Vomwe atumi adachita 8:1-40
8 Saulo adadawikiza vakuti Sitefano aphewe.
Ntsiku mwiyo, mpingo womwe wenze ku Yerusalemu udayamba kudzudziwa maninge. Pamwapo wopfunzira wose, kuchosapo atumi okha, adamwazikana nkuyenda mu vigawo va Yudeya na Samariya.
2 Koma wanthu anango wogopa Mulungu adatenga Sitefano nkukamuikha m’manda, ndipo adamulira maninge.
3 Saulo adayamba kudzudza mpingo mwankhanza. Ambangena munyumba iriyose nkumbakwewera panja amuna na akazi kubodzi, ndipo ambawayendesa kudjeri.
4 Koma wanthu omwe adamwazikana wale, ambalalikira ntontholo wabwino wa mawu ya Mulungu kumadera yomwe adayenda.
5 Filipo adayenda muthaundi ya Samariya nkuyamba kulalikira va Khrisitu kwa wanthu wa kumuko.
6 Wanthu azinji ambabvesera vomwe Filipo ambanena. Wanthu wose ambabvesera na kuwona vizindikiro vomwe iye ambachita.
7 Kumuko kwenze wanthu azinji omwe enze na mizimu yoipa ndipo imbakuwa nkubula. Wanthu azinji wozizira vidzo na wopunduka ambapolesewa.
8 Pamwapo wanthu wa muthaundi mwiyo adakondwa maninge.
9 Muthaundi mwiyo mwenze pomwe munthu munango dzina yake Simoni. Ivi vikanati kuchitika, iye ambachita vamatsenga nkumbadabwisa wanthu wose waku Samariya ndipo ambadzikuza maninge.
10 Wanthu wose, wana na akulu kubodzi, ambadabwa naye ndipo ambanena kuti: “Munthu muyu anamphanvu ikulu ya Mulungu.”
11 Ambadabwa naye ndawa kwa nthawe itali adawadabwisa na matsenga yake mwayo.
12 Koma iwo padakhulupirira Filipo, yemwe ambalengeza ntontholo wabwino wa Ufumu wa Mulungu komasoti wonena va dzina ya Yesu Khrisitu, ambabatiziwa, amuna na akazi kubodzi.
13 Simoni ule nayembo adakhala wokhulupirira. Padabatiziwa, ambasiyanalini na Filipo kulikose. Mwakuti ambadabwa pakuwona vizindikiro na basa zikuluzikulu zamphanvu zomwe zimbachitika.
14 Atumi ku Yerusalemu padabva kuti wanthu waku Samariya atambira mawu ya Mulungu, adawatumizira Petulo na Yohani.
15 Iwo adayendadi kumuko ndipo adawapempherera kuti atambire mzimu uchena.
16 Panthawe mwiyi aliyese wenze akanati kutambira mzimu uchena, koma enze adandobatizika mu dzina ya Ambuya Yesu.
17 Pamwapo atumi mwawo adayamba kuphata wanthu mwawo pamsolo, ndipo adatambira mzimu uchena.
18 Manje Simoni padaona kuti atumi mwawo akandowaphata wanthu mwawo ambatambira mzimu uchena, adafuna kuwapasa kobiri.
19 Iye adanena kuti: “Inembo munipasembo mphanvu mweyi, kuti aliyese yemwe ningamuphate pamsolo ambatambire mzimu uchena.”
20 Koma Petulo adamuuza kuti: “Siliva wako muyo udzongeke naye pabodzi, ndawa ukuganiza kuti mphaso ya fovolo ya Mulungu ungaigule na kobiri.
21 Iwepo ulibe mbali iriyose pa basa mweyi ndawa ulibe maganizo yabwino pamaso pa Mulungu.
22 Ndipomwapa siya voipa vomwe wachita ivi ndipo ukumbire Yahova* mogwigwirira kuti peno ni vokwanisika, akukhululukire ndawa ya maganizo yoipa yomwe yali muntima mwako.
23 Naona kuti ndiwe poizoni* yowawa komasoti kapolo wa vinthu vosowa chilungamo.”
24 Simoni adadawira kuti: “Nipempherereni kwa Yahova mogwigwirira kuti vose vomwe mwanena ivi vileke kunichitikira.”
25 Padamaliza kuchitira umboni mokwanira komasoti kuyankhula mawu ya Yahova, adabwerera ku Yerusalemu. Pakubwerera ambalalikira ntontholo wabwino m’mamiyi yazinji yaku Samariya.
26 Koma mngelo wa Yahova* adauza Filipo kuti: “Nyamuka ndipo uyende ku sul* ku nsewu wochokera ku Yerusalemu kuyenda ku Gaza.” (Umoyu ni nsewu wa m’chipululu.)
27 Pamwapo, adanyamuka nkuyenda ndipo adakagumana na munthu waudindo waku Itiyopiya. Munthu moyu wenze na udindo ukulu ndipo angathandiza Kandake, mpfumukazi yaku Itiyopiya. Anganyang’anira pomwe chuma chose cha mpfumukazi mwiyo. Iye wenze adayenda ku Yerusalemu kukatumikira Mulungu.
28 Manje wenze pa ulendo wobwerera kwawo ali khale mu ngolo yake ndipo ambawerenga mokuwa ulosi wa mneneri Yesaya.
29 Manje mzimu udauza Filipo kuti: “Yenda ukafenderere ngolo yake.”
30 Filipo adathamanga nkumbafamba m’mbali mwa ngolo mwiyo ndipo adamubva ankuwerenga mokuwa ulosi wa mneneri Yesaya. Filipo adamubvunza kuti: “Ko mukubvesesa vomwe munkuwerenga?”
31 Iye adadawira kuti: “Ningabvese tani palibe wonifotokozera?” Pamwapo adakumbira Filipo kuti akwere nkukhala naye pabodzi mu ngolo mumo.
32 Mawu ya m’Malemba yomwe iye angawerenga yenze yakuti: “Adamutengera ku malo yakuti akamuphere ninge nkhosa. Ndipo molingana na mwana wa nkhosa yemwe wandokhala chete pomwe akufuna kugerewa ukuse, alibe kufungula pakamwa pake.
33 Pomwe ambamuchitisa manyazi, alibe kumuchitira va chilungamo. Ni mbani angafotokoze bwinobwino m’badwo wa azibereki wake? Ndawa moyo wake wachosewa padziko yapasi.”
34 Manje munthu waudindo ule adabvunza Filipo kuti: “Niuzeni pulizi, ko mneneri moyu akunena va mbani? Va iye panango va munthu munango?”
35 Pavidateno, Filipo adayamba kumuuza va ntontholo wabwino wonena va Yesu, ndipo adayambira pa lemba mweyi.
36 Akufamba teno munsewu mumo, adagumana madzi yazinji ndipo munthu waudindo ule adati: “Onani madzi ayo! Chinkunikangisa kubatizika nchani?”
37 * ——
38 Padateno adalamula kuti ngolo mwiyo iyime. Filipo na munthu waudindo ule adabuluka nkungena m’madzi mumo, ndipo Filipo adabatiza munthu waudindo muyo.
39 Padavuuka m’madzi mumo mzimu wa Yahova* udamuchosapo Filipo mwakankulumize ndipo munthu waudindo ule alibe kumuwona pomwe, koma adapitiriza ulendo wake ankukondwa.
40 Koma Filipo adagumanika kuti ali ku Asidodi, ndipo adayamba kulalikira ntontholo wabwino m’mathaundi yose ya m’dera mweyi mpakana adafika ku Kaisareya.
Mawu ya m’nyantsi
^ Onani matanthauzo ya mawu yanango.
^ Panango kuti: “logo.”
^ Onani matanthauzo ya mawu yanango.
^ Panango kuti: “kum’mwera.”
^ Onani matanthauzo ya mawu yanango.
