Vomwe atumi adachita 23:1-35
23 Paulo adanyang’anisisa wanthu wa mu Tiribunali ikulu ya Ayuda mwawo nkunena kuti: “Wanthu imwe, abale wangu, nachita vinthu mosashupiwa na chikumbuntima changu pamaso pa Mulungu mpakana lero.”
2 Hananiya nkulu wa antsembe padabva vimwevi, adalamula wanthu omwe enze adaimirira naye pafupi kuti amumenye pakamwa.
3 Padateno, Paulo adamuuza kuti: “Uti uwone, Mulungu akulange, chipupa chopintali iwe, koma chodzongeka nkati. Wakhala pamwapo kuti uniweruze motewedza Chilamulo, manje unkuphwanya pomwe Chilamulo mwicho pakulamula kuti animenye?”
4 Wanthu omwe adaima naye pafupi adati: “Ko unkunyoza nkulu wa antsembe wa Mulungu?”
5 Paulo adati: “Abale, nilibe kudziwa kuti ni nkulu wa antsembe. Ndawa Malemba yanena kuti: “Wotonga wanthu wa ntundu wako ayi kumuyankhulira mawu yoipa.’”
6 Paulo padawona kuti anango pa wanthu mwawo enze Asaduki ndipo anango enze Afalisi, adakuwa mu Tiribunali mumo kuti: “Wanthu imwe, abale wangu, inepano ndine Mfalisi, mwana wa Afalisi. Pano ninkuweruziwa ndawa ya chidikhiro chakuti wakufa adzamuke.”
7 Padanena vimwevi, Afalisi na Asaduki adayamba kugegedzana maninge ndipo gulu mwiyo idagawikana.
8 Ndawa Asaduki ambanena kuti munthu wakufa angamukelini ndipo kulibe angelo panango cholengewa chauzimu. Koma Afalisi ambadawikiza mosabisa kuti vose vimwevi viliko.
9 Pamwapo penze chizungo ndipo alembi anango wa gulu ya Afalisi adaimirira nkuyamba kutsutsa mwaukali kuti: “Tinkuchigumanalini chomwe munthu moyu waphonya. Koma peno mzimu panango mngelo wayankhula naye . . .”
10 Kugegedzana muko pakudakula maninge, nkulu wa masocha adachita mantha kuti wanthu mwawo amukhwadzulekhwadzule Paulo. Pamwapo adalamula masocha kuti yayende yakamuchose pagulu mwiyo nkubwera naye kumpanda wa masocha.
11 Koma usiku wa ntsiku mweyo, Ambuya adaima pafupi na Paulo nkumuuza kuti: “Limba ntima. Ndawa wanichitira umboni mokwana ku Yerusalemu, ndipo ukanichitire pomwe umboni ku Roma.”
12 Pakudachena, Ayuda adapangana vakuti amuphe Paulo ndipo adachita kulumbira nkudzitemberera kuti adyelini chinthu panango kumwa chilichose mpakana aphe Paulo.
13 Penze amuna oposha 40 omwe adapangana vakuti amuphe Paulo mochita kulumbirira.
14 Wanthu mwawo adayenda kwa antsembe akulu na akulu kukanena kuti: “Ise talumbira pochita kudzitemberera kuti tidyelini chinthu mpakana tiphe Paulo.
15 Manje imwepo pabodzi na wa mu Tiribunali Ikulu ya Ayuda, muuze nkulu wa masocha kuti abwerese Paulo kwa imwepo ninge kuti munkufuna kubvesa bwinobwino nkhani yake. Koma akanati kufika ise tidzamuphe.”
16 Koma mwana mwamuna wa mulongosi wake wa Paulo adabva kuti wanthu mwawo apangana vakuti amukhalijire panjira ndipo adayenda kumpanda wa masocha nkukamuuza Paulo vimwevi.
17 Pamwapo Paulo adachemera m’bodzi wa atsogoleri wa masocha nkumuuza kuti: “Mutenge mulumbwana uyu uyende naye kwa nkulu wa masocha ndawa iye anamawu yakuti akamuuze.”
18 Pamwapo adamutengadi nkuyenda naye kwa nkulu wa masocha ndipo adanena kuti: “Paulo yemwe ali mudjeri, wanichemera nkuniuza kuti nimubwerese mulumbwana uyu. Ati anamawu yakuti akuuzeni.”
19 Nkulu wa masocha muyo adamuphata djanja mulumbwana muyo nkuyenda naye pambali ndipo adamubvunza kuti: “Unkufuna kuniuza chani?”
20 Iye adati: “Ayuda apangana vakuti akukumbireni kuti mangwana muyendese Paulo ku Tiribunali Ikulu ya Ayuda ninge kuti ankufuna kubvesa bwinobwino mulandu wake.
21 Koma ayi kubvuma kuti akunyengerereni, ndawa amuna oposha 40 ankufuna kudzamukhalijira panjira. Wanthu mwawa alumbira mochita kudzitemberera kuti adyelini panango kumwa chilichose mpakana amuphe. Mwakuti ninkulewa pano tene akonzeka kale ndipo akundodikhira kuti imwepo muwabvumize.
22 Nkulu wa masocha muyo adauza mulumbwana muyo kuti ambayende ndipo adamulangiza kuti: “Ayi kuuza aliyese kuti wanifotokozera vimwevi.”
23 Pamwapo adachemeresa azitsogoleri awiri wa masocha nkuwauza kuti: “Uzani masocha 200 kuti yakonzekere kuchita ulendo woyenda ku Kaisareya cha m’ma 21 ora usiku uno. Pakhale pomwe amuna 70 opakira pa makavalo na masocha 200 ya mikondo.
24 Muwapase pomwe makavalo kuti apakizepo Paulo kuti akafike kwa governador Felike ali bwinobwino.”
25 Patsogolo pake iye adanemba kalata yonena kuti:
26 “Ine Kalaudiyo Lusiya, ninkunembera imwepo Wolemekezeka Governador Felike: Tambirani moni wangu!
27 Munthu uyu adaphatiwa na Ayuda ndipo enze adasala pang’ono kumupha. Koma panthawe mwiyo nidafika na gulu yangu ya masocha nkumupulumusa ndawa nidabva kuti iye ni nzika ya Roma.
28 Manje pakufuna kudziwa chomwe adapalamula, nidayenda naye ku Tiribunali Ikulu ya Ayuda.
29 Kumuko nidagumana kuti ankunena kuti iye anamulandu wobverana na nkhani za Chilamulo chawo. Koma alibe kugumanika na mulandu uliwose wakuti angaphewe panango kuikhiwa mudjeri.
30 Koma pakuti nadziwa vomwe apangana kuti amuchite munthu moyu, namutumiza kwa imwepo ndipo nalamula wanthu mwawa omwe ankunena kuti iye anamulandu kuti adzafotokoze mulandu muyo pamaso panu.”
31 Pamwapo masocha mwayo yadatenga Paulo usiku nkuyenda naye ku Antipatiri mobverana na vomwe adawalamula.
32 Mangwana yake adasiya amuna opakira pamakavalo wale kuti apitirire naye, koma iwo adabwerera kumpanda wa masocha.
33 Amuna opakira pamakavalo mwawo adafika ku Kaisareya nkupereka kalata ile kwa governador ndipo adapereka pomwe Paulo.
34 Pamwapo governador adawerenga kalata mwiyo ndipo adabvunza chigawo chomwe Paulo angachokera. Adabva kuti iye wenze wa ku Kilikiya.
35 Pamwapo adati: “Nibvesere mulandu wako wose wanthu mwawo omwe ankunena kuti unamulandu akafika.” Ndipo adalamula kuti amusunge m’nyumba ya Mpfumu Herode nkumbamunyang’anira.
