”
18 Iye adachita vimwevi kwa ntsiku zizinji. Patsogolo pake Paulo padaneta navo, adachungunuka nkuuza mzimu muyo kuti: “Ninkukulamula mu dzina ya Yesu Khrisitu kuti ubule mwa mtsikana moyu.” Nthawe mwiyoletu mzimu muyo udabula.
19 Koma mabwana yake yale payadawona kuti yankuphindulalini pomwe, yadaphata Paulo na Sila nkuyenda nawo mubazali, momwe mwenze atsogoleri wawo.
20 Pomwe adafika nawo kwa atsogoleri mwawo, wanthu mwawo adanena kuti: “Wanthu awa ankusokoneza maninge muthaundi yathu, komasoti iwo ni Ayuda.
21 Ndipo akufalisa miyambo yomwe kwa isepano ni yosabvumizika kuyatewedza panango kuyachita, ndawa ndise Aroma.”
22 Patsogolo pake gulu yose idanyamuka nkuyenda kukapopotera atumi mwawo. Ndipo atsogoleri mwawo, adavula atumi malaya yawo mwakuchita kuwang’ambira nkuwalamula kuti awamenye na mpsimbo.
23 Padawamenya maninge, adawafungira mudjeri na kulamula wonyang’anira djeri kuti ambawanyang’anire kuchitira kuti angathawe.
24 Pakuti adamulamula vimwevi, iye adakawaika muchipinda cha nkati cha mudjeri mwiyo nkuphinirira minyendo yawo na matabwa yobowola.
25 Koma pakati pa usiku, Paulo na Sila adayamba kupemphera komasoti kutamanda Mulungu pakuimba nyimbo, mwakuti wadjeri anango ambawabva.
26 Mwadzidzidzi padachitika chivomezi champhanvu, mpakana djeri mwiyo idagunduzika. Nthawe mwiyoletu misuwo yose yadafunguka, ndipo aliyese tcheni yake idamasuka.
27 Wonyang’anira djeri ule padamuka nkuwona kuti misuwo ya djeri ni yofunguka, adasolola chibemba chake kuti adziphe, pakuganiza kuti wadjeri mwawo athawa.
28 Koma Paulo adakuwa kuti: “Ayi kudzipha, tose tilipo!”
29 Iye adakumbira kuti amupase kandyero ndipo adangena nkati mumo mwakankulumize. Ankunjenjemera na mantha, adagwada patsogolo pa Paulo na Sila.
30 Patsogolo pake adawabulisa kunja nkunena kuti: “Mabwana, nichite chani kuti nipulumuke?”
31 Iwo adati: “Khulupirira Ambuya Yesu ndipo udzapulumuke pabodzi na wanthu wa m’nyumba yako.”
32 Patsogolo pake adayankhula mawu ya Yahova* kwa iye pabodzi na wose wa m’nyumba yake.
33 Usiku muyo adawatenga nkuwatsuka vilonda vawo. Pakalibe kupita nthawe zizinji, iye na wanthu wose wa m’banja mwake adabatiziwa.
34 Patsogolo pake adayenda nawo kunyumba kwake nkuwaikhira chakudya pameza. Ndipo iye pabodzi na wose wa m’banja mwake, adakondwa maninge ndawa adakhulupirira Mulungu.
35 Mangwana yake machibese, akuluakulu owona va malamulo adatumiza masocha nkukanena kuti: “Wanthu mwawa amasuleni.”
36 Pamwapo wonyang’anira djeri ule adauza Paulo kuti: “Akuluakulu wa va malamulo atumiza wanthu kudzanena kuti awiri imwe mumasuliwe. Ndipomwapa bulani manje, ndipo muyende mwa ntendere.”
37 Koma Paulo adawauza kuti: “Iwo atikwapula pamaso pa wanthu na kutifungira mudjeri ndipo alibe kutitonga mulandu, koma isepano ndise Aroma. Manje ankutibulisa mwachintsintsi? Neye, vimwevi vikwanisikelini! Abwere mwawo anikachiro adzatibulise wokha.”
38 Manje masocha mwayo yadayenda kukanena vimwevi kwa akuluakulu wa va malamulo wale. Akuluakulu wa va malamulo mwawo adachita mantha padabva kuti wanthu mwawo ni Aroma.
39 Pamwapo iwo adabwera nkuwagwigwirira, ndipo padawabulisa adawakumbira kuti achoke muthaundi mweyo.
40 Koma iwo padabula mudjeri mumo adayenda kunyumba kwa Lidiya. Padawona abale, adawalimbikisa ndipo patsogolo pake adanyamuka nkumbayenda.
Mawu ya m’nyantsi
^ Panango kuti: “adandopita.”
^ Onani matanthauzo ya mawu yanango.
^ Onani matanthauzo ya mawu yanango.
^ Onani matanthauzo ya mawu yanango.
