Wonembewa na Maliko 10:1-52
-
Kulowolana na kumalisa banja (1-12)
-
Yesu ankudalisa wana (13-16)
-
Vomwe mwamuna wolemera adabvunza Yesu (17-25)
-
Kuyesesa kuti tidzangene mu Ufumu (26-31)
-
Yesu ankunena pomwe kuti adzafe (32-34)
-
Vomwe Yakobo na Yohani adakumbira (35-45)
-
Yesu adawombola wanthu azinji (45)
-
-
Batimeyu yemwe ambawonalini adapolesewa (46-52)
10 Padachoka kumuko adayenda kumalire ya Yudeya ku tsidya inango ya Yorodano. Kumuko gulu ya wanthu idasonkhana pomwe kwa iye. Mwachizolowezi chake Yesu adayamba pomwe kuwapfunzisa.
2 Manje Afalisi adabwera kwa iye na cholinga chakuti amuyese. Iwo adamubvunza kuti peno venze vobvumizika kuti mwamuna asiye nkazi wake.
3 Iye adawabvunza kuti: “Ko Mose adakulamulani chani?”
4 Iwo adati: “Mose adabvumiza kuti mwamuna ambanembe kalata yomalisira ukwati nkumusiya nkazi muyo.”
5 Koma Yesu adawauza kuti: “Ndawa ya kuuma kwa mitima yanu, iye adakunembereni lamulo mweyi.
6 Koma kuyambira pachiyambi cha chilengedwe ‘Mulungu adawalenga mwamuna na nkazi.
7 Ndipomwapa, mwamuna adzasiye ababa wake na amayi wake,
8 ndipo awiri mwawo adzakhale thupi ibodzi,’ ndipo iwo ni awirilini pomwe koma thupi ibodzi.
9 Ndipomwapa chomwe Mulungu wachimanga pabodzi, munthu ayi kuti achimasule.”
10 Padangena pomwe m’nyumba, wopfunzira adayamba kumubvunza va nkhani mweyi.
11 Iye adawauza kuti: “Aliyese yemwe wasiya nkazi wake nkulowola munango, wachita chigololo ndipo wamuphonyera nkazi muyo.
12 Ndipo peno nkazi wasiya mwamuna wake nkulowodwa na munango, wachita chigololo.”
13 Manje wanthu adayamba kumubweresera wana ang’onoang’ono kuti awagumirire na manja yake, koma wopfunzira mwawo adawakalipira.
14 Yesu padawona vimwevi adakalipa ndipo adawauza kuti: “Alekeni wana mwawo abwere kwa inepano, ayi kuwalambiza. Ndawa Ufumu wa Mulungu ni wa wanthu womwe ali ninge wana mwawa.
15 Shuwa ninkukuuzani, aliyese yemwe atambiralini Ufumu wa Mulungu ninge mwana mng’ono adzangenelini olo pang’ono mu Ufumu muyo.”
16 Manje adatakula wana mwawa ndipo adayamba kuwadalisa mwa kuwaikha manja yake.
17 Pomwe angachoka kumuko, mwamuna munango adamuthamangira nkugwada pamaso pake. Pamwapo adamubvunza kuti: “Mpfunzisi Wabwino, nichite chani kuti nikagumane moyo wosapera?”
18 Yesu adamudawira kuti: “Ndawa chani unkunichemera kuti wabwino? Palibe wabwino, koma Mulungu yekha.
19 Iwe udziwa malamulo yakuti: ‘Ayi kupha munthu, ayi kuchita chigololo, ayi kuba, ayi kupereka umboni wabodza, ayi kubera munthu mwachinyengo komasoti yakuti mumbalemekeze ababa wanu na amayi wanu.’”
20 Munthu muyo adamudawira kuti: “Mpfunzisi, vose vimwevi nakhala ninkuvitewedza kuyambira nili mng’ono.”
21 Yesu adamunyang’ana ndipo adamukonda. Patsogolo pake adamuuza kuti: “Chinthu chibodzi chinkushota mwa iwepo: Yenda ukagulise vinthu vomwe unavo ndipo kobiri zake ukapase wosauka. Ukateno udzakhale na chuma kudzulu, patsogolo pake ubwere udzakhale wotewera wangu.”
22 Koma iye padabva mawu mwaya, adakwinyirira muntima mwake ndipo adachoka ali wokwinyirira, ndawa wenze na vinthu vizinji.
23 Yesu padanyang’ana uku na uku, adauza wopfunzira wake wale kuti: “Vidzakhale voshupa maninge kuti wanthu wa kobiri adzangene mu Ufumu wa Mulungu!”
24 Koma wopfunzira wale adadabwa na mawu yake mwaya. Pamwapo Yesu adawauza kuti: “Wana imwe, kungena mu Ufumu wa Mulungu ni koshupa maninge!
25 Nivosashupa kuti ngamila ingene pa kamubo ka ntsingano kusiyana nakuti munthu wolemera angene mu Ufumu wa Mulungu.”
26 Iwo adadabwa maninge ndipo adamubvunza kuti: “Manje angapulumuke ni mbani?”
27 Yesu adawanyang’anisisa nkuwauza kuti: “Kwa wanthu vimwevi ni vosakwanisika, koma virilini teno kwa Mulungu ndawa vinthu vose ni vokwanisika kwa Mulungu.”
28 Petulo adayamba kumuuza kuti: “Onani! Isepano tasiya vinthu vose nkukulondolani.”
29 Yesu adanena kuti: “Shuwa ninkukuuzani, palibe yemwe wasiya nyumba, azibale, azilongosi, amayi, ababa, wana panango minda ndawa ya ine komasoti ndawa ya ntontholo wabwino,
30 yemwe manjeuno adzagumanelini vinthu vizinji kuingizira maulendo 100 mu nthawe ino. Iye adzagumane nyumba, azibale, azilongosi, amayi, wana na minda komasoti adzadzudziwe ndipo nthawe* yomwe inkubwera iyo adzagumane moyo wosapera.
31 Koma azinji omwe ni woyambirira adzakhale womalizira, ndipo womalizira adzakhale woyambirira.”
32 Pamwapo adapitiriza ulendo wawo woyenda ku Yerusalemu ndipo Yesu wenze patsogolo pawo. Wopfunzira mwawo adadabwa maninge ndipo wanthu womwe angamutewera wale adayamba kuchita mantha. Kachiwiri adawachemerera pambali wopfunzira 12 wale nkuyamba kuwauza vinthu ivi vomwe venze vidasala pang’ono kuti vimuchitikire:
33 “Manje tinkuyenda ku Yerusalemu ndipo Mwana wa munthu akaperekewe kwa antsembe akulu na alembi. Iwo akamutonge kuti aphewe ndipo akamupereke kwa wanthu wamakhaindi yanango.
34 Iwo akamuchitire vinthu vopasa manyazi, kumulavulira mata, kumukwapula na kumupha, koma pakadzapita ntsiku zitatu adzamuke.”
35 Manje Yakobo na Yohani, wana wachimuna wa Zebedayo adayenda kwa iye nkumuuza kuti: “Mpfunzisi, tinkufuna kuti mutichitire chirichose chatingakukumbireni.”
36 Iye adawabvunza kuti: “Ko munkufuna kuti nikuchitireni chani?”
37 Iwo adamudawira kuti: “Mutibvumize kuti m’bodzi wa ise akakhale ku djanja yanu yamakulu ndipo munango adzakhale kumadzere kwanu mu ulemerero wanu.”
38 Koma Yesu adawauza kuti: “Munkudziwalini chomwe munkukumbira. Ko mungamwe chomwe inepano ninkumwa panango kubatiziwa ubatizo womwe ine ninkubatiziwa?”
39 Iwo adadawira kuti: “Inde tingachite.” Padateno Yesu adawauza kuti: “Vomwe inepano ninkumwa mudzamwedi ndipo mudzabatiziwedi ubatizo womwe ine ninkubatiziwa.
40 Koma ndinelini woyenerera kusankhula yemwe adzakhale kudjanja yangu yamakulu panango yamadzere. Ababa wangu adzapereke mwayi muyo kwa womwe adawakonzera.”
41 Opfunzira 10 anango wale padabva vomwe Yakobo na Yohani adanena, adakalipa maninge.
42 Koma Yesu adawachemera nkuwauza kuti: “Imwepo munkudziwa kuti womwe awoneka* ninge ankutonga wanthu wamakhaindi yanango, apondereza wanthu wawo ndipo akuluakulu wawo awonesa mphanvu zawo pa iwo.
43 Vimwevi vifunikalini kukhala teno pagulu yanu. Koma aliyese yemwe ankufuna kuti akhale nkulu pa gulu yanu, afunika kukhala ntumiki wanu
44 ndipo yemwe ankufuna kuti akhale woyambirira pa gulu yanu, afunika kukhala kapolo wa wose.
45 Ndawa olo Mwana wa munthu alibe kubwera kudzatumikiriwa koma kudzatumikira na kudzapereka moyo wake kuti ukhale malipiro yowombola wanthu azinji.”
46 Patsogolo pake adafika ku Yeriko. Koma pomwe iye na wopfunzira wake komasoti gulu ikulu ya wanthu angabula mu Yeriko, Batimeyu (mwana wa Timeyu) yemwe ambandokhalira kukumbirakumbira ndipo ambawonalini, adakhala pasi m’mphepete mwa nsewu.
47 Padabva kuti Yesu wa ku Nazareti ankupita pafupi na iye, Batimeyu adayamba kukuwa kuti: “Yesu, Mwana wa Davide, nichitireni chifundo!”
48 Padateno, wanthu azinji adayamba kumutsuula nkumuuza kuti akhale chete. Koma akamuuza teno iye ambakuwa maninge nkunena kuti: “Mwana wa Davide, nichitireni chifundo!”
49 Pamwapo Yesu adaimirira nkulewa kuti: “Muuzeni abwere kuno.” Iwo adachemera munthu yemwe ambawonalini ule nkumuuza kuti: “Limba ntima, nyamuka, ankukuchemera.”
50 Pamwapo iye adaponya kutali malaya yake yakunja ndipo adaimirira mwakankulumize nkuyenda kwa Yesu.
51 Manje Yesu adamubvunza kuti: “Unkufuna kuti nikuchitire chani?” Munthu yemwe ambawonalini ule adadawira kuti: “Rabôni* nithandizeni kuti niyambe kuwona.”
52 Yesu adamuuza kuti: “Yenda, chikhulupiriro chako chakupolesa.” Nthawe mwiyoletu adayamba kuwona ndipo adayamba kutewera Yesu mu nsewu.
Mawu ya m’nyantsi
^ Onani matanthauzo ya mawu yanango.
^ Panango kuti: “adziwika.”
^ Panango kuti: “Mpfunzisi.”
