Vomwe atumi adachita 19:1-41
19 Nthawe inango Apolo pewenze ku Korinto, Paulo adayenda na kumadera ya kuntunthu mpakana kukafika ku Efeso. Kumuko adagumanako opfunzira anango,
2 ndipo adawabvunza kuti: “Ko mudatambira mzimu uchena pamudakhala okhulupirira?” Iwo adamudawira kuti: “Isepano tikanati kubvako kuti kuli mzimu uchena.”
3 Iye adawabvunza pomwe kuti: “Manje mudabatiziwa na ubatizo wakhaindi yanyi?” Iwo adadawira kuti: “Tidabatiziwa ubatizo wa Yohani.”
4 Patsogolo pake Paulo adati: “Ubatizo womwe Yohani angabatiza wanthu, wenze chizindikiro chakuti munthu walapa. Ambauza wanthu kuti akhulupirire yemwe ankubwera m’mambuyo mwake, kutanthauza Yesu.”
5 Padabva vimwevi, wanthu mwawo adabatiziwa mudzina ya Ambuya Yesu.
6 Manje Paulo padawaphata pamsolo, iwo adatambira mzimu uchena ndipo adayamba kuyankhula viyankhulo vizinji na kuchita vinthu ninge aneneri.
7 Wose pabodzi enze amuna othamingira 12.
8 Kwa minyezi yatatu, ambayenda ku Sunagoge komwe ambayankhula molimba ntima. Kumuko ambakamba nkhani na kuwafotokozera mpfundo zofika pamoyo pankhani ya Ufumu wa Mulungu.
9 Koma anango adapitiriza kuchita nthota komasoti ambakhulupiriralini, ndipo ambanena vonyoza Njira mwiyo pamaso pa wanthu azinji. Iye adachoka pamwapo nkuchosa pomwe wopfunzira mwawo pakati pawo. Ndipo ntsiku na ntsiku ambakamba nkhani mu nyumba ikulu ya pashikola ya Turano.
10 Vimwevi vidachitika kwa magole yawiri ndipo wanthu wose wokhala mu chigawo cha Ásia, Ayuda pabodzi na Agiriki, adabva mawu ya Ambuya.
11 Mulungu adapitiriza kuchita vinthu vamphanvu komasoti vodabwisa pophatisa basa Paulo.
12 Mpakana wanthu ambatenga olo tunguwo na vovala vomwe vagumirira Paulo nkuyenda navo kwa odwala ndipo matenda yawo yambamaliratu. Nayombo mizimu yoipa yambabula.
13 Koma Ayuda anango omwe ambafambafamba nkumbabulisa viwanda, adayesayesa kutomola dzina ya Ambuya Yesu pofuna kupolesa wanthu omwe enze na mizimu yoipa. Ambanena kuti: “Ninkukulamula mudzina ya Yesu yemwe Paulo ankumulalikira.”
14 Penze wana amuna 7 wa Sikeva, wantsembe nkulu wa Chiyuda, omwe ambachita vimwevi.
15 Koma mzimu woipa udawadawira kuti: “Inepano Yesu ninkumudziwa ndipo Paulo ninkumudziwa pomwe bwinobwino. Manje imwepo ndimwe mbani?”
16 Patsogolo pake, munthu yemwe wenze na mzimu woipa ule adawamogera. Adamenyana nawo m’bodzim’bodzi mpakana adawagonjesa wose mwawo, mwakuti adabula m’nyumba mumo nkuthawa ali pezi komasoti ali opwetekeka.
17 Wanthu wose adadziwa vimwevi, Ayuda na Agiriki omwe ambakhala ku Efeso. Pamwapo wanthu wose adachita mantha ndipo dzina ya Ambuya Yesu idapitiriza kulemekezewa.
18 Wanthu azinji omwe adakhala okhulupirira, ambabwera kudzaulula machimo yawo na kufotokoza powonekera voipa vomwe angachita.
19 Wanthu azinji omwe ambachita vamatsenga adaunjika mabukhu yawo nkuyashoka wanthu wose ankuwona. Ndipo padawerengera kudula kwake adagumana kuti yenze yokwana kobiri za siliva 50 000.
20 Pamwapo mawu ya Yahova* yadapitiriza kuwanda ndipo palibe angayakangisa.
21 Vimwevi pavidachitika, Paulo adatsimikiza muntima mwake kuyenda ku Yerusalemu, kupita na ku Makedoniya na ku Akaya. Iye adati: “Nikakafika kumuko, nikayende pomwe ku Roma.”
22 Ku Makedoniya adatumizako wanthu awiri omwe ambamutumikira, omwe ni Timoteyo na Erasito. Koma iye adapitiriza kukhala mu chigawo cha Ásia kwa nthawe ing’ono.
23 Panthawe mwiyo padayambika chipiringu chikulu pankhani ya Njira ya Ambuya.
24 Penze munthu munango wokonza siliva dzina yake Demetiriyo. Amisiri ambaphindula maninge ndawa ya basa yake yokonza twakachisi twasiliva twa Atemi.
25 Demetiriyo adachemeresa amisiri mwawo pabodzi na wanthu ophata basa yobverana na vimwevi. Pamwapo adawauza kuti: “Wanthu imwe, munkudziwa kuti tigumana chuma kuchokera mu basa mweyi.
26 Manje munkuwona na kubva vakuti Paulo ankuchitisa wanthu azinji kuti ayambe kukhulupirira vinthu vinango. Wachita vimwevi osati mu Efeso mokha muno, koma mu chigawo chose cha Ásia. Iye ankufotokoza kuti milungu yokonzewa na manja ni milungulini chaiyo.
27 Ndipo chomwe chinkupasa mantha maninge sikuti ni kunyozeka kwa basa yathu yokha, koma kachisi wa mulungu nkulu nkazi Atemi ambadzawonewe kuti alibe basa. Munkudziwa kuti aliyese muchigawo chose cha Ásia komasoti padziko yose yapasi alemekeza Atemi, koma ndawa ya vomwe Paulo akunena ulemerero wake udzamaliretu.”
28 Padabva vimwevi, wanthu mwawo adakalipa maninge nkuyamba kukuwa kuti: “Nkulu ni Atemi, mulungu wa wanthu wa ku Efeso!”
29 Pavidateno, muthaundi yose mwiyo mudadzala chipiringu, ndipo wanthu wose adathamingira kumalo yochitira masenzeka, ali phate Gayo na Arisitako nkuwakwekwetera nkati mumo. Gayo na Arisitako ambafamba na Paulo ndipo kwawo kwenze ku Makedoniya.
30 Paulo ambafuna kungena nkati mwa gulu ya wanthu mwawo, koma wopfunzira alibe kumubvumiza.
31 Wanthu anango onyang’anira vikondwerero na masenzeka omwe enze anzake, nawombo adamutumizira mawu yomugwigwirira kuti osati angene m’malo ya masenzeka mwayo kuchitira kuti angaikhe moyo wake pangozi.
32 Kunena shuwa, gulu yose mwiyo yenze idasokonezeka, anango ambakuwirira vinango, anango vinango. Ndipo azinji ambadziwalini kuti ndawa chani wanthu adzala kumuko.
33 Pamwapo iwo adabulisa Alekizanda mugulu mwiyo ndipo Ayuda adamugwinyira kutsogolo. Patsogolo pake Alekizanda adaimisa djanja yake mdzulu kuti ayankhule pakudziteteza kwa wanthu mwawo.
34 Koma iwo padazindikira kuti iye ni wa ku Yuda, wose pabodzi adakuwa kwa maola yothamingira yawiri kuti: “Nkulu ni Atemi mulungu wa wanthu wa ku Efeso!”
35 Pamapeto pake, wonyang’anira thaundi padauza gulu ya wanthu mwawo kuti ikhale chete, adati: “Ko imwepo wanthu wa mu Efeso, alipo munthu yemwe adziwalini kuti thaundi ya Efeso ni yomwe inyang’anira kachisi wa Atemi nkulu na chifaniziro chomwe chidagwa kuchokera kudzulu?
36 Pakuti palibe yemwe angatsutse vimwevi, mufunika kudekha, ayi kuchita vinthu mwagugu.
37 Imwepo mwabweresa wanthu awa omwe ni mbavalini za mu akachisi panango onyoza mulungu wathu nkazi.
38 Manje peno Demetiriyo na amisiri omwe ali nawo awa amugumana na mulandu munthu, pakhala ntsiku za milandu ndipo governador alipo. Ambakakashalirane kumuko.
39 Koma peno munkufuna vinango voposha pamwapa, chigemulo chake chifunika kukaperekewa panyumba yobvumizika.
40 Vomwe vachitika lero ivi ni vopasa mantha ndawa tingakhale na mulandu wopandukira boma. Tilibiretu lazau yomwe tingafotokoze pa chipiringu chomwe chachitika ichi.”
41 Padanena vimwevi, adauza wanthu mwawo kuti achoke pamalo mwayo.
Mawu ya m’nyantsi
^ Onani vakumapeto A5.
