Vomwe atumi adachita 26:1-32
26 Agiripa adauza Paulo kuti: “Ungayankhule mbali yako.” Pamwapo Paulo adakwiza djanja yake nkuyamba kuyankhula modziteteza kuti:
2 “Imwepo Mpfumu Agiripa, ndine wokondwa kuti lero nidziteteze pamaso panu, pa vinthu vose vomwe Ayuda ankuninamizira.
3 Makamaka ndawa yakuti ndimwe shasha pa miyambo yose komasoti pa vinthu vomwe Ayuda agegedzana. Ndipomwapa ninkukukumbirani kuti munibvesere modekha.
4 Shuwadi, mbiri yomwe nakhala nayo kuyambira nili mulumbwana pakati pa wanthu wakhaindi* yangu komasoti mu Yerusalemu, ni yodziwika bwino kwa Ayuda wose
5 womwe ankunidziwa kuchokera kalekale. Kuti afune, anganichitire umboni kuti nenzedi Mfalisi wa mugulu yomwe imbatumikira pochita vinthu monyanyira maninge.
6 Koma manje ninkuwonewa kuti ninamulandu ndawa ya chidikhiro cha vomwe Mulungu adapolomisa azibereki wathu.
7 Madzinza yathu 12 yankudikhira kuwona kukwanirisiwa kwa polomisi mweyi ndipo ankuchitira Mulungu muyo utumiki wopatulika mosalekedza usiku na masikati. Ndipomwapa Mpfumu, Ayuda ankunena kuti ndine wophonya ndawa ya chidikhiro chimwechi.
8 Ndawa chani wanthu imwe munkuwona* kuti nivosakwanisika kuti Mulungu amukise akufa?
9 Inepano nimbaganiza kuti nifunika kuchita vizinji votsutsana na dzina ya Yesu wa ku Nazareti.
10 Ndipo nidachitadi vimwevi ku Yerusalemu. Antsembe akulu akanipasa vipepa vonibvumiza, nimbafungira mudjeri wochena azinji. Akagemuliwa kuti aphewe, inepano nimbadawikiza.
11 Nthawe zizinji nimbawapasa chilango m’masunagoge yose pakufuna kuwachichimiza kuti asiye vomwe ambakhulupirira. Pakuti nenze nidakalipa nawo maninge, nidafika pakuwadzudza mpaka m’mathaundi yakunja.
12 Nili na volinga vimwevi, nidanyamuka ulendo woyenda ku Damasiko pomwe antsembe akulu adanipasa vipepa vonibvumiza.
13 Koma penenze munjira dzuwa ili masikati, imwepo mpfumu, nidawona kugwerewera kochokera kudzulu koposha kugwerewera kwa dzuwa ndipo kudanizungulira inepano komasoti kudazungulira wanthu womwe nenze nawo pa ulendo muyo.
14 Pamwapo tose tidagwa pasi, ndipo nidabva mawu yankuniuza mu Chiheberi kuti: ‘Saulo! Saulo! Ndawa chani unkunidzudza? Iwepo unkudzishupisa wekha pakupitiriza kuponya minyendo yako kumbuyo ninge ng’ombe yomwe inkuthusa mendo yake kuti imenye m’shamu wa ambuya wake.’
15 Koma ine nidati: ‘Ambuya, ko ndimwe mbani? Ndipo Ambuya adati: ‘Ndine Yesu yemwe iwepo unkumudzudza.
16 Koma podiya vili teno, muka ndipo uimirire. Nawonekera kwa iwepo kuti nikusankhule kuti ukhale mtumiki komasoti mboni ya vinthu vose vofotokoza va ine vomwe waona komasoti vomwe nidzakuwonese.
17 Ndipo nidzakupulumuse kwa wanthu mwawa komasoti kwa wanthu wa makhaindi yanango komwe ninkukutumiza
18 kuti ukafungule maso yawo nkuwachosa mumdima nkuwayendesa kogwerewera, komasoti kuwachosa m’manja mwa Satana nkuwayendesa kwa Mulungu. Ukachite vimwevi kuti machimo yawo yakhululukiriwe nkukupasa vomwe adakusungira pabodzi na wochenesewa ndawa yonikhulupirira.
19 Ndipomwapa Mpfumu Agiripa, ine nidawona kuti vilibwino kuti nibvere vomwe nidawona m’masomphenya yakudzulu.
20 Kuyambira kwa wanthu wa ku Damasiko, ku Yerusalemu ndipo patsogolo pake mudziko yose ya Yudeya na wanthu wamakhaindi yanango, nidafikisa ntontholo wakuti alape nkuyamba kutumikira Mulungu pochita vinthu vowonesa kulapa.
21 Ndawa ya vimwevi, Ayuda adaniphata mu kachisi nkumbafuna kunipha.
22 Koma podiya venze teno, pakuti nidawona Mulungu ankunithandiza, ninkupitiriza kuchitira umboni kwa wanthu wobvekera komasoti kwa wanthu wosapfunza mpaka lero. Ninkunenalini chilichose, koma vinthu vokha vomwe aneneri na Mose adanena kuti vichitike.
23 Vakuti Khrisitu adzabonere, ndipo ninge woyamba kumukisiwa adzalalikire kwa wanthu mwawa komasoti kwa wanthu wa makhaindi yanango nkhani ya kugwerewera.”
24 Pomwe Paulo anganena vimwevi pakudziteteza, Fesito adayankhula mokuwa kuti: “Iwepo Paulo wafuntha! Kupfunzira maninge kwakufunthisa!”
25 Koma Paulo adati: “Wolemekezeka a Fesito, inepano nilibe kufuntha, koma ninkuyankhula mawu ya chonadi ndipo nili bwinobwino.
26 Shuwadi, ninkuyankhula momasuka ndawa mpfumu yomwe ninkuyankhula nayo inkudziwa bwino vimwevi. Ninkukaikiralini kuti palibe olo chibodzi pa vinthu vimwevi chomwe munkuchidziwalini ndawa vimwevi vilibe kuchitika mobisa.
27 Ko imwepo Mpfumu Agiripa, mukhulupirira vomwe aneneri adanemba? Ninkudziwa kuti muvikhulupirira.”
28 Koma Agiripa adauza Paulo kuti: “Mukanthawe kang’onong’ono unganichinje kuti nikhale Mkhrisitu.”
29 Pamwapo Paulo adati: “Peno ni munthawe ing’ono panango itali, pemphero yangu kwa Mulungu ni yakuti, wose womwe lero anibvesera, osati imwe mwekha, akhale ninge ine kuchosapo matcheni yanili mangiwe nayo aya.”
30 Patsogolo pake, mpfumu idaimirira. Governador, Berenike na amuna womwe enze adakhala naye pabodzi nawombo adaimirira.
31 Koma pochoka adayamba kukambirana kuti: “Munthu uyu alibe kuphonyesa chilichose chomwe chingachitise kuti aphewe panango kumangiwa.”
32 Ndipo Agiripa adauza Fesito kuti: “Adakati alibe kukumbira kukawonekera kwa Kaisara, munthu moyu sembe wamasuliwa.”
