Wonembewa na Maliko 1:1-45
-
Yohani m’Batizi ankulalikira (1-8)
-
Ubatizo wa Yesu (9-11)
-
Yesu ankuyesewa na Satana (12, 13)
-
Yesu ankuyamba kulalikira ku Galileya (14, 15)
-
Adachemera opfunzira oyambirira (16-20)
-
Adachosa mzimu woipa (21-28)
-
Yesu ankupolesa wanthu azinji ku Kaperenao (29-34)
-
Kupemphera pamalo ya wekha (35-39)
-
Wakhate adapolesewa (40-45)
1 Chiyambi cha ntontholo wabwino wolewa va Yesu Khrisitu Mwana wa Mulungu:
2 Mobverana na vomwe vidanembewa m’bukhu ya mneneri Yesaya kuti: “(Tetekera! Ine ninkutumiza nthumi yangu kuti itsogole kukakukonzera njira.)
3 Munthu munango ankukuwa mu chipululu kuti: ‘Konzani njira ya Yahova!* Muthamule misewu yake.’”
4 Yohani M’batizi wenze mu chipululu ndipo ambalalikira va ubatizo ninge chizindikiro cha kulapa kuti machimo yakhululukiriwe.
5 Pamwapo wanthu wose womwe angakhala mudera ya Yudeya na wose womwe angakhala mu Yerusalemu angayenda kwa iye. Yohani ambawabatiza* mu kamadzi ka Yorodano ndipo wanthu mwawo ambaulula machimo yawo pachena.
6 Yohani ambavala chovala cha ukuse wa ngamila na bande ya chikumba nchiuno mwake ndipo ambadya abombo* na uchi.
7 Iye ambalalikira kuti: “Pambuyo pangu apa pankubwera munango wamphanvu kuposha inepano, ndipo inepano ndinelini woyenerera kukotama nkumasula nthambo za ntsapato zake.
8 Ine nakubatizani na madzi, koma iye adzakubatizeni na mzimu uchena.”
9 Mu ntsiku mwizo Yesu adabwera kuchokera ku Nazareti wa ku Galileya ndipo adabatiziwa na Yohani mu Yorodano.
10 Padandovuuka m’madzi mumo, iye adawona kudzulu kunkufunguka ndipo adawona mzimu unkubwera ninge nkhangaiwa nkudzamutera.
11 Pamwapo padabveka mawu yochokera kudzulu yolewa kuti: “Iwepo ndiwe Mwana wangu wapamoyo, unikondweresa maninge.”
12 Nthawe mweyo mzimu muyo udamulimbikisa kuti ayende ku chipululu.
13 Iye adakhala mu chipululu mumo ntsiku 40, ankuyesewa na Satana. Mu chipululu mumo mwenze pomwe nyama za kuthengo ndipo angelo ambamutumikira.
14 Yohani padamangiwa, Yesu adayenda ku Galileya kukalalikira ntontholo wabwino wa Mulungu.
15 Iye ambanena kuti: “Nthawe yoikhiwiratu yakwana ndipo Ufumu wa Mulungu wafendera. Lapani ndipo mukhulupirire ntontholo wabwino!”
16 Pomwe ambafamba m’mphepete mwa nyanja ya Galileya, Yesu adawona Simoni na Andireya m’bale wake wa Simoni moyu, ankuthusa akombe wawo mu nyanja mumo ndawa basa yawo yenze yakupha ntsomba.
17 Pamwapo Yesu adawauza kuti: “Nitewereni ndipo nikuchinjeni kuti mukhale wosodza wanthu.”
18 Nthawe mwiyo iwo adasiya akombe wawo nkumutewera.
19 Padayenda patsogolo pang’ono adawona Yakobo mwana wa Zebedayo na m’bale wake Yohani ali mu barko yawo ndipo ambasona akombe wawo.
20 Nthawe mwiyo adawachemera. Pamwapo iwo adasiya ababa wawo a Zebedayo mu barko mumo pabodzi na wanthu waganyu ndipo adamutewera.
21 Wose mwawa adachoka nkuyenda ku Kaperenao.
Ntsiku ya Satade pidayamba, adayenda kukangena mu sunagoge nkuyamba kupfunzisa.
22 Wanthu omwe enze mumo adadabwa maninge na momwe iye angapfunzisira, ndawa angawapfunzisa ninge munthu wokhala na ulamuliro osati ninge alembi.
23 Pa nthawe mweyo mu sunagoge mwawo mumo mwenze munthu munango yemwe wenze na mzimu wonyantsa, ndipo munthu muyo adakuwa kuti:
24 “Ko munkufuna chani kwa isepano imwepo Yesu wa ku Nazareti? Ko mwabwera kudzatidzonga? Inepano ninkukudziwani bwino maninge, ndimwe Wochena wa Mulungu!”
25 Koma Yesu adatsuula mzimu muyo kuti: “Khala chete, ndipo bula mwa iye!”
26 Pamwapo mzimu wonyantsa ule udamuchitisa kuti aphuphe ndipo adakuwa maninge. Patsogolo pake udabula mwa munthu muyo.
27 Padawona vimwevi, wanthu wose adadabwa maninge mpakana adayamba kukambirana kuti: “Ko chimwechi ndicho chani? Ni chipfunziso chinyowani! Olo mizimu yonyantsa ankuilamula mwamphanvu ndipo yankumubvera.”
28 Pamwapo mbiri yake idabveka mwakankulumize maninge mu chigawo chose cha Galileya.
29 Pavidateno, iwo adachoka ku sunagoge muko nkuyenda kumuyi kwa Simoni na Andireya. Yakobo na Yohani adayendambo nawo.
30 Koma apongozi wachikazi wa Simoni enze gone ndawa enze wofesuka. Mwakankulumize iwo adamuuza Yesu va kufesuka kwa amayi mwawa.
31 Pamwapo adayenda komwe kwenze amayi mwawo ndipo adawaphata djanja nkuwamusa. Padandomusiwa, iwo adapoleratu ndipo amayi mwawo adayamba kuwaphikira chakudya.
32 Chakum’maulo dzuwa pidachoma, wanthu adayamba kumubweresera wanthu wose womwe angadwala na anango omwe enze na viwanda.
33 Ndipo wanthu wose wa mu thaundi mweyo adasonkhana pamuyi mwapo.
34 Pamwapo Yesu adapolesa wanthu azinji womwe angadwala matenda ya khaindi na khaindi ndipo adachosa viwanda vizinji. Koma alibe kubvuma kuti viwanda mwivo viyankhule ndawa vimbamudziwa kuti ni Khrisitu.*
35 Machibese maninge kudakali mdima, Yesu adamuka nkubula panja ndipo adayenda kumalo kulibe wanthu. Kumuko adayamba kupemphera.
36 Koma Simoni na anango womwe enze naye adamufagafaga
37 ndipo adamugumana nkumuuza kuti: “Wanthu wose ankukufaganifagani.”
38 Koma iye adawadawira kuti: “Naboni tiyende kunango. Tiyende ku mamiyi yapafupi kuti tikalalikire pomwe kumuko, ndawa nidabwera kudzachita vimwevi.”
39 Iye adayendadi ndipo ambalalikira m’masunagoge mwawo mu Galileya mose ndipo ambachosa viwanda.
40 Kumuko pomwe munthu munango wakhate adafika kwa iye ndipo adagwada pasi nkumugwigwirira kuti: “Ninkudziwa kuti peno munkufuna mungakwanise kunichenesa.”
41 Yesu padabva vimwevo, adachita chifundo maninge ndipo adapfuthula djanja yake nkumugumirira ndipo adamuuza kuti: “Inde ninkufuna, khala wochena.”
42 Nthawe mwiyoletu khate yake ire idamala, ndipo adakhala wochena.
43 Patsogolo pake adamupasa malangizo yamphanvu ndipo nthawe mwiyo adamuuza kuti ambayende.
44 Adamuuza kuti: “Samala, ayi kuulula vimwevi, koma uyende ukadziwonese kwa wantsembe ndipo ndawa yakuti wachenesewa, ukapereke vinthu vomwe Mose adalamula kuti ukhale umboni kwa iwo.”
45 Koma padachoka, munthu ule ambandokhalira kuuza munthu aliyese nkhani mwiyo ndipo adaifalisa pomwe m’madera yanango. Vimwevi vidachitisa kuti Yesu osati akwanise pomwe kungena mu thaundi iliyose mowonekera mpakana angakhala kunja kulibe wanthu. Koma wanthu angabwera basi kwa iye kuchokera ku mbali zose.
Mawu ya m’nyantsi
^ Onani vakumapeto A5.
^ Panango kuti: “ambawamiza; ambawavuwika.”
^ Abombo mwawa enze dzombe.
^ Panango kuti: “vimbamudziwa bwinobwino kuti iye ni mbani.”
