Vomwe atumi adachita 3:1-26
3 Manje Petulo na Yohani angayenda kukangena mu kachisi 15 ora yomwe yenze nthawe yopemphera.
2 Pamwapo penze mwamuna munango yemwe adabadwa wopunduka. Ntsiku iriyose ambamutakula nkumukhazika pafupi na msuwo wa kachisi wochemerewa Msuwo Wokhuza, kuti ambakumbire mphaso zachifundo kwa wanthu wongena mukachisi mumo.
3 Munthu muyo padawona Petulo na Yohani ankungena mukachisi mumo, adayamba kukumbira kuti amupase mphaso zachifundo.
4 Koma Petulo, pabodzi na Yohani, adamunyang’anisisa nkunena kuti: “Tinyang’ane.”
5 Iye adawanyang’anisisa, ankudikhira kuti amupase chinthu.
6 Koma Petulo adati: “Nilibe Siliva na golide, koma nikupase chomwe nili nacho: Mu dzina ya Yesu Khrisitu waku Nazareti, famba!”
7 Padateno adamuphata djanja yamakulu nkumuyimiririsa. Nthawe mwiyoletu mapazi na minyendo yake vidalimba.
8 Pavidateno adamoga nkuimirira ndipo adayamba kufamba. Iye adangena nawo pabodzi mukachisi mumo, ankufamba, kumogamoga komasoti kutamanda Mulungu.
9 Wanthu wose adamuwona ankufamba na kutamanda Mulungu.
10 Iwo adamuzindikira kuti ni munthu yemwe ambakhala pa Msuwo Wokhuza wa kachisi kumbakumbira mphaso zachifundo. Ndipo wanthu mwawo adadabwa maninge na vomwe vidamuchitikira.
11 Munthu moyu adapitiriza kufamba pabodzi na Petulo na Yohani ne kuwasiya, ndipo gulu yose ya wanthu idathamangira kwa iwo pamalo yochemerewa Khonde ya Vipilala ya Solomo, ndipo imbadabwa maninge.
12 Petulo padawona vimwevi, adauza wanthu mwawo kuti: “Imwe Aizirayeli, ndawa chani mukudabwa navo vimwevi? Ndawa chani mukutinyang’anisisa ninge kuti tamufambisa na mphanvu zathu panango ndawa ya kudzipereka kwathu kwa Mulungu?
13 Mulungu wa Abulahamu, wa Isaki na wa Yakobo, Mulungu wa azibereki wathu, ndiye walemekeza mtumiki wake Yesu, yemwe imwepo mudamupereka na kumulamba pamaso pa Pilato, podiya kuti Pilato muyo ambafuna kumumasula.
14 Inde, imwepo mudalamba wochena na wolungama muyo, ndipo mudakumbira kuti akumasulireni munthu wakupha wanthu.
15 Mudapha mtumiki nkulu wa moyo, koma Mulungu adamumukisa ndipo isepano ndise mboni za nkhani mweyi.
16 Ndipomwapa ndawa ya dzina yake komasoti ndawa yakuti tikhulupirira dzina yake mwiyo, munthu yemwe mukumuwona komasoti kumudziwa uyu wapola. Chikhulupiriro chomwe isepano tinacho ndawa ya iye chachitisa kuti apoleretu ninge momwe mose imwepo mukuwonera.
17 Abale wangu, ninkudziwa kuti mudachita vinthu mosazindikira, ninge momwe wolamulira wanumbo adachitira.
18 Koma pamwapa Mulungu wakwanirisa vomwe adaneneratu pakuphatisa basa aneneri wose, kuti Khrisitu wake adzabonere.
19 Ndipomwapa lapani na kuchinja kuti machimo yanu yapfudziwe, nakuti nthawe zotsitsimusa zibwere kuchokera kwa Yahova.*
20 Komasoti kuti atumize Yesu, yemwe ni Khrisitu wosankhuliwa ndawa ya imwepo.
21 Moyu kudzulu kufunika kumusunga mpakana nthawe yobwezeresa vinthu vose, yomwe Mulungu adanena pakuphatisa basa aneneri wake wochena wakalekale.
22 Ndipo Mose adanena kuti: “Yahova* Mulungu wanu adzakupaseni mneneri ninge inepano kuchokera pakati pa abale wanu. Mudzamubvere pa vinthu vose vomwe adzakuuzeni.
23 Munthu aliyese yemwe adzabverelini Mneneri muyo, Mulungu adzamuphe kuti aleke kukhala pomwe pakati pa wanthu.’
24 Ndipo aneneri wose, kuyambira pa Samueli mpakana pa aneneri wose omwe adabwera patsogolo pake, wose womwe adaneneratu vakutsogolo, adanena mosapita m’mbali va ntsiku zimwezi.
25 Imwepo ndimwe wana wa aneneri na wa pangano yomwe Mulungu adapangana na azibereki wanu wakalekale. Iye adauza Abulahamu kuti: “Pakuphatisa basa mbadwa yako, mabanja yose yapadziko yapasi yadzadalisiwe.’
26 Mulungu padasankhula ntumiki wake, adayamba wamutumiza kwa imwepo, kuti adzakudaliseni pobweza aliyese wa imwepo kuti musiye basa zanu zoipa.”
