Vomwe atumi adachita 17:1-34
17 Patsogolo pake iwo adayenda nkupita na ku Amfipoli na ku Apoloniya ndipo adafika ku Tesalonika, komwe kwenze sunagoge wa Ayuda.
2 Pamwapo ninge mwachizolowezi chake, Paulo adangena mu sunagoge mumo ndipo kwa masondo yatatu adakambirana nawo mpfundo za m’Malemba.
3 Iye ambafotokoza na kuwonesa umboni wonembewa powatsimikizira kuti venze vofunika kuti Khrisitu adzudzike, patsogolo pake nkumuka. Ambanena kuti: “Yesu yemwe ninkumulalikira kwa imwepo ndiye Khrisitu.”
4 Pamapeto pake, anango mwa wanthu mwawo adakhala wokhulupirira ndipo adabverana na Paulo na Sila. Agiriki azinji omwe ambatumikira Mulungu na azimayi azinji wolemekezeka adachitambo chibodzibodzi.
5 Koma Ayuda adachita njiru ndipo adasonkhanisa wanthu anango woipa omwe ambandokhala pa bazali. Iwo adakonza gulu yochita vinthu voipa nkuyamba kuchita chipiringu muthaundi mumo. Patsogolo pake adayenda kunyumba ya Yasoni, nkukafagafaga Paulo na Sila kuti awabulise nkukawapereka kugulu mwaire yomwe imbachita chipiringu.
6 Padakangira kuwagumana, adaphata Yasoni na abale anango nkuyenda nawo kwa wolamulira wa thaundi mwiyo, ankukuwa kuti: “Wanthu awa womwe ayambisa mabvuto kulikose, ankugumanika pomwe kuno manje.
7 Ndipo Yasoni wawatambira ninge alendo wake. Wanthu wose mwawa ankuchita votsutsana na malamulo ya Kaisara. Nani ati kuli pomwe mpfumu inango dzina yake Yesu.”
8 Padanena mawu mwaya, gulu ya wanthu ire komasoti wolamulira wa muthaundi mwiyo adakalipa maninge.
9 Wolamulira wa thaundi mwiyo adalipirisa Yasoni na anango wale kobiri, patsogolo pake adawamasula.
10 Pakudandoti kwadoka, abale adabulisa Paulo na Sila nkuwatumiza ku Bereya. Iwo padafika kumuko, adangena mu sunagoge wa Ayuda.
11 Koma wanthu wa ku Bereya enze na ntima wofuna kupfunzira kuposha wa ku Tesalonika wale. Iwo adatambira mawu ya Mulungu na chidwi chikulu maninge, ndipo ntsiku na ntsiku ambafagafaga Malemba mosamala maninge kuti atsimikizire peno vomwe adabva venze vazedi.
12 Azinji pa wanthu mwawo adakhala wokhulupirira, chibodzibodzimbo akazi na amuna anango obvekera wa Chigiriki.
13 Koma Ayuda wochokera ku Tesalonika padabva kuti Paulo ankufalisa pomwe mawu ya Mulungu ku Bereya, adayenda pomwe kumuko nkukachitisa wanthu kuti akalipire atumi mwawo nkuyambisa chipiringu.
14 Nthawe mwiyo abale adatumiza Paulo kuti ayende kunyanja. Koma Sila na Timoteyo adasala kumuko.
15 Wanthu omwe adaperekeza Paulo adakamufikisa ku Atene. Koma adabwerera padatumiwa kuti akauze Sila na Timoteyo kuti alondole Paulo mwakankulumize.
16 Pomwe Paulo ambawadikhirira ku Atene, ntima udamuwawa maninge pakuwona kuti thaundi mwiyo yadzala na mafano.
17 Padangena musunagoge adayamba kukambirana na Ayuda na wanthu anango wotumikira Mulungu. Ndipo ntsiku na ntsiku ambakambirana pomwe na wanthu womwe angawagumana pa bazali.
18 Koma wanthu anango wopfunzisiwa na Epikureya na Sitoiki adayamba kutsutsana naye. Anango ambanena kuti: “Ko nayembo uyu akundodzodzodeka apa afuna anene chani?” Pomwe anango ambanena kuti: “Ankuwoneka kuti ankulalikira va milungu yachilendo.” Ambanena vimwevi ndawa yakuti Paulo ambalengeza ntontholo wabwino wa Yesu na va kumuka kwa akufa.
19 Pamwapo adamuphata nkuyenda naye kwa Areopagi nkumuuza kuti: “Ko ungatiuzeko chipfunziso chinyowani chomwe unkupfunzisa ichi?
20 Ndawa vomwe unkutiuza ivi tenze tikanati kuvibvako. Manje tikufuna utiuze tanthauzo yake.”
21 Ndipo wanthu wose wa ku Atene na alendo wogonerera kumuko, ambamala nthawe yawo yose yopumula akufotokoza panango kubvesera nkhani zinyowani.
22 Manje Paulo adaimirira pakati pa gulu mwiyo ya Areopagi nkunena kuti:
“Imwe wanthu wa ku Atene, nawona kuti pa vinthu vose mugopa* maninge milungu kuposha momwe anango achitira.
23 Mwakulinganiza, pomwe nimbagwata nkumbanyang’anisisa vinthu vomwe mutumikira, nawona pomwe guwa ya ntsembe yonembewa kuti: “Kwa Mulungu Wosadziwika.’ Ndipomwapa inepano nikulalikira kwa imwepo va Mulungu muyo wosadziwika yemwe imwepo mumutumikira.
24 Mulungu yemwe adakonza dziko iyi na vinthu vose viri momu, akhalalini mu twakachisi tokonzewa na manja. Iye ndiye Ambuya wakudzulu na dziko yapasi.
25 Ndipo iye atumikiriwalini na manja ya wanthu kukhala ninge asowa chinthu, ndawa ndiye yemwe adapasa wanthu wose moyo, mphuwe, na vinthu vose.
26 Ndipo kuchokera kwa munthu m’bodzi adakonza makhaindi yose ya wanthu, kuti akhale padziko yose yapasi. Iye adaikha nthawe kuti vinthu vinango vimbachitike komasoti adaikha malire ya malo yakuti wanthu ambakhale.
27 Adachita vimwevi kuti wanthu mwawo afagefage Mulungu, amufagefage na kumugumanadi, olo kuti iye akhalalini kutali na munthu aliyese payekha.
28 Pale ndawa ya iye tinamoyo, tifamba ndipo tilipo, ninge momwe wanthu wanu anango wanthano anenera kuti: ‘Pale ndise wana wake.’
29 Ndipomwapa pakuti ndise wana wa Mulungu, ayi kuti timbaganize kuti Mulungu muyo ali ninge golide, siliva, mwala panango chirichose chosemewa na wanthu wabuya.
30 Ni shuwadi kuti Mulungu adalekerera nthawe yomwe wanthu angadziwalini vinthu, koma manjeuno ankuuza wanthu kulikose kuti wose alape.
31 Ndawa wakhazikisa ntsiku yomwe akufuna kudzaweruza mwachilungamo dziko yose yapasi, pakuphatisira basa munthu yemwe iye wamusankhula. Ndipo watsimikizira wanthu wose vimwevi pomumukisa.”
32 Manje wanthu padabva va kumuka kwa akufa, anango adayamba kuseka monyoza, pomwe anango adati: “Viri bwino, udzatiuze pomwe vimwevi nthawe inango.”
33 Pamwapo Paulo adawasiya.
34 Koma wanthu anango adabverana naye ndipo adakhala ateweri wa Yesu. Anango pa wanthu mwawa enze Diyoniziyo, yemwe ambatonga milandu mu nyumba ya Areopagi, mayi munango dzina yake Damarisi komasoti wanthu anango.
Mawu ya m’nyantsi
^ Panango kuti: “mupempherera.”
