Vomwe atumi adachita 25:1-27
25 Pazidapita ntsiku zitatu kuchokera pomwe Fesito adafika mu chigawo mwicho nkuyamba kulamulira, adayenda ku Yerusalemu kuchokera ku Kaisareya.
2 Kumuko antsembe akulu na amuna wolemekezeka pakati pa Ayuda adamuuza vinthu voipa pankhani ya Paulo. Pamwapo adayamba kumugwigwirira
3 kuti amukomere ntima nkuchemeresa Paulo kuti abwere ku Yerusalemu. Koma adapangana kuti amukhalijire panjira nkumupha.
4 Koma Fesito adawadawira kuti Paulo ankufunika kusungiwa ku Kaisareya nakuti iye wasala pang’ono kubwerera kumuko.
5 Pamwapo adati: “Womwe anamaudindo pakati panu tiyendere pabodzi kuti peno chilipo chomwe munthu moyu waphonya akatiuze.”
6 Manje iye padakhala nawo kumuko kwa ntsiku zosapitirira 8 panango 10, adabwerera ku Kaisareya. Ndipo mangwana yake adakhala pa mpando wotongera mulandu nkuuza wanthu kuti amubwerese Paulo.
7 Paulo padafika, Ayuda womwe adabwera kuchokera ku Yerusalemu adaimirira momuzungulira nkumbamunamizira milandu yazinji yopasa mantha, yomwe alibe kukwanisa kupereka umboni wake.
8 Koma Paulo pakudziteteza adati: “Inepano nilibe kuchimwira Chilamulo cha Ayuda panango kachisi panango pomwe Kaisara.”
9 Koma pakufuna kuti Ayuda mwawo ambamukonde, Fesito adabvunza Paulo kuti: “Ko unkufuna kuyenda ku Yerusalemu kuti nkhani yako mweyi ikatongewe kumuko pamaso pangu?”
10 Koma Paulo adadawira kuti: “Inepano naima kutsogolo kwa mpando wotongera milandu wa Kaisara komwe nifunika kutongewa. Ayuda nilibe kuwaphonyera chinthu ninge momwe imwepo munkuwonera.
11 Peno ndinedi wophonya ndipo ninkufunika kuphewa ndawa ya vomwe nachita, ninkulambalini kufa. Koma peno vomwe ankuninamizira ivi nivosabveka, palibe munthu yemwe anganipereke kwa iwo pakundofuna kuwakondweresa. Ninkukumbira kuti nikatongewe na Kaisara.”
12 Manje Fesito padakambirana na alangizi, adadawira kuti: “Pakuti wakumbira kuti ukatongewe na Kaisara, udzayendedi kwa Kaisara.”
13 Pazidapita ntsiku, Mpfumu Agiripa na Berenike adafika ku Kaisareya paulendo waboma wokapereka ulemu kwa Fesito.
14 Pakuti adakhala kumuko ntsiku zing’onong’ono, Fesito adafotokozera mpfumu mwiyo nkhani ya Paulo. Iye adati:
“Pali munthu munango yemwe Felike adamusiya mudjeri.
15 Penenze ku Yerusalemu, antsembe akulu komasoti akulu wa Ayuda adabwera kudzaniuza voipa pakunena va munthu muyo ndipo adakumbira chigemulo chakuti aphewe.
16 Koma ine nidawadawira kuti Aroma achitalini tene vinthu. Iwo aperekalini munthu kwa wanthu womunamizira pakundofuna kuwakondweresa, munthu wonamiziriwa muyo akanati kupasiwa mwayi wogumana maso na maso na womwe ankumunamizira kuti adziteteze ku mulandu muyo.
17 Manje padafika kuno, nilibe kuchebwa, koma mangwana yake nidakhala pampando wotongera mulandu nkuchemeresa munthu kuti abwere naye.
18 Womunamizira mwawo padaima nkuyamba kufotokoza, alibe kutomola voipa vilivose vomwe munthu moyu adachita.
19 Iwo ambatsutsana naye nkhani zofotokoza momwe atumikirira mulungu, komasoti va munthu munango dzina yake Yesu yemwe adafa, koma Paulo ankupitiriza kunena motsimikiza kuti anamoyo.
20 Panidakangira kumalisa nkangano wa nkhani mwezi, nidamubvunza peno ankufuna kuyenda ku Yerusalemu kuti akatongerewe kumuko.
21 Koma Paulo adakumbira kuti timusunge kuti akabve chigemulo cha Wolemekezeka. Pamwapo nidalamula kuti asungiwe mpakana pomwe nidzamutumize kwa Kaisara.”
22 Agiripa adauza Fesito kuti: “Inembo nifuna nibve nekha munthu moyu ankuyankhula.” Iye adati: “Mangwana mudzamubvesere.”
23 Mangwana yake, Agiripa na Berenike, adabwera na ulemu ukulu wachifumu nkungena mu chipinda chomwe wanthu adasonkhana. Wenze na akuluakulu wa masocha komasoti wanthu wobvekera wa muthaundi mwiyo ndipo Fesito padalamula, adabweresa Paulo.
24 Fesito adanena kuti: “Mpfumu Agiripa na wanthu wose womwe muli nase pano, mwamuwona munthu uyu? Ayuda wose ku Yerusalemu kuno, adanikumbira kuti munthu moyu afunikalini pomwe kukhala na moyo ndipo adayankhula vimwevi mokuwa.
25 Koma inepano nidawona kuti alibe kuchita choipa chilichose kuti angaphewe nacho. Iye padakumbira kuti akawonekere kwa Wolemekezeka, nidaganiza vakuti nimutumize.
26 Nilibe mpfundo iliyose yomwe ninganembere Mbuya wangu yofotokoza va munthu moyu. Ndipomwapa namubweresa kwa mose imwepo, makamaka imwepo Mpfumu Agiripa, kuti mukamubvunza va nkhani mweyi nigumane chaniti ninembe.
27 Ndawa inepano ninkuwona kuti vililini bwino kutumiza wadjeri koma osatomola milandu yake.”
