Vomwe atumi adachita 28:1-31
28 Patidapulumuka teno, tidabva kuti ntsuwa mwiyo ichemerewa kuti Melita.
2 Wanthu woyankhula chiyankhulo chachilendo kumuko adatiwonesa kukoma ntima kwapadera. Iwo adagasa moto nkutitambira bwino tose ndawa kumbagwa nvula ndipo kumbazizira.
3 Koma Paulo padalokota nkhuni nkuziponya pamoto, padabula nyoka ya chipiri ndawa ya kupsa ndipo idamuluma nkulamatira kudjanja yake.
4 Wanthu wa chiyankhulo chachilendo mwawo padawona kuti nyoka ya ndulu yoipa inkulelembera kudjanja yake, adayamba kuuzana kuti: “Shuwa, munthu moyu ni wakupha wanthu ndawa olo kuti wapulumuka panyanja, Chilungamo chilibe kumubvumiza kuti apitirize kukhala na moyo.”
5 Koma iye adaikunkhumulira pamoto nyoka mwiyo ndipo ilibe kumudzonga.
6 Wanthu mwawo ambadikhirira kuti atupe panango kugwa pasi nkufa. Koma padadikhirira kwa nthawe itali nkuwona kuti palibe chomwe chinkumuchitikira, adachinja maganizo nkuyamba kunena kuti ni mulungu.
7 Pafupi na malo mwaya penze minda ya munthu yemwe ambanyang’anira ntsuwa mweyo dzina yake Papuliyo. Iye adatitambira bwino maninge ndipo adatisamalira kwa ntsiku zitatu.
8 Koma ababa wake wa Papuliyo enze ofesuka komasoti ambadwala m’mimba mwa kamwazi ndipo ambandokhala gone. Pamwapo Paulo adangena mwenze ababa mwawo nkupemphera ndipo patsogolo pake adawaphata pa msolo nkuwapolesa.
9 Pavidateno, wanthu anango wose omwe ambadwala pantsuwa mweyo adabwera kwa iye ndipo adawapolesa.
10 Iwo adatilemekeza potipasa mphaso zizinji, ndipo patinganyamuka adatipasa vinthu vizinji vomwe timbafunikira.
11 Payadapita minyezi yatatu, tidanyamuka pa barko ya ku Alekizandiriya yokhala na chizindikiro cha “Wana wa Zeu.” Barko mweyi idayima pantsuwa mwapo pakudikhira kuti nthawe yozizira imale.
12 Patsogolo pake tidafika pamalo yanango yotsamisira barko ku Surakusa ndipo tidakhalapo ntsiku zitatu.
13 Patidachoka kumuko, tidazungulira nkufika ku Regio. Paidamala ntsiku ibodzi, kudayamba mphepo ya ku sul ndipo ntsiku yachiwiri tidafika ku Potiyolo.
14 Kumuko tidagumana abale ndipo adatikumbira kuti tikhale nawo ntsiku 7. Patsogolo pake tidapitiriza ulendo wathu woyenda ku Roma.
15 Abale wa kumuko padabva va isepano, adabwera mpakana kudzafika ku Bazali ya Apiyo na ku Nyumba Zitatu za Alendo kudzatichunguzira. Paulo padawaona, adatembeja Mulungu ndipo adalimba ntima.
16 Patidafika ku Roma, Paulo adabvumiziwa kumbakhala yekha na nsocha womudikhirira.
17 Pazidamala ntsiku zitatu, Paulo adachemeresa akuluakulu wa Ayuda. Padasonkhana adawauza kuti: “Amuna imwe, abale wangu, podiya kuti nilibe kuchita chilichose chotsutsana na wanthu panango mwambo wa azibereki wathu, adaniphata ku Yerusalemu nkunipereka m’manja mwa Aroma ninge wadjeri.
18 Ndipo padafagafaga, ambafuna kunimasula ndawa alibe kunigumana na mulandu wakuti ningaphewe nawo.
19 Koma Ayuda adatsutsa vimwevo ndipo nidakakamizika kukawonekera kwa Kaisara. Koma sikuti nidachita vimwevi pakufuna kuti nidzanenere voipa wanthu wa ntundu wangu.
20 Ndipomwapa, nidakumbira kuti nidzawonane namwe nkuyankhula namwe, pakuti namangiwa na tcheni iyi ndawa ya chidikhiro cha Aizirayeli.”
21 Iwo adamudawira kuti: “Isepano tilibe kutambira kalata iliyose yochokera ku Yudeya yonena va iwepo ndipo kulibe kubwerako m’bale aliyese kudzatiuza panango kuyankhula choipa chilichose pakunena va iwepo.
22 Koma olo nteno, tinkufuna kubva maganizo yako, ndawa kunena chaivo, isepano tose tidziwa kuti gulu yopanduka mweyi ainenera voipa kulikose.”
23 Pavidateno, adapangana ntsiku yakuti adzagumane naye ndipo adabweradi azinji komwe iye angakhala. Kundoyambira machibese mpakana maulo, adawafotokozera nkhani yose ndipo adachitira umboni mokwana va Ufumu wa Mulungu. Adachita vimwevi pakuphatisa basa mpfundo zotenga ntima zofotokoza va Yesu, kuchokera mu Chilamulo cha Mose na vomwe aneneri adanemba.
24 anango adayamba kukhulupirira vomwe Paulo adanena, koma anango alibe kukhulupirira.
25 Manje pakuti angatsutsana, adayamba kuchoka. Koma Paulo adanena mawu yakuti:
“Mzimu uchena udanena chaivo kwa azibereki wanu pakuphatisa basa mneneri Yesaya.
26 Mzimu muyo udati: ‘Yenda ukauze wanthu awa kuti: “Kubva mudzabve bwinobwino, koma mudzazindikirelini. Kunyang’ana mudzanyang’ane bwinobwino, koma mudzawonelini chilichose.
27 Ndawa wanthu mwawa aumisa mitima yawo ndipo abva na matu yawo koma alibe kubvera. Afunga maso yawo kuti osati akwanise kuwona na maso yawo, komasoti kuti osati akwanise kubva na matu yawo nkubvesa tanthauzo yake m’mitima yawo, patsogolo pake nkuchinja kuti ine niwapolese.’”
28 Ndipomwapa dziwani kuti njira ya Mulungu yopulumusira wanthu, yatumiziwa kwa wanthu wa makhaindi yanango. Ndipo mosakaika, iwo adzabvesere.”
29 * ——
30 Pamwapo Paulo adapitiriza kukhala kwa magole yawiri mu nyumba yomwe ambalipira pa mwezi, ndipo wanthu wose omwe ambabwera kudzamuwona ambawatambira bwino.
31 Ambawalalikira va Ufumu wa Mulungu komasoti kuwapfunzisa va Ambuya Yesu Khrisitu, na ufulu wose wa kuyankhula palibe chomukangisa.
