Vomwe atumi adachita 6:1-15
6 Pa nthawe mwiyo, pomwe wopfunzira mwawo angapitiriza kuingizirika, Ayuda woyankhula Chigiriki adayamba kudandaula ndawa ya Ayuda woyankhula Chiheberi. Angadandaula ndawa akazi wamasiye wa Chigiriki ambaikhiriwalini nzeru pa nkhani yogawa chakudya cha ntsiku na ntsiku.
2 Pamwapo atumi 12 wale adachemera gulu ya opfunzira nkunena kuti: “Vingakhalelini bwino kuti isepano tisiye basa yopfunzisa mawu ya Mulungu nkuyamba kugawa chakudya.
3 Manje abale, fagani amuna 7 pagulu yanu iyi wa mbiri yabwino omwe anamzimu komasoti nzeru, kuti ise tiwapase udindo wonyang’anira basa yofunika mweyi.
4 Koma isepano tidzipereke pankhani yopemphera komasoti kupfunzisa mawu ya Mulungu.”
5 Wanthu wose mwawo adakondwa na mawu mwayo mwakuti adasankhula Sitefano, munthu wachikhulupiriro cholimba komasoti wodzala na mzimu uchena. Adasankhula pomwe Filipo, Purokolo, Nikanora, Timoni, Paremena na Nikolao waku Antiokeya yemwe adachita kuchinja nkukhala Muyuda.
6 Manje adawabweresa kwa Atumi, ndipo padapemphera, atumi mwawo adawaphata pa msolo powonesa kuti awapasa udindo.
7 Pavidateno mawu ya Mulungu yadapitiriza kufalikira. Chiwerengero cha wopfunzira chingaingizirika maninge mu Yerusalemu. Ndipo wantsembe azinji adakhulupirira.
8 Sitefano wenze na mphanvu ndipo ambachita kuwonekeratu kuti Mulungu ali naye. Iye ambachita vizindikiro vodabwisa na vizindikiro vamphanvu pakati pa wanthu.
9 Koma wanthu anango wa mugulu yochemerewa Sunagoge wa Omasuliwa, adafika pabodzi na wanthu anango waku Kurene, waku Alekizandiriya, ku Kilikiya na waku Ásia kudzatsutsana na Sitefano.
10 Koma iwo alibe kukwanisa kutsutsana na nzeru zake komasoti mzimu uchena womwe umbamutsogolera akambayankhula.
11 Patsogolo pake adanyengerera amuna anango mwachintsintsi kuti anene kuti: “Isepano tamubva muyu akuyankhula vinthu vonyoza Mose na Mulungu.”
12 Vimwevi vidakalipisa maninge akulu, alembi na wanthu anango. Pamwapo adabwera modzidzimusa nkumuphata ndipo adayenda naye ku Tiribunali Ikulu ya Ayuda.
13 Iwo adabweresa mboni zonama, zomwe zimbanena kuti: “Munthu moyu akundokhalira kuyankhula mawu yonyoza malo yochena aya komasoti Chilamulo.
14 Mwakulinganiza, isepano tamubva akunena kuti Yesu waku Nazareti ule adzadzonge malo yochena mwaya nkuchinja miyambo yomwe Mose adatipasa.”
15 Wanthu wose womwe enze mu Tiribunali Ikulu ya Ayuda padanyang’anisisa Sitefano, adawona kuti nkhope yake inkuwoneka ninge ya mngelo.
