Vomwe atumi adachita 5:1-42
5 Munthu munango dzina yake Hananiya, na nkazi wake Safira, adagulisa munda wawo.
2 Koma iye adachosako kobiri zinango nkubisa ndipo nkazi wake adadziwa vimwevo. Pamwapo adatenga kobiri zosala nkukazipereka kwa atumi.
3 Koma Petulo adati: “Hananiya, ndawa chani Satana wakulimbisa ntima kuti unamize mzimu uchena nkubisa kobiri zinango za munda?
4 Ko munda muyo wenzelini m’manja mwako ukalibe kuugulisa? Ndipo pawaugulisa, kobiri mwizo udakakwanisalini kuchita nazo virivose vomwe unkufuna? Manje ndawa chani waganiza kuchita vinthu vimwevi? Pamwapa ulibe kunamiza wanthu, koma wanamiza Mulungu.”
5 Hananiya padabva vimwevi adagwa pasi nkufa. Ndipo wose womwe adabva vimwevo adachita mantha maninge.
6 Pamwapo alumbwana adabwera nkumukulungira mu nguwo ndipo adabula naye nkukamuikha m’manda.
7 Payadapita maola yothamingira yatatu, nkazi wake adangena ndipo ambadziwalini vomwe vachitika.
8 Pamwapo Petulo adamubvunza kuti: “Niuze, ko kobiri zose zomwe mwagumana pamwagulisa munda wanu ni zimwezi basi?” Iye adadawira kuti: “Inde, ni zimwezi.”
9 Manje Petulo adamubvunza kuti: “Ndawa chani awiri imwe mwapangana vakuti muyese mzimu wa Yahova?* Unkudziwa! Wanthu omwe ayenda kukaikha mwamuna wako m’manda ali pansuwo. Nawembo akunyamule nkubula nawe.”
10 Nthawe mwiyo Safira adagwa pasi pafupi na mapazi ya Petulo nkufa. Pomwe alumbwana wale ambangena adamugumana wafa kale. Pamwapo adamunyamula nkubula naye ndipo adamuikha m’manda pafupi na mwamuna wake.
11 Pavidateno mpingo wose na wanthu wose omwe adabva vimwevi adachita mantha maninge.
12 Atumi mwawo adapitiriza kuchita vizindikiro na vodabwisa vijinji pakati pa wanthu. Ndipo wokhulupirira wose ambasonkhana Pakhonde ya Vipilala ya Solomo.
13 Nishuwadi kuti palibe aliyese yemwe adachita chikanga nkubverana na wopfunzira mwawo, koma olo nteno wanthu ambawatamanda maninge.
14 Komasoti wanthu wokhulupirira Ambuya adapitiriza kuingizirika, ndawa amuna na akazi azinji maninge adakhala wopfunzira.
15 Wanthu mwawo ambabweresa wodwala m’misewu nkuwagonesa pamibeda yang’onoyang’ono na pamphasa kuti Petulo akambagwata, chibvulibvuli chake chokha chindofikirako wanthu anango omwe ambadwala.
16 Ndipo wanthu azinji wochokera m’mathaundi yozungulira Yerusalemu ambayenda kumuko na wanthu wodwala komasoti omwe mizimu yoipa imbawadzudza. Ndipo wose mwawo ambapolesewa.
17 Koma nkulu wa antsembe na wose omwe enze naye, omwe enze mugulu yampatuko ya Asaduki, adachita njiru. Pamwapo adanyamuka
18 nkuphata* atumi mwawo ndipo adawafungira mudjeri.
19 Koma usiku, mngelo wa Yahova* adafungula misuwo ya djeri mwiyo nkuwabulisa ndipo adawauza kuti:
20 “Yendani mukaime mukachisi ndipo mukapitirize kuuza wanthu va moyo omwe unkubwera.”
21 Padabva vimwevi, machibese maninge adangena mukachisi nkuyamba kupfunzisa.
Koma nkulu wa antsembe na wose omwe enze naye adasonkhanisa wanthu wa mu Tiribunali Ikulu ya Ayuda komasoti akulu wose wa Izirayeli. Patsogolo pake adatumiza magwarda kudjeri kule kuti akatenge atumi mwawo nkubwera nawo.
22 Koma magwarda yale payadafika, yalibe kuwagumana mudjeri mumo. Pamwapo adabwerera nkukawauza vimwevi.
23 Iwo adati: “Tagumana djeri iri yokhiya na yotetezewa bwino, magwarda yali ime m’misuwo. Koma patafungula tilibe kugumanamo aliyese.”
24 Wonyang’anira kachisi na wantsembe akulu padabva vimwevi, adasowa chochita ndawa ambadziwalini kuti vimale tani.
25 Koma padafika munthu munango nkuwauza kuti: “Wanthu imwe! Amuna wale omwe mudafungira mudjeri ali nkachisi, aima mumo ndipo ankupfunzisa wanthu.”
26 Pavidateno wonyang’anira kachisi adanyamuka na magwarda yake nkukawatenga. Koma alibe kuwatenga mwa chipiringu pakugopa kuti wanthu angawaphe na minyala.
27 Pamwapo adabwera nawo nkuwaimiririsa munyumba ya Tiribunali Ikulu ya Ayuda. Ndipo nkulu wa antsembe adanena
28 kuti: “Tidakulamulani mwamphanvu kuti ayi kudzapfunzisa pomwe mu dzina mweyi. Koma mwadzadza dera yose ya Yerusalemu na mpfundo zomwe mukupfunzisa ndipo mwatsimikiza ntima kuti isepano tikhale na mulandu wa magazi wa munthu moyu.”
29 Petulo na atumi anango adadawira kuti: “Ise tifunika kubvera Mulungu ninge wolamulira, osati wanthu.
30 Mulungu wa azibereki wathu adamukisa Yesu, yemwe imwepo mudamupha mwakuchita kumumanika pamuti.
31 Ndipo Mulungu adamukwiza kudjanja yake yamakulu ninge Ntumiki Nkulu na mpulumusi. Adachita vimwevi kuti Aizirayeli alape komasoti kuti machimo yawo yakhululukiriwe.
32 Ndipo ise ndise mboni za vinthu vimwevi, nchibodzibodzimbo mzimu uchena, womwe Mulungu wapereka kwa wanthu omubvera ninge wolamulira.”
33 Padabva vimwevi, adakalipa maninge mwakuti ambafuna kuwapha.
34 Koma Mfalisi munango dzina yake Gamaliyeli adaimirira mu Tiribunali Ikulu ya Ayuda. Iye wenze mpfunzisi wa Chilamulo wolemekezewa na wanthu wose. Manje adalamula kuti wanthu mwawo awabulise kwakanthawe kang’ono.
35 Patsogolo pake adawauza kuti: “Imwepo Aizirayeli, samalani na vomwe mukufuna kuwachita wanthu awa.
36 Ndawa muntsiku za m’mambuyo umu kwenze Teuda yemwe adadzichitisa kuti abvekere maninge ndipo wanthu wothamingira 400 adangena mugulu yake. Koma adaphewa, ndipo wose omwe ambamulondola adamwazika, ne kugumanika pomwe.
37 Patsogolo pake padabwera Yudasi waku Galileya muntsiku za kanembera. Wanthu azinji adatengeka naye ndipo ambamulondola. Koma nayembo adafa, ndipo wose omwe ambamulondola adamwazika.
38 Ndipomwapa mwaviriri umu, ninkukuuzani kuti asiyeni wanthu mwawa ayi kushupana nawo. Ndawa peno volinga vawo panango basa mweyi inkuchokera kwa wanthu, ipitelini patali.
39 Koma peno inkuchokera kwa Mulungu, mungakwaniselini kuwalambiza. Ndipo mukangingimira mukhale kuti mukushupana na Mulungu.”
40 Iwo adabvera malangizo yake mwaya ndipo adachemeresa atumi. Pamwapo adandowakwapula* nkuwalamula kuti aleke kuyankhula mu dzina ya Yesu, ndipo patsogolo pake adawamasula.
41 Pavidateno atumi mwawo adachoka mu Tiribunali Ikulu ya Ayuda. Iwo enze wokondwa ndawa Mulungu adawona kuti venze bwino kuti iwo adzudziwe ndawa ya dzina ya Yesu.
42 Ndipo ntsiku iriyose adapitiriza kupfunzisa mukachisi komasoti ku nyumba na nyumba ndipo ambalengeza ntontholo wabwino wonena va Yesu Khrisitu.
Mawu ya m’nyantsi
^ Onani vakumapeto A5.
^ Panango kuti: “nkumanga.”
^ Onani vakumapeto A5.
^ Panango kuti: “Adandowamenya.”
