Vomwe atumi adachita 2:1-47
2 Manje wose enze adasonkhana pabodzi pantsiku ya chikondwerero cha Pentekosite.
2 Mwadzidzidzi kudzulu kudabveka zungo ninge ya mphepo yamphanvu, ndipo zungo yake idadzala m’nyumba yose yomwe iwo enzemo.
3 Patsogolo pake adawona malilimi yowoneka ninge moto, ndipo yadagawanika nkukhala pa aliyese wa iwo ibodzi-ibodzi.
4 Ndipo wanthu wose mwawo adadzadziwa na mzimu uchena ndipo adayamba kuyankhula viyankhulo vosiyanasiyana, mobverana na momwe mzimu muyo udawachitisira kuyankhula.
5 Panthawe mwiyo, Ayuda wogopa Mulungu wochokera m’makhaindi yose ya padziko yapasi angakhala ku Yerusalemu.
6 Manje zungo mwiyo paidabveka, padasonkhana gulu ikulu ya wanthu. Iwo adadabwa maninge, ndawa aliyese adawabva ankuyankhula mu chiseweredwe chake.
7 Vimwevi vidawadabwisa maninge mwakuti adayamba kubvunzana kuti: “Wanthu imwe, ko wanthu wose mwawa akuyankhula ni wa ku Galileyalini?
8 Manje vikukwanisika tani kuti aliyese pagulu yathu mwiyi ambabve mu chiyankhulo chake?
9 Pano pali Apati, Amedi na Aelamu, pali pomwe wanthu wochokera ku Mesopotamiya, ku Yudeya, ku Kapadokiya, ku Ponto na kuchigawo cha Ásia.
10 Pali wanthu wochokera ku Fulugiya, ku Pamfuliya, ku Iguputo, na kumadera ya Libiya yomwe yali pafupi na Kurene. Pali pomwe alendo wochokera ku Roma, omwe ni Ayuda na wanthu omwe adachita kuchinja nkukhala Ayuda.
11 Komasoti pali Akerete na Aluya. Tose tikuwabva akuyankhula vinthu vizinji va Mulungu mu viyankhulo vathu.”
12 Wose adadabwa maninge ndipo adasowa chochita mwakuti ambabvunzana kuti: “Ko vimwevi vinkutanthauza chani?”
13 Koma anango ambawaseka nkumbanena kuti: “Mwawa aledzera na vinyu unyowani.”
14 Koma Petulo adaimirira pabodzi na atumi 11 wale. Iye adayankhula nawo mokuwa kuti: “Imwepo wanthu waku Yudeya na imwepo mose wa mu Yerusalemu, dziwani ivi ndipo bveserani mosamala vomwe nikufuna kukuuzani.
15 Sikuti wanthu mwawa aledzera ninge momwe imwepo munkuganizira, ndawa manjeuno nthawe iri 9 ora.
16 Koma vomwe vikuchitika ivi ni vomwe vidanenewa pophatisira basa mneneri Yoweli kuti:
17 ‘“Ndipo muntsiku zomalizira,” ankunena teno Mulungu, “nidzapereke mzimu wangu kwa chamoyo chirichose, ndipo wana wanu amuna na akazi, adzayankhule vakutsogolo. Alumbwana adzawone masomphenya ndipo amuna wachikulire adzalote maloto.
18 Olo akapolo wangu amuna na akazi nidzawapase mzimu wangu muntsiku zimwezo ndipo iwo adzayankhule vakutsogolo.
19 Nidzachite vodabwisa kudzulu na vizindikiro padziko yapasi. Padzakhale magazi, moto na utsi wokwira mdzulu.
20 Dzuwa idzasanduke mdima, ndipo mwezi udzasanduke magazi. Vimwevi vidzachitike ikalibe kufika ntsiku ikulu na ya ulemerero ya Yahova.*
21 Ndipo aliyese wochemera pa dzina ya Yahova* adzapulumuke.”’
22 Imwe amuna wa mu Izirayeli, bvani mawu aya: “Yesu waku Nazareti ni munthu yemwe Mulungu adakuwonesani pachena. Adachita vimwivo pakuchita basa zamphanvu, vodabwisa na vizindikiro, vomwe Mulungu adachita pakati panu pophatisa basa iye, ninge momwe imwepo mukudziwira.
23 Munthu moyu, yemwe adaperekewa mwa kufuna kwa Mulungu na kudziwiratu kwake va mtsogolo, mudachitisa kuti aphewe pokhomererewa pamuti na wanthu wosabvera malamulo.
24 Koma Mulungu adamumukisa pakumumasula ku vowawa va impfa, ndawa venze vosakwanisika kuti impfa imuphate mwamphanvu.
25 Pale Davide adanena va iye kuti: “Niyikha Yahova* patsogolo pangu nthawe zose. Pakuti iye ali kudjanja yangu yamakulu, nidzagunduzikelini.
26 Ndawa ya vimwevi ntima wangu udakondwa ndipo nidayankhula mokondwa maninge. Komasoti inepano nidzakhale na chidikhiro,
27 ndawa mudzanisiyelini m’Manda,* ndipo mudzabvumelini kuti thupi ya wokhulupirika wanu iwole.
28 Mwanidziwisa njira za moyo, ndipo mudzachitise kuti nimbakondwe maninge nikakhala namwe pafupi.’
29 Abale wangu, nikufuna niyankhule momasuka va Davide yemwe ni m’bereki wathu. Iye adamwalira nkuikhiwa m’manda, ndipo manda yake tiri nayo mpakana lero.
30 Iye wenze mneneri ndipo ambadziwa kuti Mulungu adamupolomisa polumbira, kuti pampando wake wachifumu adzakhazikepo m’bodzi pa mbadwa zake.
31 Iye adadziwiratu vantsogolo ndipo adaneneratu va kumuka kwa Khrisitu kuti alibe kusiyiwa m’Manda,* komasoti thupi yake iribe kuwola.
32 Yesu muyo Mulungu adamumukisa, ndipo tose ise ndise mboni za nkhani mweyi.
33 Iye adakwiziwa nkukhala ku djanja yamakulu ya Mulungu ndipo adatambira mzimu uchena wopolomisiwa wochokera kwa Ababa. Ndipomwapa iye watipasa mzimu uchena muyo womwe imwepo munkuuwona na kuubva.
34 Ndipo Davide alibe kuyenda kudzulu, koma iye adati: “Yahova* adauza Ambuya wangu kuti: “Khala kudjanja yangu yamakulu
35 mpakana nidzaikhe azondi wako kuti akhale chopondapo mapazi yako.”’
36 Ndipomwapa nyumba yose ya Aizirayeli idziwe kuti Yesu moyu, yemwe imwepo mudamuphera pamuti, Mulungu adamuikha kukhala Ambuya na Khrisitu.”
37 Iwo padabva mawu mwaya, adashupika maninge muntima ndipo adabvunza Petulo na atumi anango mwawo kuti: “Abale wathu, tichite chani pamwapa?”
38 Petulo adawadawira kuti: “Lapani, ndipo aliyese abatiziwe mu dzina ya Yesu Khrisitu kuti machimo yanu yakhululukiwe. Mukachita teno mudzatambire mphaso ya fovolo ya mzimu uchena.
39 Polomisi mweyi yaperekewa kwa imwepo, kwa wana wanu na wanthu wose wa kutali, wose omwe Yahova* Mulungu wathu angawasalule.”
40 Petulo adachitira pomwe umboni wokwanira na mawu yanango yazinji. Komasoti alibe kuleka kuwadandaulira kuti: “Dzipulumuseni ku m’badwo wa maganizo yophonyeka.”
41 Pamwapo omwe adatambira mawu yake mwayo mokondwa adabatiziwa, mwakuti ntsiku mwiyo chiwerengero cha opfunzira mwawo chidaingizirika na wanthu othamingira 3000.
42 Pamwapo iwo adapitiriza kutewedza vomwe atumi mwawo angapfunzisa, kucheza, kudyera pabodzi na kupemphera.
43 Wanthu wose adayamba kuchita mantha maninge ndipo atumi mwawo adayamba kuchita vinthu vodabwisa na vizindikiro vizinji.
44 Wose omwe adakhala wokhulupirira angakhala pabodzi ndipo angapasana vinthu vose vomwe enze navo.
45 Ambagulisa malo yawo na vinthu vinango vomwe enze navo nkugawa kwa wose vomwe agumana, mobverana na vomwe aliyese ankufunikira.
46 Ntsiku iriyose ambasonkhana mukachisi mobverana. Ambachemererana chakudya mu nyumba zawo komasoti ambagawana vakudya mokondwa na ntima wose.
47 Angatamanda Mulungu komasoti angakondewa na wanthu wose. Komasoti ntsiku iliyose, Yahova* adapitiriza kuingizira wanthu omwe angawapulumusa.
Mawu ya m’nyantsi
^ Onani vakumapeto A5.
^ Onani vakumapeto A5.
^ Onani vakumapeto A5.
^ Panango kuti: “Hade,” kutanthauza manda ya wanthu wose.
^ Panango kuti: “Hade,” kutanthauza manda ya wanthu wose.
^ Onani vakumapeto A5.
^ Onani vakumapeto A5.
^ Onani vakumapeto A5.
