Vomwe atumi adachita 24:1-27
24 Pazidapita ntsiku 5, padafika nkulu wa antsembe Hananiya pabodzi na akulu anango, komasoti munthu munango wodziwa kuyankhula dzina yake Teritulo. Iwo adayamba kufotokoza mulandu wa Paulo kwa governador.
2 Teritulo padapasiwa mwayi kuti ayankhule adayamba kunamizira Paulo kuti:
“Tili pantendere wabwino maninge ndawa ya imwepo, komasoti vinthu vinkuchinja mu ntundu wathu uyu ndawa ya nzeru zanu zoona patali.
3 Ndipomwapa nthawe zose komasoti kulikose, imwepo wolemekezeka a Felike, isepano tiwona nzeru zanu zimwezo ndipo titembeja maninge.
4 Koma kuti osati tikuchebweseni, tinkukumbira kuti mutikomere ntima ndipo mubve mawu yathu pang’ono.
5 Isepano tagumana kuti munthu moyu ni woshupisa maninge ndipo ankuyambisa vopandukira boma pakati pa Ayuda padziko yose. Ndipo ni mtsogoleri wa kagulu ka wanthu wopanduka wa ku Nazareti.
6 Komasoti iye ambafuna kupsyipiza kachisi ndipo tidamuphata.
7 * ——
8 Muchimubvunza, mungachite kutsimikizirambo mwekha kuti vose vomwe tinkunena ivi nkunamalini.”
9 Padanena vimwevi, Ayuda nawombo adangenerera ndipo ambanena motsimikiza kuti vimwevi ni shuwadi.
10 Governador muyo padagunduzira msolo Paulo kuti ayankhule, Paulo adadawira kuti:
“Ninkudziwa kuti mwakhala munkutonga ntundu moyu kwa magole yazinji. Ndipomwapa ndine wokondwa kuyankhula modziteteza pa vomwe ankuninamizira ivi.
11 Imwepo mungagumane umboni wakuti pakalibe kupita ntsiku 12 kuchokera pomwe inepano nidayenda ku Yerusalemu kukatumikira Mulungu.
12 Ndipo wanthu mwawa alibe kunigumanako ku kachisi ninkutsutsana na aliyese. Alibe kunigumanako ninkuyambisa chipiringu m’masunagoge panango kumalo yaliyose mu thaundi mweyi.
13 Ndipo angakwaniselini kukupasani umboni pa vomwe ankuninamizira ivi.
14 Koma chomwe ninkudawikiza kwa imwepo ni chakuti: Njira yotumikirira yomwe iwo ankuinena kuti ‘gulu yopanduka,’ ni yomwe inepano ninkuitewedza pakutumikira Mulungu wa azibereki wangu. Ndawa nikhulupirira vose vomwe vili mu Chilamulo na vomwe aneneri adanemba.
15 Ndipo ine ninachidikhiro ninge chomwembo wanthu mwawa anacho, kuti Mulungu adzamukise wolungama na wosalungama.
16 Ndipomwapa ninkuyesesa mwakhama kuti nikhale na chikumbuntima chabwino kwa Mulungu komasoti kwa wanthu.
17 Manje payadapita magole yazinji nidabwera kudzapereka mphaso zachifundo kwa wanthu wa ntundu wangu komasoti kudzapereka ntsembe.
18 Panimbachita vimwevi, adanigumana mu kachisi ninkudzichenesa motewedza mwambo. Penze palibe gulu ya wanthu yomwe ingachite chipiringu, koma penze Ayuda anango wochokera ku chigawo cha Ásia.
19 Vidakakhala kuti inepano ndine wophonya, amwawo ndiwo ambafunika kubwera kudzanena kuti ninamulandu.
20 Panango abvumizeni wanthu ali pano awa afotokoze wokha peno adanigumana na mulandu uliwose penenze nidaima pamaso pa Tiribunali Ikulu ya Ayuda.
21 Mawu yabodzi yokha yomwe inepano nidanena, pomwe nenze nidaima pakati pawo ni yakuti: ‘Ine lero ninkutongewa ndawa ya chidikhiro chakuti wakufa adzamuke!’”
22 Pakuti Felike ambadziwa bwinobwino nkhani yonena va Njira mweyi, adaimisa mulandu moyu nkunena kuti: “Nidzagemule mulandu wanu moyu akadzafika Lusiya nkulu wa masocha.”
23 Iye adalamula mtsogoleri wa masocha kuti amusunge mudjeri, koma amupaseko ufulu ndipo ambabvumize wanthu wa ntundu wake kubwera kudzamuthandiza.
24 Pazidapita ntsiku pang’ono, Felike adafika pabodzi na nkazi wake Durusila yemwe wenze Myuda. Pamwapo Felike adachemeresa Paulo nkumbamubvesera pambafotokoza va kukhulupirira Khrisitu Yesu.
25 Koma pomwe ambafotokoza va chilungamo, kudziletsa na chiweruzo chomwe chinkubwera, Felike adachita mantha ndipo adati: “Basi, ndimo tene, yamba wayenda, nikadzagumana mpata nidzakuchemere pomwe.”
26 Komasoti ambaganiza kuti Paulo amupase kobiri. Ndipomwapa ambamuchemeresa pafupipafupi nkumbakambirana naye.
27 Payadapita magole yawiri, Felike adangenewa m’malo na Porikiyo Fesito. Koma pakuti Felike ambafuna kuti Ayuda ambamukonde, adandomusiya Paulo mudjeri.
Mawu ya m’nyantsi
^ Onani vakumapeto A3.
